2017年8月1日 星期二

魔術師資產配置(2017年7月結)(2nd edition)

本月恆指氣勢如虹曾衝上27,000點,兼且美帝方面又係在 go go go 聲中直撲浪頂,搞到魔術師大部分的投資組合都有唔錯嘅回報。
沉船基金依然係一放絕塵,收報$156.91;第二位的複式盈富以$137.54隨後;第三位是生活基金,收報$126.81。房託組合以$126.37守於第四位,僅輸生活基金一個馬鼻;第五位係明顯受惠於恆指基金的強積金組合,收報$114.66,所以話強積金 default 揀恆指基金一定無死錯人。第六位係合格線收息組合,收報$113.61,雖然本月有HSBC HOLDINGS PLC. 8.125% Perpetual Subordinated Capital Securities (HSEA.NYSE) 與及 HSBC HOLDINGS PLC. 8.00% Series 2 Perpetual Subordinated Capital Securities (HSEB.NYSE)爆升,但係都要輸強積金組合一個短馬頭位。包尾的仍是商品基金,收報$102.37,叫做唔使輸。

如無意外,就趁呢個暑假有個 break,魔術師將考慮(點解講到好似天文台咁?)於8月份資產配置中做些小動作,重組一下。
本月樓價升幅不大,魔術師份身家(淨資產,Net Asset Value(NAV),下同)增長主要係由股票市場而來。其實魔術師第一個7年計劃是在2010年10月(生日月份嘛!)開始,目標係不加按不做孖展槓桿的情況下,在7年內身家翻一倍;點知咁好彩真係提早一年就達成咗,之後無耐魔術師份身家仲衝破咗1,000萬(平常心,唔需要大鑼大鼓 update 自己 profile的)...

依家諗返,1,000萬說多不多,但對一般打工仔來說也不能算是一個小數目;能作為人生的其中一個 milestone,不是沒有理由。果然,自此之後,魔術師好似打通任督二脈咁,睇嘅世界開始唔同咗:例如,魔術師會唔明白,點解前黃C上司會日做夜做無停手,四十幾歲人有老婆仔女點解唔早啲放工陪下屋企,反而係自己搏命OT之餘,仲要啲同事一齊OT(見《八號風球工作天》),其他同事唔OT就唔開心?
唔好多,就當前黃C上司有1,500萬身家(佢係上司,呢個假設應該唔過份,不過唔知點解佢係都睇唔順眼魔術師用的名牌),投資回報收6厘息(匯控(00005.HK)都唔止),一年已經有90萬收入,仲要唔使交稅,唔使供強積金。
90萬被動收入等於幾多?咪就係等於工資收入每月7.5萬(稅後,扣強積金後)或約8萬以上(稅前,扣強積金前)。假如是,以家庭來說,老公一份7萬幾的被動收入,雖然未到財務自由,但某程度都應該輕鬆好多,前黃C上司為乜仲要咁搏?點解唔做得輕鬆啲?就算佢自己真係 truly loves what he does,點解唔只自己做工資奴(都唔排除佢一把年紀依然想賺多啲然後創業嘅!),仲要其他同事一齊做工資奴?

如無意外,為防大市回調,魔術師便保守一點,在本年10月開始新一個兩年計劃,在2019年10月時流勳資產要超過800萬(只計「衝線」那一刻),睇下又得唔得?
2nd edition:再細想之下,魔術師投資上雖然無做槓桿,但仍有住宅按揭(年前轉按只是轉 outstanding balance加幾萬湊夠齊頭數,沒有「加按套現」)與及清還卡數分期套現(見《信用卡分期不「裸借」》) ,按道理這些 current liabilities (在12個月內需要清還的部分)都應該計算在內,看淨流動資產(Net current asset = Total current asset - Total current liabilities)才夠「開誠布公」。由於難度增加了,可能要花3年才可成事,呢個要再睇睇。
所以下一個兩年(或三年?)計劃,是否就是在「2019(或2020)年10月時達至800萬淨流動資產」,那就留待本年9月尾10月頭定案。
***
伸延閱讀:
摩摩推文:财富自由不过是死人的想法
八號風球工作天
信用卡分期不「裸借」

33 則留言:

  1. 魔兄,你的“好似打通任督二脈咁,睇嘅世界開始唔同咗”,其实会唔会系因为你自由咗,又多咗时间思考财经知识等,因而所觉得呢?

    回覆刪除
    回覆
    1. //其实会唔会系因为你自由咗,又多咗时间思考财经知识等,因而所觉得呢?

