2017年11月15日 星期三

樓奴命生成

年輕夫婦朋友多聚會多,最鍾意大宴親朋...抑或係想話俾人知,自己間屋有700呎,唔係納米樓,樓價同裝修費要成千萬,順便哂吓條樓奴命(36:00—47:02)?
樓盤傳真 2017/10/28 23:11

發展商共同動作:加價及招標限量推出特色單位,務求價高者得創新高,另分析鰂魚涌君豪峰收票欠佳原因,豪宅市道率先超前大市表現。
鴨脷洲豪宅南灣,入伙7年,向海單位玻璃幕牆開窗問題有望解決,能否趁豪宅市道向好,幫助低水樓價再衝上?
華懋九龍塘義德道雲門,位列九龍地王榜第三位,15年開售,尚有四成貨尾。平均呎價超過35000元,豪宅身價,可惜裝置平實。
夫婦好客,經常大宴親朋,購入700呎都會駅單位,拆去客房、廚房改開放式,將客飯廳空間倍增。
窗外望出去都幾開揚,是本單位優點之一,本來最好就係設計成悠閒感覺,但依家卻又要玩開放式廚房,無端端將啲碗碟爐具放出廳。衛生一個搞不好,隨時仲有小強進駐滿廳走。乜依家新一袋潮夫潮婦真係咁鍾意叫朋友上嚟屋企坐,又咁鍾意煮食?又話依家個個小家庭都係無飯夫婦嘅?

原來的儲物房門向外外,阻室玄關,同時又無位放鞋櫃(左上);設計師將儲物房門改趟門,客廁浴缸改企缸,偷位造鞋櫃(右上)。鞋櫃中間留空,但塊鏡又唔係全身鏡,唔能夠俾屋主外出前照一照(左中、右中)。客廁門用暗門設計,幾乎睇唔到(左下),打開之下,得個非常簡約的鏡櫃、洗手盤和馬桶,無乜嘢睇(右下):

設計師將原本的廚房牆拆去,改為開放式(左上、右上),中島伸延出一張唔係好大的飯檯,都唔知點樣「大宴親朋法」(左中)。爐頭係電磁爐,俾魔術師都或者夠用(雖則魔術師屋企係用明火),但如果係「煮食」嘅,就肯定會嫌唔夠鑊氣;廚房又得半扇窗,通風肯定不足(右中)。成個廳都係假天花同盒仔燈,設計師為免油煙反攻入屋,便裝置了遙控電簾以圖阻隔,但吊吊揈咁又遮唔到地,都唔知會有乜嘢效用(左下、右下):

設計師又將細房2拆去,當成係偏廳;又將主人房門移前,跟廳並排,消除走廊;改細房1門面向偏廳;最後拆去細房1與主人房之間的牆,偷位以衣櫃分隔(左上、右上)。客廳電視牆只有矮櫃,無預留地方放影音器材;掛電視的牆板加滲燈,似乎亦唔預將來買部大啲嘅電視(左中)。梳化背後升高一格做偏廳,擺啲枱椅可以打麻將玩啤牌開賭;梯級有滲燈以防PK,地台亦是儲物空間(右中)。直條子牆壁又係以暗門設計,包你夜晚黑無開燈必定睇唔到道門係邊(左下、右下):

細房無甚驚喜,只係要訓窗台,同埋又整個假天花自整橫樑壓頂(左上)。入到主人房,又係升高地台增加儲物空間(右上)。套廁在主人床頭背後,設計師將牆壁拆去,又改成玻璃設計!馬桶對住床頭,如果戶主出恭時聽見國歌,唔想俾人知道自己無企起身的話,又可以用電簾遮一遮(左下、右下)。問題係電簾在廁所牆外,房中人是可以掀高張籲,「你要看始終看得清」:

睇勻全屋,是是旦旦咁就70萬,the weakest links 就係廚房同套廁的電簾,壞咗都唔知點算!


