裸辭而別

日前同前同事Ａ同埋前上司葵鼠飯聚，講到魔術師已裸辭，last day 在即。早幾年已由正職轉 freelance、但係就「仲忙過做女嗰陣」的前同事Ａ話：「你可以上岸好耐啦，係你鍾意有工返感覺之嘛...男人老狗冇我呢D師奶咁大條道理要湊仔的類似理由... 同埋其實係仲後生... 除非已有下半場exit reason，唔係硬係怪怪的...」，而葵鼠就話：「活到呢個年紀，開心過生活最緊要」；哎呀，呢兩句真係講到中哂。
查實，依家呢份工，魔術師已是一整年幾無放過長假，實在不知道是為誰辛苦為誰忙；而且以魔術師的財政實力（財務自由？）也不需要去承受這樣大的工作壓力（有好幾晚要做通頂，有時仲會發噩夢扎醒），工作環境和氣氛又不是很好；雖然公司有些短裙妹和美少女但都留唔住魔術師，決定休息一下再定行止。而且就算魔術師再重投職場，全職搵工點都方便啲；同埋 immediate availability 應該都會較有優勢吧？
至於是否繼續做返電車行業、做僱傭兵、定係小轉行（以前某些工作經驗會派上用場）定係大轉行（踏出 comfort zone，reset 經驗值）就真係味の素。
＊＊＊
有跟開魔術師 on and off 講工作瑣事的讀者，都會知道魔術師同黃Ｃ上司實在係唔夾，主要原因除咗佢係黃Ｃ之外，仲疑似佢睇唔順魔術師的（高）學歷、「太過身光頸靚」（唔只係ＬＶ皮帶，佢亦曾經話過魔術師：「買埋啲咁貴嘅筆。」），同埋「太有自我風格」，唔啱公司個 style 不特止，更不是工資奴一族（其實魔術師也很好奇黃Ｃ上司究竟有幾多身家，為何仲要咁搏？）。
另外，黃Ｃ上司生有四白眼已經令到魔術師十分唔自在（學魔術師老師話齋，學掌面相用來睇人，學八字紫微斗數就用來睇自己同埋親人）：

（圖片來源：面相館）

工作環境方面，魔術師真係同眾小妹有代溝，尤其是某些女同事，日常的 working language 就是粗話橫飛，魔術師覺得礙耳不在話下，如果咁啱跟客戶傾電話時被人聽到實在十分尷尬。
客戶方面，可能係因為魔術師從事僱傭兵的年資尚淺，實在不明白為何有些所謂「客戶」可以本着「使銅銀夾大聲」的態度呼呼喝喝，而整個部門同事都要默默承受。要知道，這些「客戶」其實都係受薪一族，用的是公司錢，嚴格來說就是股東資金，你又點知魔術師唔係你公司的股東甚至債主（呢個想法係咪同「以營運公司的角度去投資股票」的想法很接近呢？）？
又，既然大家都係「打份工」，你我都只是在這個時間空間有某種合作關係，一同去完成某件事，大家和和氣氣，尊重他人尊重自己不是很好嗎？為何要頤指氣使扮哂大牌，不斷地施壓呢？
抑或，以上呢啲都係「工資奴」習性，習慣了在「跑老鼠圈」而不自知，而魔術師卻是早就脫離了這個思想框框呢？
＊＊＊
之前又有另一個飯聚，又 update 下舊同事的去向。似乎 junior 同事搵到工的機率唔低，去到中高層卻很難重投職場，魔術師覺得多數係年齡與及工資的關係，高不成低不就，故此最終一係自僱一係退休或半退休。
葵鼠：轉咗兩次工，愈搵愈多。
妹頭：待業至退休
心腹Ｓ：在某呆灣公司做 contract project manager
美顏：做 full time mum，入下家教會指點江山
太郎：難逃被舊公司分手之命運，已是最後一個月，將會退休
Big Mac：難逃被舊公司分手之命運，已是最後一個月，企圖在舊公司申請轉部門
小寶：在舊公司轉了部門
Ｐ：開公司做 Trade 做 video production，自己請自已
前同事Ａ：Freelancer，非常好搵
阿嬸Ｊ：Ｍ記保險
老餅Ｆ：半退休，閒都係Freelancer，接返舊公司的 job，仲好搵咗
ＥＬ：勝在夠基層，搵到份 Hea 工
小斌斌：勝在夠基層，都係搵到份 Hea 工
＊＊＊
伸延閱讀：
一切由糧單開始
八號風球工作天
在黃Ｃ上司面前放閃
有個上司是黃Ｃ
試用期完畢小結
言出必行買鋼筆