港燦理財（三）

魔術師趁近曰放假，便執拾一下屋企，點知執下執下，竟然執左一疊錢出來。原來係歷年來老父母封利是用剩既「新」銀紙。
大家又估下呢度究竟有幾多錢？

嘩，原來有成２７，６９０元！好似出左個小小ｂｏｎｕｓ。魔術師連忙將其送往銀行存好。咁大疊銀紙，數都有排數，好彩櫃檯既姐姐見魔術師唔係超額好多，便免左魔術師手續費。
前排獅子銀行深圳分行既客戶經理ｃａｌｌ到落黎，叫魔術師得閒上下去坐，於是魔術師便一雞兩味，過去運下吉，順便巡視一下「業務」。
先去工傷銀行打簿，見櫃檯大排長龍，攃機又只能提二千人仔，用自助轉賬機又嫌費事，於是便打消了轉錢去獅子銀行的念頭，嗱嗱臨走去獅子，因為魔術師都係慣左有人斟茶遞水服侍埋．
獅子銀行既國際卓越戶口服務的確係唔同，起碼魔術師既客戶經理係講廣東話既，倍加親切．魔術師見到佢個位有ｄ保本基金既單張，有可能係ＱＤＩＩ產品，例如係投資係香港上市既地產股，同中國資源股，仲有一隻係買天氣指數既．
出奇地個客戶經理並無硬銷（同香港完全唔同），只係幫魔術師ｒｅａｃｔｉｖａｔｅ返ｄ有耐無郁過既戶口，仲解釋埋每個戶口既作用．直到呢一刻，魔術師先知道原來有個戶口係可以將人民幣自由在香港和大陸戶口之間轉換；又有按揭服務，可以借人民幣買樓，再以當時既兌換率換成港元負債，以後用港元息率還港元，既可財息兼收，又有槓桿作用，搞到魔術師都心郁郁．於是又問下客戶經理，而家深圳既樓價係幾多，原來都要成二萬幾元一平方米（即１０．８９平方尺），即係呎價二千多，依大陸既生活指數黎，都唔可以話平．
順便幫獅子銀行賣下廣告，要成為國際卓越戶口客戶，其實無乜特別額外要求，即係你只要係任何一個國家（或地區）成為普通卓越戶口客戶，便可以在其他國家（或地區）開戶，而又無需依當地規矩ｋｅｅｐ最低存款額，即係你只要ｍａｉｎｔａｉｎ住你本來既卓越戶口最低存款額便已足夠，真係好鬼死正．不過唔知點解，獅子銀行無話好高調咁宣傳呢頂服務啫．
2007/12/30  12:35:51