      我應該係多咗時間去思考「工作的意義」。我的「客戶」其實都係公司客,好多都係 marketing 人,佢地都係打份工啫;不過有部分難搞嘅客會以為係佢自己出錢咁(其實嗰啲只係公司錢,隨時我都有份(對上市公司而言))。以前受呢啲無賴氣,我有時都會記在心中,會唔開心;但「自由」咗之後,反而覺得豁達咗,覺得有時啲嘢唔需要同呢類「真・工資奴」計較(「真・工資奴」的意思,唔係「為五斗米折腰」,而係呢類人的identity 只是由「工資」而來)。

      所以,我就唔明黃C上司點解咁執著,會捉同事打錯字,用fonts唔consistent,覆電郵覆得唔好之類,跟大局其實無乜關係的事情。我唔係話要得過且過;但有時,如果可以用一個「自由」的角度去想:大家都係打份工,唔需要為咗一啲雞毛蒜皮的事嘈交,工作做起來既專業又開心,咁咪幾好囉,唔使下下玩鬥爭的。

      刪除
  2. 魔兄有一千萬,然後假設上司有千五萬,我覺得呢個假設太過理所當然了。

    上司人工較高係正常,但儲蓄能力或理財能力卻不一定比下屬高。

    回覆刪除
    回覆
    1. //假設上司有千五萬,我覺得呢個假設太過理所當然了。

      我呢個假設擺明係屈甚至係humilate佢喇!佢又介意我用靚嘢,但係見某汽車品牌客,就要問人借相同牌子嘅車,以示「同路人」喎!門面嘢擦鞋嘢做到咁出面,醜唔醜怪?佢鍾意比較,我咪同佢「比較」下囉。

      //儲蓄能力或理財能力卻不一定比下屬高。

      所以對錢我係平常心,只係用來做「防衛機制」。即使在之前的舊公司都一樣,上司要玩錢我就大返地佢轉頭(例如《兩枝金筆》),你要管我就不能單靠職位。上司只係公司賦予的identify,出了office就不值一文(所以黃C上司只會日做夜做?);你要令別人服你,最緊要的還是見識、學問、氣度、胸襟、品德等等。

      刪除
    2. 現今世代仍不少呢類以職位欺壓下缐既人。其實放咗工,大家都係平凡人。

      刪除
    3. //其實放咗工,大家都係平凡人。

      其實傷民更需要學習點樣去做一個 leader, 無論係中層領導抑或係企業家都係. 不過坊間太多開班大師, 望之叫人卻步.

      刪除
    4. //所以對錢我係平常心,只係用來做「防衛機制」。

      我就鐘意呢個term多過"財自"--防衛衰上司衰公司,防衛意外需要,無聊苦悶。

      刪除
  3. Congrats Mr. Magician! So would you now consider leveraging somehow?

    //之後無耐魔術師份身家仲衝破咗1,000萬(平常心,唔需要大鑼大鼓 update 自己 profile的)...//

    呢句令人聯想到某位出咗書嘅blogger 有個post 講3333 升到有人net worth 過10m⋯

    //在2019年10月時流勳資產要超過800萬(只計「衝線」那一刻)//

    I think 流動資產 in this context could mean either liquid assets or current assets as they should be basically the same for individuals? Wish you will reach this well ahead of your time frame :)


    Best,
    William

    回覆刪除
    回覆
    1. //leveraging

      暫時未有呢個需要住.

      //有個post 講3333 升到有人net worth 過10m⋯

      條條大路通羅馬, 只要唔係吹水(或不盡不實), 我對佢用乜嘢投資工具達到1000萬又真係無乜comment.

      //liquid assets or current assets

      係, 係指 liquid asset/liquid asset, 兩者同義. 我並無任何孖展槓桿, 條數唔會忽然作大的.

      不過, 諗諗下, 可以present 返 Net current asset 條數出嚟:

      Net current asset = total current asset - total current liabilities

      Total current liabilities 主要係12個月內的按揭還款與及清還卡數分期套現.

      實際plan容後10月再公布.

      刪除
  4. 看過一套由美國人製作, 當年和馬雲一起打天下的CFO口述的短片, 很詳細的講到馬先生的創業經過...正如魔術師說的, 這些人[根本就不是「一般人」].

    謝謝魔術師提供的網址 , 可惜蝦餃大叔停寫了, 希望那個[決定] 只是[暫時性] 的.
    也順便多謝摩先生提供的這篇文章 , 令人眼界大開, 河之北的風景果然不同.....
    roger

    回覆刪除
    回覆
    1. 蝦餃大叔應該暫時唔會出山了.

      我呢邊唔係財blog, 極少加油文/留言的, 所以討論會有返些少質素吧.

      刪除
    2. http://hargawswiss.mysinablog.com/

      佢以前都係我個blog的常客, 雖然有啲觀點我唔係咁認同佢, 但大致上佢講嘢亦有非常獨到的觀點.

