《慈雲山十三太保（Those Were the Days...）》：昔日童黨，今日有青

客席主持暨港產片之王摩摩曾經提過話黃百鳴啲戲以說教為主，就連葉問都被寫成成浸八股佬味，今日睇返黃氏的舊作，果然係３０年不變：

＊＊＊
想當年，在慈雲山邨這個我城最大的公共屋邨，有十幾名青少年童黨，自稱「十三太保」，當中包括首領茅躉華（巫啟賢飾）、高飛（陳豪飾）、錢甖（陳國邦飾）、與及喪牛、貓仔等。「十三太保」由於看不見未來、也沒有什麼好輸，所以打交爭地盤特別狠辣，藉此找到人生的意義。經過連番械鬥之後，就連阿公也「主持公道」，將慈雲山交由阿華打理。男人不壞，女人不學，茅躉華身邊當然也要有件超索私家天使𡃁妹（萬綺雯飾）作伴：

當年的童黨，除了牙齒較好，會得咬蔗之外，他們的搵食技倆：四大頭（字頭、嘴頭、拳頭、走頭）與及文理科（聲大口臭、橫蠻無理），竟然跟現時崇尚 Be water，快閃搗亂、滿嘴歪理的黃Ｃ、黑衣兵團一樣。茅躉華雖然也跟今日的有青一樣，與家庭不和，唔返屋企訓，但阿華與今日有青的最大分別是佢都頗為孝順，搵到錢會孝敬阿媽（馮素波飾）、與及弟妹；而且阿華都頗為害怕老父（鄭則士飾）。在那個父母尚能保持威嚴，唔需要跟子女扮 friend 的年代，阿華也不敢直認自己加入了黑社會，只是委婉地說自己是「反政府義士」：

以往入黑社會好似好威，有阿公照，又不用怕被私了；但就算係好似茅躉華這些小頭目，手錶頸鍊都要預咗隨時要被阿公「徵用」，又要幫阿公埋單找Ｇ數。現在時代進步，在無大台的情況下，加入黃Ｃ、黑衣兵團最多都係炒吓抗爭幣，捐吓錢俾慘無人道基金幫手足，透明度高得多，當然就更容易吸引青少年加入：

受黑警包庇的大林來慈雲山開檔，阿華率眾劈友，結果手足志強被黑警拘捕（「犧牲」、「死了」），志強以後也沒有再出來行（「被消失」）：

𡃁妹父親開大排檔，也很想知道阿華等人為什麼好似無家可歸似的。𡃁妹也覺得阿華應該找點正當事做，但阿華只是看不到未來，只知道打打殺殺。這晚阿華又去找大林開戰，途中墥見父親，搞到華父返到屋企成晚都訓唔着。阿華就連坐在大排檔乾等的𡃁妹都唔理，只顧化身火魔法師跟大林開拖。混戰間高飛的弟弟狗仔失足摔死了（！），眾人竟然因為搞出人命而逃走（敢放火魔法，又敢拎刀去劈友但驚搞出人命！？）。高飛媽將高飛逐出家門：

阿華這群不良青少年不懂得面對死亡。由於當時沒有拉燈網、沒有圍爐取暖、沒有黃色經濟圈、沒有慘無人道援助基金、更沒有人鼓勵可以從裝修鶳中獲得快感、與及朋輩的認同，被家庭放棄的高飛便以白粉針來麻醉自己。阿華本來不同意高飛做這等傻事，點知轉過頭自己都變埋道友：

大林俾阿華一幫人打，黑警魔鬼蕭是大林的老大，自然要為自己的門生出頭。在那個「PoPo 就是要玩死古惑仔」的年代，魔鬼蕭也不用出示委任證，便帶同手下踢了阿華的白粉檔，揸了阿華的春袋（性暴力？），也不見他出示法庭手令便到阿華家中「搜查」，要阿華當着父親面前除褲做鴨仔跳（魔鬼蕭都算有良心，不用阿華好似痴瘋仔那樣全裸兼眼要向上望）；眾街坊看了，卻也習以為常似的，沒有大叫「警暴、濫捕、黑警死全家」：

