飲食業值得保就業？

以我城普及版日式網燒來說，牛角都應該算是大眾之選。尤其是在疫情最猛期間，特衰政府禁止晚市堂食，好多日韓燒都耍被逼關門，牛角竟然就連燒肉都有外賣，甚有創意：

之後為求生意，又試過送現金卷，

就連「攻擊性武器」都送埋：

之後正苦專家組（袁過勇?）話要設上菜組與執枱組，減少感染機會，牛角又照跟，實在誠意可嘉。

但唔知係咪，最近疫情緩，傷民報復性晚膳，生意好咗就「囂」了起來，搞到日前魔術師又到牛角來個單人網燒時竟然遇上少有的不愉快事件。

首先，魔術師入到座，帶位姐姐竟然無叫同事開茶，可能生意真係太好，招呼有點不周。

第二，唔知係咪魔術師被安排到死角位，手機訊號唔係太夠，但點菜卻要用手機落單，搞到 load 好耐都 load 唔到有點不便。幸好魔術師識得自行在手機 search network 找到牛角店內的公用 WIFI，接收方能回覆正常。其實在桌面或開枱單據上寫明 WIFI ID 就會更方便客人了。

第三，魔術師食一個人食自然唔會食放題，而係單點餐。這天便點了個＄２９的昆布湯：

但「上菜有青」送來的卻是午市定食 size 的昆布湯（匆忙之間忘了拍照留念）：

（圖片來源:牛角午市定食餐牌, retrieved on 17 Nov 2020）

當魔術師Ｏ了嘴，還未反應過來的時候，「上菜有青」已急急腳跑掉。魔術師唯有等另一名「上菜有青」替鄰桌上完菜便問：「唔該，點解我點個昆布湯係咁細碗嘅？我以前點的是大碗架喎！」

「上菜有青乙」呆了一秒，便冷靜地回應：「哦！應該係轉咗。」

魔術師見佢答得咁 hea，當然唔信：「Really？」

「上菜有青乙」可能是怕了被魔術師捉了來問，便又急急腳跑掉。

魔術師沒好氣，便在手單 menu 上按「查詢」。

不久，一名「執檯專員」的中年女人走來問：「有乜可以幫到你呢？」

魔術師唔係太識欣賞呢類「How can I help you？」的直譯，不過都算啦，便指單手單 menu 上的照片：「我叫咗個昆布湯，應該係大碗架喎，而家嚟咗碗細嘅。」

「執檯專員」竟然話：「昆布湯都咁嘅碗...」

魔術師開始有點生氣，呢碗係「昆布湯」唔你「昆客劏」，便指着個細碗再問：「你覺得咁細個碗你地會收２９蚊？」

「執檯專員」可能都開始覺得「過唔到自己嗰關」，便走去叫經理。

經理來了，一看便知錯，說會給魔術師換回正常的 size：「唔好意思，佢地搞錯咗單點同放題。」

原來單點＄２９係大碗，放題任食當然是細碗的。

魔術師實在沒好氣：「問題係你啲同事竟然話係正常，問咗兩次都係咁，只係話『yes, 無問題』。」

唔係怪你上錯菜，而係客人都好聲好氣俾哂提示你做錯嘢，你諗都唔諗便求其 hea 答想耍走個客，點講都講唔過去。

經理陪着笑：「咁你記唔記得係邊位同事答你架？」

這次到魔術師一呆：「算喇！由佢喇！」

一來「上菜有青乙」同埋「執檯專員」都無 QR Code 俾魔術師掃碼認人，二來魔術師亦唔想為了芝麻小事跟人霎氣；係作為消費者，你班伙計服務唔到位，絕對有理由呻幾句啫。

查實疫情以來，飲食業成日話就死就死，講到鬼咁可憐；但一旦生意好轉，班員工卻又故態復萌，客人食嘢好似要求佢地咁。唔怪當飲食業話要保就業時也有聲音話「你賺到笑時又唔會分俾我地」！業界（其實都唔只係飲食業）呢種「一朝得志」的傷民心態真係抵幫。