10 則留言:

  1. 空聊聊。間隔亂七八糟,都唔知做乜。

    回覆刪除
    回覆
    1. 做塞耐設計師其實都幾好搵,係謮唔成書的同學另一個好選擇。

      刪除
    2. 簡直係暴利
      小子係咁二問下個GIC, 600幾呎話要收90萬. 都痴左綫的, 自己落手搞40萬埋單
      真心唔知佢地有咩做過, 係D人懶HIGH TECH整埋D無謂野
      錢多駛唔哂等D人幫你駛咁解

      刪除
    3. //錢多駛唔哂等D人幫你駛咁解

      咁有啲人又係要洗埋啲無謂錢來促進我城經濟的.

      刪除
  2. //但塊鏡又唔係全身鏡,唔能夠俾屋主外出前照一照

    屋主喺唔喺侏儒嚟,咁低嘅鏡,用嚟照嗰肚腩?

    //中島伸延出一張唔係好大的飯檯,都唔知點樣「大宴親朋法」(左中)。

    坐得嗰四嗰人,原本嗰廚房都夠用㗎啦,除非日日都法國大餐...

    //設計師為免油煙反攻入屋,便裝置了遙控電簾以圖阻隔

    無啦啦又要清潔呢嗰簾!整走嗰牆又攪嗰簾,同鎢絲SIR有得揮。

    //梳化背後升高一格做偏廳,擺啲枱椅可以打麻將玩啤牌開賭

    亦可以4P就地正法

    //套廁在主人床頭背後

    真喺唔明點解張床要咁擺,喺廁所放個屁都聽到。唔喺黑廁都攪玻璃,新一袋潮夫潮婦興睇人屙C屙尿當前戲?

    //睇勻全屋,是是旦旦咁就70萬

    又假天花又地臺,上上落落,又差唔多所有牆都拆晒,算喺"平"喇。

    回覆刪除
    回覆
    1. //屋主喺唔喺侏儒嚟,咁低嘅鏡,用嚟照嗰肚腩?

      其實嗰個位應該係用嚟放飾物,塊鏡應該只作裝飾用。

      //坐得嗰四嗰人,原本嗰廚房都夠用㗎啦

      「大宴親朋」就係落街食,或者叫 pizza 外賣 XD

      //無啦啦又要清潔呢嗰簾!整走嗰牆又攪嗰簾,同鎢絲SIR有得揮。

      如果戶主真係「喜歡煮食」,油煙必不可少,塊電簾肯定會俾啲油煙漿住,好易壞。

      //亦可以4P就地正法

      畫公仔不用畫出條腸仔 XD

      //唔喺黑廁都攪玻璃,新一袋潮夫潮婦興睇人屙C屙尿當前戲?

      可能真係天下設計一大抄,無諗過是否有 bug...

      //唔多所有牆都拆晒,算喺"平"喇。

      咁又係。

      刪除
  3. 門口鞋櫃個鏡位係用嚟入屋放手袋 back pack同出門口要拎 D無謂嘢的。塊鏡好似係standard config,我用過兩間完全唔同的公司都係咁交俾我,因為你話佢知係鞋櫃。

    回覆刪除
    回覆
    1. 所以記者妹話「塊鏡可以用來俾戶主出門前照一照」,我真係打個突.

      刪除
  4. 其實入牆鞋櫃可以做store room 果邊,個客廁根本就唔洗郁,錢多就是任性。

    呢個世界有semi-open kitchen,反正都係拆牆,加兩塊玻璃咪可以間個廚房出黎,好過兩塊電簾。

    偏廳打麻雀都嫌細,俾我就打通兩個細房變主人房。

    暗門設計令我諗起紙皮 (瓦通紙)。

    //套廁在主人床頭背後,設計師將牆壁拆去,又改成玻璃設計!//
    不如做埋趟玻璃門,沖完涼可以直接跳上床。

    回覆刪除
    回覆
    1. //加兩塊玻璃咪可以間個廚房出黎,好過兩塊電簾。

      電簾設計應該係用咗可以將個 island 跟吧枱(?)連繫.

      //俾我就打通兩個細房變主人房。

      三房變一房仲好.

      //暗門設計令我諗起紙皮 (瓦通紙)。

      係呀!!

      //不如做埋趟玻璃門,沖完涼可以直接跳上床。

      咁咪好似馬戲班老虎跳火圈咁?

      刪除