扮工小確幸

公司有部分同事都幾辛苦命，放工會拎埋部 Notebook 返屋企，第二朝又帶返公司。魔術師就一向懶理，由舊舊公司都幾間僱傭兵公司到依家，只要唔係預計到有極重要的事情有可能在周末發生，又或者係上司明白講到出口，魔術師一律都唔會咁犯賤帶公司 Notebook 返屋企 - 一來魔術師根本就唔係深宵 work from home 工資奴；二來公司機成日都話有重要資料，無實際用途之下拎來拎去只會更易遺失或損壞，風險遠大於回報；三來魔術師年紀大機器壞，成日孭住個電腦袋行嚟行去，雙肩好易勞損也。

於是，上星期五魔術師見泰利仔唔係好勁，路徑又同我城離行離列，於是便將呢個風介定為「人畜無害」，所以放工亦無拎公司部機返屋企。

出乎意料之外，星期一六點幾起身，竟然就見到天文台話8號波起碼掛到中午。

魔術師便在手機群組通知上司無帶 Notebook 返屋企，未能準備好文件提前在是日下午和總部（當然不在我城）開會，所以用返本來 schedule 咗嘅 meeting invite。

估唔到（可能仲在睡夢中的）上司即時回應：「Okay。」

本來上司生性心急，上星期魔術師約咗下星期二開會都唔得，係都想提早一日，點知墥正打風。

如果係之前的黃C上司，就一定要八號波就搬龍門 by default work from home（見《八號風球工作天》），如果無帶定機返屋企就一定係死罪。

估唔到呢間都幾 mean 嘅公司竟然會「網開一面」？

魔術師再訓多一陣，醒來時見新聞又報八號波起碼掛到下午四點。

即係全日唔使返。

但上司今次就話總部忽然之間要改星期一下午三點半開會，meeting invite 由另一位有帶機返屋企的同事寄出。

魔術師也落得輕鬆，反正上司又話唔使準備文件，個 online meeting 又 set 到唔使一定要經公司內聯網登入，所以可以用家用電腦開會。

都係開十幾分鐘至半粒鐘，咪當聽收音機聽吓總部嘅同事講乜。

完咗會之後就睇 Netflix，咁就過了一天小確幸。

翌日返到公司 check email，果然見到只係得少數同事在打風的日子 work from home email 照出，大部分同事都係無影。

而最搞笑的是，到要填 timesheet(長工都要填 timesheet，真係度縮)時，組長話打風日子係當 work from home normal working day 的。

當然實際上就連組長、上司等在打風日都係無或甚少 email 出，但又照填 timesheet 當工作天...

咁咪即係公然「扮工」？

唔知各位網友的公司又有無將打風日 by default 轉成 work from home 老奉要你拎電腦返屋企呢？

＊＊＊

伸延閱讀：

八號風球工作天

泰利襲港｜旺角市面冷清　遊客無奈改行程　有市民專程帶兒子看電影 2023年07月17日

【有線新聞】風暴期間主題樂園關閉，有旅客改行程到旺角逛街，亦有市民不用上班，選擇看電影。

「泰利」的狂風吹到旺角冷冷清清，最熱鬧的只有這些小食店，有人乾脆席地開餐。旅客臨時變陣改行程來逛街，結果感到失望。內地遊客徐小姐：「主要想逛波鞋街，今日計劃是這樣，喜歡品牌的店都關門了。」內地遊客胡先生：「我沒經歷過颱風，想看看是怎樣，因為我是北方人。今天本來想去迪士尼，看到閉園的消息。」

去看一套迪士尼電影或者可以補償，旺角這間戲院不時有市民和遊客來購票，全日場次仍未滿座。許先生：「天氣情況不是很差，小朋友放假，今日不用上班。（放假可以陪小朋友？）上班重要，上班較陪小朋友重要。」

他們由倫敦來香港工作，把握時間四處逛逛。英國遊客Daniel：「四處遊覽放鬆，吃過美味的本地食物，我們晚上乘飛機離開，如果航班取消就好了，因為我們可以再留幾天。」

有餐廳說八號風球期間，生意額損失約兩成，相信晚市可以全面恢復。