      自從蝦老兄去咗瑞士之後, 我都有為佢開咗個蝦餃家書系列...

      刪除
    3. //也順便多謝摩先生提供的這篇文章

      呢篇嘢其實我都唔完全認同,但佢講"財自教練"的三點特性真係好應。

      我最討厭有次乜Sir反駁人地質疑佢教人啲做法時,佢發晦氣話"你咁叻就做美食車做到財自"(大意)...我覺得非常無賴。美食車固然一睇就知個biz model唔work,但睇佢意思是"乜生意都只會流於美食車,只有收租仔才是正道",這是非常混淆視聽和強詞奪理的說法,要知道,閣下做既嘢完全是在現存價值上"尋租",是完全無為社會提供價值的。

      傷港好多文都有質疑這班友,但好多都不痛不癢,反而呢篇蝗文既三點就一擊即中,而作者立場並不抗拒財富...真係唔知邊樹先係國際金融中心。

      上面仲有好多文的關於根治拖延症,善用時間(尤其放工後),選擇交際圈,甚至講述上網打卡/睇人打卡如何無謂...呢類題材在傷港都比較少見的。

      反過來近年傷港啲文既題材,不論要財自定扮清高的,好多都鼓吹"勤奮有罪""講效率就是有機心""選擇性交際就是扮清高/不近人情"呢類反智思想。

      刪除
    4. //1,这群人否定汗水,否定努力和勤奋,反之鼓吹自己的高级方法论,只要199,就可以轻松躺挣。
      //2,这群人对金融市场没有基本认知,对金钱和事业缺乏基本尊重,狂妄自大到认为可以轻轻松松就做好事业,可以投资成功
      //3,这群人无视风险,完全没有风险概念,鼓吹无脑投资和购买。
      //近年傷港啲文既題材,不論要財自定扮清高的,好多都鼓吹"勤奮有罪""講效率就是有機心""選擇性交際就是扮清高/不近人情"呢類反智思想。

      其實乜sir將以上三點發揚光大,係有個最基本的前設:「我是庸才。」

      先不論那些信箱來郵是真是假,但傷港社會的確係有唔少呢一類人:佢地多數係公墓園、或教書、或某一些專業人士。佢地人到中年,有一千幾百萬唔出奇,但係佢地就淨係「識檯頭嘅嘢」;其餘世界政經科技文史地等等,乜都唔識,所以會覺得自己係「庸才」,只係靠因緣際會(即係好似阿米咁)先有嗰一千幾百萬身家;甚至乎,佢地嘅內心深處,會認為自己係 not deserved to have such quality of life.

      佢地之所以尋求乜sir教路,就係自覺自己除了「無為社會提供價值的尋租行為」之外,其他乜都做唔來。所以乜sir話間劏房收多啲租,學員稍有遲疑,佢就會話「最多就係釘契,層樓唔賣得出去,但租照收」,「你唔劏,呢個世界仲有大把人劏」,「要在香港社會生存,就要咁做」...

      可以咁講,乜sir的學員們並不是「狂妄自大」,而係承認自已「对金融市场没有基本认知」,只懂得「无脑投资」,基本上就是一皇「判pair」的性格,故此乜sir鼓吹的「轻松躺挣」就是他們的出路,而不是美食車或美食固定攤檔或小LLC流動小販般要靠自己落手落腳的生意。

      刪除
    5. 前幾年8號仔私有化,睇到新聞有個年老小股東話:如果佢私有化咗,咁我仲點收息啊?

      真系黐9線。世上大把股票息率好過8仔,基本因素又穩陣過8仔;中電港燈點都穩陣過佢啦?何況你咁多年坐8號艇都頂得住咯...

      就算財力上可以財自,都從來無“躺掙”的,捍衛財產一定不能淨係「識檯頭嘅嘢」...講得出咁嘢,斷估都系魔兄所講的「我是庸才。」多年刻板思想,連思想上的範式轉移都唔識了。

      我成日都記住呢個例子,提醒自己唔可以成為呢種人。

      刪除
    6. //世上大把股票息率好過8仔,基本因素又穩陣過8仔;中電港燈點都穩陣過佢啦?何況你咁多年坐8號艇都頂得住咯...

      呢位阿伯應該患咗腦退化.

      //講得出咁嘢,斷估都系魔兄所講的「我是庸才。」多年刻板思想,連思想上的範式轉移都唔識了。

      你咪話, 我前前公司(即係妹頭組的舊 teammate), 都曾經話過「穩賺1厘息唔係咁易」...

      刪除
  5. 魔術師好似識變錢咁XD

    請問魔術兄今年貴庚?

