年尾合約終結時

「有個壞消息講俾你聽...」某天，包青天上司趁魔術師遲放工，公司無乜人，便拍拍魔術師膊頭捉入房講嘢。
「即係呢...雖然米婆 Ｍ 已經批準了你的加薪的要求，但總壇米腸Ｊ唔制，所以你今年又無人工加喇...」包青天上司似乎想做好期望管理，無端端拉埋同事Ｌ嚟講，「阿同事Ｌ就唔同，佢由艇仔僱傭兵變做公司私家僱傭兵，係要有啲 alignment 嘅，佢原先的人工都比你低...」
魔術師暗自好笑：「你都知道我早就財務自由，打份工都只係唔想咁早浪費了自己的戰鬥力，又同時賺返啲而已。我返工主要唔係求財，又唔係求氣，只係想幫到其他同事，大家返工返得開心就夠。Ｌ佢先３０幾，又要娶老婆，加多啲人工俾佢無所謂喇！」
正當包青天上司紓一口氣之時，魔術師都改一改口風：「不過呢，上次『險簽』（見《險簽魔術師？》）完之後，仲擺埋啲咁嘅姿態，真係好無誠意。我今年都已經係捱義氣好俾面你咁做落去，而家米國班友愈來愈食塞米，嘢就我地做哂，要我好開心咁簽新約，又真係好難喎。」

工作量大增的原因，其實係因為總部的 project 頭子米腸Ｊ年年都向膠層誇下海口，話會有乜有物 deliver 到，但最後都只係流於吹水階段，而成個 project 就只有包青天上司呢個我城 team 做到嘢，於是年尾便叫包青天組連環 kick start N 個項目，等米腸Ｊ張成績表好睇啲：啲 projects 未 delivery 到，起碼都叫 in progress，而唔係 not yet started。
而魔術師當然就最討厭呢類為他人作嫁衣裳的工資奴任務。
包青天上司都知道魔術師性格，只好出軟功：「咁我都明白，班米腸真係完全幫唔落嘅。你又已經財務自由，根本唔需要受佢地氣。不過，依家經濟環境唔係咁好，出去出面亦未必有咁好 paid。你都可以簽住先再搵囉！」包青天上司講講吓，講到七情上面，想勾起魔術師的同理心：「即係好似我咁，我都預今年無人工加，不過出去出面又肯定搵唔返依家咁嘅人工，我又唔係好似你咁財務自由，我仲有一件讀緊中學、一件讀緊大學呀！」
其實因為舊年無人工加，我城部門已經走咗唔少人，如果因為經濟氣候而 freeze headcount，包青天上司又失去埋魔術師呢位戰鬥力強橫的主將的話，在工作量有增無減的情況下，都勿話唔慘情。
魔術師心念一動，記得昔年在美顏組時，因為都入組做咗好幾年，工作性質都變咗好幾次，當年由妹頭組帶入去的 job title 亦早已不能反映魔術師的實際職能。魔術師曾向美顏上司反映此事，得出的回覆卻是十分 hea：「我地部門唔睇呢啲嘢（job title）嘅！」結果，當魔術師在數年前被公司分手，要再去找工作的時候，其他公司就真係會睇「呢啲嘢」，見魔術師的 job title 與 CV 所寫的不符，都會提出質疑的。
想到此處，魔術師便向包青天上司提出：「嗱，要我簽約都得。年初總壇因為人事變動，將我個 job title 改咗。你叫米婆Ｍ改返正我個 job title 就得，反正又唔使錢，份約又可以反映返 HR record 裡的 job title 就得。」
包青天上司頓時放大心頭大石，大點其頭：「無問題。依家你個 job title 好過份舊約好多，拎出去人地都知你做緊乜，之前個 title 真係我地公司自己先明。」
數天後，包青天上司通知魔術師米婆Ｍ與及總部都同意新合約結魔術師「正名」。點知...
當魔術師收到新合約，一睇之下，真係激死，job title 無變，反而合約期之係半年。
魔術師連忙走去問包青天上司。
包青天上司都打個突，佢都以為係簽一年；後來再問返米婆Ｍ，原來繐部要求所有僱傭兵都係半年半年咁簽。
魔術師只感到啼笑皆非，跟包青天上司吐糟：「乜米腸Ｊ以為半年都可做得完佢踢着的咁多個火頭咩？」
自己 job title 自己管，靠米婆Ｍ同艇仔公司搞份約就真係死得。於是魔術師親自出 email coordinate，問明艇仔公司要改將 job title 改成乜乜乜，再串連好米婆Ｍ 出電郵批准，如此便成事了。
至於 LinkedIn 或其他網上平台，魔術師亦當然會 update 返自己的 profile，話係 open to job opportunities 的。一面睇吓有無其他機會（咁講法簽半年反而無咁困身），一面將工資袋住先（雖然面試時會比較麻煩），同時可以搞下投資組合，準備定食息過活的日子（？）。
＊＊＊
伸延閱讀：
險簽魔術師？