阿華、高飛、和貓仔都成為道友，喪牛和錢甖和另外一名去考會考的四眼仔手下（元祖暴大生？）就不是同路人。𡃁妹不忍愛人成為道友，將阿華手中的白粉針搶去要打入自己手臂。阿華連忙制止，還跟𡃁妹大吵一場，真是不解溫柔：

華父有感父母與及龍獅政權都幫唔到個仔，於是諗住送阿華到老美，點知阿華話自己有案底，拿不到良民證，真係激到老豆Ｏ哂嘴。另一方面，由於阿華、高飛同貓仔都係道友，手軟腳軟，風光不再，淪落到要賣假酒。阿華見錢甖再跟住自都無前途，唯有叫他退出：

有個以前江湖道上的敵人受𡃁妹所託，來勸阿華和高飛去福音戒毒，二人當然當係耳邊風。𡃁妹將阿華關在密室要他戒毒，依然不得要領。阿華破門而出，才知道𡃁妹父親要移民呆灣，𡃁妹唔想做呆妹，所以要幫阿華重新做人，給自己找個理由留下來。奈何，就算是𡃁妹號求，阿華亦無信心能戒掉毒癮：

華父病重，臨終前只怪自己無用，賺唔到錢，唔能夠做怪獸嘉獎，「把最好的給子女」。現在華父再也幫不到阿仔，最後的心願就只是希望阿華能生性做人而已：

阿華想要戒毒，將白粉針都掉進垃圾桶，又咬手又食煙，但都無幫助，抗拒唔到毒癮，在屋邨球場典來典去，最後都要去從垃圾桶找回白粉針。𡃁妹知道華父過身趕來，想不到阿華連死咗老豆都要吸毒，真係爹親娠親不及白粉親，又見到阿華連打火都打唔着，心死之下不如幫阿華點火，並告知明天便要去呆灣做呆妹。阿華大受打擊，只覺自己只是一個廢人，只有接受戒毒，才可以「返轉頭」：

Ｎ年後，阿華變成一位「不會放棄年青人」的傳道人，又找咗「真・十大有青獎」。阿華在得獎台上發表感人宣言，更成為「大台」為所有行錯路的手足領獎。昔日手足高飛、錢甖、喪牛、貓仔等都來道賀，少不了的就是媽媽、眾兄弟妹、和變了中女的𡃁妹喇！

＊＊＊
有時睇返舊片，真係完全能夠感受到時代變遷。莫講話現在毒品界已經唔興「食白粉」呢類「有機毒品」而轉為吸冰毒等化學物質；現在有青就連毒都唔使吸，只要在社交平台上圍爐取暖，接受「巷式聞煮豉油」這些「精神毒品」。其實在人物介紹時，曾經講過貓仔唔識英文，但都照學貓王唱歌，其理念就係其實發音唔準唔緊要，最緊要扮相似就得；現在道理都是一樣，只要和理非扮吓支持和理解，「有事梗係屌咗政府先」，「精人出口笨人出手」，有青們便可以裝修工、鶳神獸上身，此等文宣認真廉價兼低成本。
對比黑警，當年奉旨玩殘古惑仔，好不威風，殊不知數十年後，暴徒只需躲進人群，讓 PoPo 誤傷市民，自然有街坊出來指罵黑警，大呼「警暴、濫捕、黑警死全家」。十年河東，十年河西，對比之下足見民智已開，不勝唏噓。
本片睇返後生時的陳豪與陳國邦都幾有趣。情節雖然說教，但淨係睇萬二蚊已經值回票價。阿華真係難明，最難消受美人恩，如果有個好似𡃁妹咁索的囡囡跟魔術師講「我不理你還有誰理你呢？」，「你死咗咁我點呀？」，魔術師早就溶化了，仲邊得明笑這些對白太老土呢？（逃）
魔術師評分：（電影本身）８０＋（萬二蚊）１０＝９０分
Live Band 版的主題曲《只因你傷心》，值得一聽再聽：

尤其是鋼琴兼指揮的金髮妹，真係型；仲有臉圓圓的小提琴妹都好可愛！

（網上圖片）