    回覆刪除
    回覆
    1. //魔術師好似識變錢咁XD

      邊係呢? 呢個係錯覺, 主要原因我係無成日 update 自己profile.

      //今年貴庚?

      我係70後... :)

      刪除
    2. 7頭定7尾XD

      我80後,都好想可以係40前財自,呼吸下自由既空氣~

      刪除
    3. 我入得鄉大暫取生, 梗係70頭喇!

      刪除
    4. 總之我細過魔兄...兩年咁大把 XD

      刪除
    5. //我入得鄉大暫取生, 梗係70頭喇!

      魔術師原來咁後生...XD
      七十頭應該冇麵條派了, 因為某大國在安南深陷泥淵....

      同是[備取生] , 我想起呢度位老華僑嗰大仔, 一樣係當年鄉大的[暫取生], 讀完去咗花旗進修, 跟住買埋樓, 然後科網爆煲 , 跟住回流...

      當年佢老豆放低佢俾叔伯照顧去咗山卡拉, 好彩佢冇變壞, 可能多得當年的[鄉大]...多人才好環境好師資 , 思想清純.

      我都好希望佢係魔術師 , 不過當年佢屋企在葵涌...論年紀 , 佢可能是[師兄] , 姓鄧的.
      roger

      刪除
    6. //魔術師原來咁後生...XD

      過咗40,會被某些blogger笑係阿伯的了。

      //好彩佢冇變壞, 可能多得當年的[鄉大]...多人才好環境好師資 , 思想清純.

      鄉大出品,係「純」(或鈍)一啲的。

      //佢可能是[師兄] , 姓鄧的.

      哈哈,我不是姓鄧。

      刪除
  6. Sorry離題,不過見到黃凱芹就忍唔住

    https://www.hk01.com/%E9%9F%B3%E6%A8%82/97141/%E9%BB%83%E5%87%B1%E8%8A%B9%E6%90%AD%E9%A3%9B%E6%A9%9F%E4%B8%BB%E5%8B%95-%E8%A6%81%E6%B1%82-%E5%94%94%E5%BD%B1%E7%9B%B8%E5%94%94%E7%B0%BD%E5%90%8D-90%E5%BE%8C%E7%A9%BA%E5%A7%90%E9%8C%AF%E6%84%95-%E4%BD%A2%E4%B9%9C%E6%B0%B4-

    回覆刪除
    回覆
    1. //同為80年代紅極一時,唱過《餘情未了》,《總有你鼓勵》等金曲的歌手李國祥,對於年輕人不認識資深歌手覺得沒有大不了,他透過經理人回覆:「沒有特別回應,因為有時前輩歌手也不認識後輩歌手;相反,新人不認識前輩歌手也沒有大不了。」//

      咁我又真係唔多識依家班倒模一樣的年輕歌手喎!

      刪除
    2. 黃凱芹就算80年代,知名度都係中上而已; 當年就算校長唔攞獎,哥哥首次退役,甚至連埋女嗰便慧嫻出走,理論上有個真空期,但到草蜢許志安都未到佢上位啵。而且佢咁早淡出,無人識都唔奇...又唔見而家無人識同期出道既李克勤?

      如果«傾心»真係佢手寫佢心,佢就有啲似陳百強...天生有啲自矜自傷,對形象同發揮會有局限。做藝人尤其年輕時靠啲樣的,點都要有啲爆炸力同自信,例如哥哥初出道無乜名氣時都敢掟帽落舞台,更緊要是台下無觀眾要仲要掟返上去都無損其自信心。

      講真我只係鍾意佢«傷感的戀人»而已。

      刪除
    3. //又唔見而家無人識同期出道既李克勤?

      早十年八年, 李克勤成日痴埋校長度; 仲耐啲以前有同CCTVB拍「叻人新世紀」, 又講波又聖...總之佢夠世畀仔,唔唱都可以keep住有在我城一定出鏡率(反而唱歌就去了蝗國), 同一早移民的文青芹唔同.

      //天生有啲自矜自傷,對形象同發揮會有局限。

      佢都係鄉大出身, 仲要係讀新亞, 比較文青唔出奇.

      刪除
    4. //...文青芹...

      當年雖身處海外, 但都好似聽過呢 d 名, 有位仲好似出哂位, 講過一些非常[難以理解]的說話 , 唔知係呢一棵[芹菜] ?定係某位 sunny 哥哥?.....

      刪除
    5. 「一剎那的光輝不代表永恆」,真係無人可以爆得過呢位芹菜。

      Sunny 哥哥應該是「跳飛機」的那位主持?

      刪除
  7. 不好意思, 小弟之前更新可能錯手delete了您的link, 現已加回, 希望你不要介意, 如有令你不悅, 請多多包涵

    回覆刪除