12月27日，位於歐蕯蕯的酒店 3 - 13°C，0700 起床，0800 執好行李放在房門口，0830 食完早餐集合上車，第一站係亞特拉斯影城（Altas Studios），《帝國驕雄（Gladiator)》（唔係《神鬼戰士》）第一、二集、《天國驕雄（Kingdom of Heaven）》等古裝片都在這裡拍攝。導賞團導遊仲同我哋跟當地臨記拍咗一段微短片玩吓，想不到披上那些麻布「戲服」，都幾暖身的！
下一站就係埃本哈杜古城，《權力遊戲（Game of Thrones）》好似就係呢度拍。領隊帶團行上山上去，魔術師自己知自己事都係唔行喇，留在餐廳等大隊返嚟。點知靚姐姐都唔貪玩貪打卡，都留喺度「陪」魔術師 - 不過實際上靚姐姐在我城「忽然」有生意，當然係傾咗先 - 當地1100即係我城1800，正是開會的時候。魔術師另外一個任務就係幫靚姐姐 set up 好新買的自拍神棍 Instant360 Flow 2 Pro...
眾退休團友行完山返嚟就開餐，烤羊肉都係如常的乾和硬：
再下一站係瑪拉喀什，又要搭4粒鐘車，途中經過阿特拉斯山（？），海拔高，氣溫急降，又下起雪來。中途站去到山區一間小店，竟然有大量小原塊水晶洞賣，都係100 DH。魔術師同靚姐姐睇中咗一個很閃亮，啲「牙」尖尖很整齊的小水晶洞，點知在考慮中，領隊叫趕上車就無買到。
去到瑪拉喀什，睇完啲古蹟，信步行到露天市場，其時只是1730，點知領隊話：「咁你哋喺度行一陣，1840 返嚟集合喇！」
魔術師跟靚姐姐對望一眼，「相視而嘻」，落雨濕濕，氣溫 8-14°C，廟街咁嘅格局真係唔知點可以行成粒鐘。果然，行咗一陣已無任何鳩嗚意欲，倒不如搵間餐廳，坐低飲杯茶暖肚：
好不容易捱過一粒鐘，返到去集合地點，見眾團友竟然都買咗啲嘢，淨係魔術師同靚姐姐兩手空空。闊太 M問我哋：「咦？你哋無買嘢嘅？」
魔術師心中雖然唔明點解呢班退休人士會睇得「摩洛哥廟街貨色」上眼，但梗係唔會直接串返闊太 M 轉頭，只係學唐唐約責任「推俾女人」，指住靚姐姐：「佢份人比較揀擇。」
領隊召集過團友，上車去食晚飯。今次係食 Pizza 同意粉，算做轉吓口味：
闊太 M 總算還了心願開到枝酒，勸完其他團友飲返杯之後使又來勸魔術師酒。魔術師推卻，話：「為了心臟健康，都係唔飲喇！」
誰知闊太 M「闊太病」發：「你知唔知我有1,000種方法要你飲...」
可能靚姐姐見魔術師面露不耐煩之色，使「女人之間好說話」：「係囉，醫生叫佢唔好飲酒。」
擾攘了一會，推來推去魔術師終於可以企硬唔飲，將枝酒放在一邊：「係囉，等佢（酒）透吓氣先！」
闊太 M 奇道：「乜你又識要俾枝酒透氣嘅？」
魔術師只好笑吓：「我曾經識過咁喇！」
食完飯坐車返酒店房，今次住的是 Radisson Blu Hotel，是全程最好的酒店。靚姐姐唔介意魔術師將「無在摩洛哥廟街買嘢」的原因推俾佢，因為佢對鳩嗚真係非常挑剔的一個人：「領隊要我哋逛一粒鐘街，即係要我哋買喇啫，我面都燶呀！」
魔術師就話：「我最討厭就係闊太 M 嗰種『操控式』態度。佢令人哋飲酒只係引證自己叻，但蝕咗健康，要 suffer 嘅就係人哋。完全係『慷他人之慨』。」
講講吓，又講返原來大家都念念不忘那個小水晶洞，真係「走咗就買唔返」，一舊水早知就即時掃咗佢。
＊＊＊
伸延閱讀：
//誰知闊太 M「闊太病」發：「你知唔知我有1,000種方法要你飲...」
回覆刪除闊太以前做過邊行，點解呢句咁重風塵味XD
正常一聽到身體問題就即刻停啦