風水實習：尖沙咀南洋中心低層辦公室

南洋中心於１９８２年落成，是為六運樓（六運：１９６４—１９８３，七運：１９８４—２００３，八運：２００４—２０２３，九運：２０２４—２０４３），早已過氣，當年大富豪聲色犬馬之光景亦不復見。業主為收租佬，間鋪風水本來唔會影響到自己，但畢竟如果巒頭理氣唔就，租客亦做唔長久，始終都會影響到自己現金流。
雖然商場四通八達，周圍都有門，不過只要以陽為向，就可斷定望向百周年紀念花園的大門口是正門。在商場遊走一周，只見有前方公園正中有變電站（左上）、後方科學館廣場停車處有反弓煞（右上）、迎麼地道有形如簾刀的天橋（左下），天橋樓梯底下滿是垃圾堆積（右下），對低層租戶尤其不吉：

麼地道近南洋中心行車線朝南洋中心而來（上），屬吉，可惜車流稀少；百周年紀念花園水池有活水，如租戶見之有利財運（下）：

實地以羅盤量度為２２３度，跟書本地圖接近，是為艮山坤向盤；再以排龍訣定吉凶，若以麼地道為水口（紅圈），則以子山為來龍，南洋中心面向坤位，排得右弼龍，屬吉：

上到辦公室單位，只見大門直沖lobby再沖埋對面office，是為槍煞，要造個玄關擋一擋佢：

在室內遊走一圈，一面的玻璃窗可見麼地道，果然車流甚少，仲有天橋電梯（６８９的德政！）的尖角沖射，睇怕某幾扇窗都要長期落簾（上）；轉個圈到露台，對面大廈不停有反弓煞射住自己，真係唔係好掂（下）：

單位門口剛好與大廈門口相對，南洋中心為艮山坤向，故辦公室則為坤山艮向，以六運飛星掛盤，得出以下飛星圖：

將單位斬開成三個長方形，各自找出中心點，再估算全屋中心點，便可以找到大門方位：

單位呈蟹鉗狀的凹字形，利女性；東方（Ａ）缺角，屬震卦主長男，不利男性。大門位於丙位，看飛星圖為向星５山星８運星一。山管人丁水管財，大門向星動了災星五黃，財運不吉；八主少男，六運樓早已退氣，亦為五黃所剋。
睇嚟呢個單位只係適宜做女人生意，而且單位主災病，諗來諗去都只能夠做醫學美容（！），至於做唔做得起，就真係天曉得，畢竟先天環境唔係咁遙就也。
跟老師睇完風水，信步行去紅磡站住西鐵返屯門，點知係半路竟然見到深井樓盤的電單車位竟然貼到嚟尖東：

２２萬！仲要係電單車位！即係搵油漆在地上畫個格仔就可以圈到２２萬出嚟！
魔術師可以好肯定唔揸車的決定是正確的。
＊＊＊
參考資料：
仲量聯行：南洋中心第一座
仲量聯行：南洋中心第二座
２０１８香港大地圖　萬里機構出版　２０１７年７月第一次印刷