轉職見聞

天下無不散之筵席，公司個 project 愈做愈縮，budget 愈做愈縮；包青天上司見形勢不對，便叫手下各人謀定後路。本來組內第一個被開刀的是 junior 妹妹仔Ｃ，前幾個月就要約滿，但剛好同事Ｌ搵到位走，由雇傭兵轉職為長工，見佢成親在即又買咗樓，一世做工資奴都無所謂喇！由於人手不夠包青天上司便揮到留返妹妹仔Ｃ，續多幾個月約再坐一會 — 最搞笑的是ＨＲ又食栗米，唔記得 extend 妹妹仔Ｃ的 staff profile，搞到妹妹仔Ｃ一過咗原來合約期便 login 唔到電腦，甚至入唔到門口...

包青天上司個組得返魔術師、妹妹仔Ｃ、同妹妹仔Ｒ；而妹妹仔Ｒ的合約是相當離奇，似乎被某些 recruiters   「水」了去簽雇傭兵合約的「求職陷阱」：情況就係雇傭兵公司唔包有工作俾妹妹仔Ｒ做，雖然係合約期內固定月薪，你搵唔到工係要賠返份糧俾雇傭兵公司的。妹妹仔Ｒ見包青天組命不久矣，但合約期卻仲有好幾個月，於是便落力搵工 — 幸好都在公司第二個部門搵到落腳點，如果唔係真係賣身都唔掂。

包青天上司得返魔術師同妹妹仔Ｃ相依為命，魔術師好頭好尾，就等雇傭兵合約完結自動離職，而妹妹仔Ｃ就遲魔術師幾個月，直至最近也約滿離去。

無錯，魔術師已經「唔使返工」好幾個月，反正又已經搞好轉按，投資組合又重組過加強「被動收入」，於是呢幾個月日日訓到自然醒，佛系搵工與被搵工，有得做就繼續做（賺錢買花戴），搵唔到便退休算了。

又，在妹頭組的 Whatsapp 中講到「提早退休」呢個話題，博士Ｋ呢條「正能量Ｌ」一把年紀竟然仲覺得前路咁「好玩」...不過，都有啲俾博士Ｋ講中，hea 得耐真係有啲悶...

網上求職平台有項功能，就係當用家 update 咗 employment status 之後，就會在 recruiter view 的版面上排上前列；魔術師亦不能倖免，update CV 之後便惹來一群 recruiters，有如聞到血腥味的鯊魚一樣不停問問問

１. 如果係打電話來的而又只係𦧲𦧲脷將自己的名字、agency 公司名稱含混過去的，魔術師一向都會 cut 線無手軟。

２. 不過即使係有名有姓、細細個便聽過個名的 agency，一樣可以靠「水」。其一就係以米式地道英語的洋腸扮哂專業打來問魔術師的情況，問完一輪之後就話自己手頭上無適合魔術師的工作，唔通係嫌魔術師的 expected salary 太高？其實如果係有心找 job matcher 的 recruiter，應該 download 了魔術師的 CV 之後，大概都猜到魔術師收幾多吧？另外一啲 recruiter 就係扮幫魔術師 send CV，但就連發返個 email 俾魔術師話「已經幫你向ＸＸＸ公司申請ＹＹＹ職位」都無。看來呢啲 cases 又係「扮嘢套料」呃 CV 居多，只好嘆一句自己太不小心了。

３. 於是魔術師提高警覺，即使係有名有姓的 agency，就只係俾佢地問啲皮毛嘢，再深入的就要先問個 recruiter 拎 job description（JD）。原來真係有唔少 recruiters 係連 JD 都無，佢地自稱個 client（即係雇主）只係打電話／出電郵話要個ＸＸＸ職位的人，無 formal request。魔術師當然睬佢都傻，叫佢有「真盤」先再打嚟喇！

４. 有啲較有規模的 recruitment agency 又係好神奇，明明個 recruiter 係中文人，同魔術師傾完一輪之後就搵個咖哩國妹仔來跟，又再問魔術師資料一次。魔術師沒好氣只好叫佢睇ＣＶ，如果ＣＶ無寫可以提問，結果佢就問魔術師的「notice peroid」係幾耐 — 魔術師即是啼笑皆非，寫又寫住 immediately available，講又講過話「因為 contract expired 離職」，明顯咖哩妹只係識得對住份 script 問，睇住份 checklist 剔剔剔，完全唔用腦。呢一類 recruitment agency 又係俾魔術師放入黑名單。

５. 仲有一間細雞 recruitment agency 又係好奇葩，個 recruiter 打嚟，傾咗陣竟然就要魔術師填 form，要填地址、三位前上司的 reference checks...魔術師問而家連做乜的的 details 都無，竟然要咁多資料？點知個 recruiter 竟然話要 JD 就要簽 non-disclosure agreement（NDA）！真係有無搞錯。魔術師串返佢轉頭，話人地啲大 agency 都未有「睇JD要簽NDA」的規矩，你呢間嘢算是老幾？個 recruiter 只話係公司政策，魔術師當然唔會咁傻，拉倒算了，又唔係要等份工開飯。

其實呢幾個月來，魔術師都中個兩次大伏：其中一次係「疑似被騙」去跟某僱主面試，個 recruiter 非常之認真跟魔術師 prepare 了一輪之後，個 interviewer 問的問題竟然係非常 technical 的電車知識，呢啲知識應該係另一個 job title 的專門技能，亦即係面試 job title 與面試內容完全不相稱。魔術師諗諗吓，會唔會係個 recruiter 本來有個較適合的 candidate，為咗想 sell 呢位 candidate 便「水」了魔術師去見工，等個 interviewer「發現」該位人選才真的是較適合呢？

不過，魔術師後來就知道以上的想法是錯誤的...原因就係第二次伏，最近魔術師終於「被動地找到工作」（個 recruiter 都算係一位優秀的年青（黃？）人）；但就有另一間 agency 想來截糊，話可以出 better offer，叫魔術師轉軚「袋住先」，之後再搵個 line manager brief 返具體工作內容。魔術師問了再問，原來該個「better offer」就係第一次伏那份工，即係話該位僱主一直都係用個錯的 job title 去招人，梗係招唔到喇！而啲 agency 就亂咁呃人去。好在魔術師有問清楚，否則就幾乎要門前失機了！