2022年10月7日 星期五

盛女錢真係好賺

本案盛女戶主同魔術師一樣都係都係一人住三房,不過魔術師就唔會用成球幾嘢來裝修嘞(00:00 - 08:48)!

樓盤傳真 27/8/2022 第四節

設計廊:戶主自已居住三房單位,喜歡請一大班朋友來開餐,而且收藏不少時裝,儲物空間與煮食空間都少不得。

裝修解密:拆牆後,砌新的磚牆間隔空間,如何才叫安全穩固?這回會談談砌磚牆的程序。

897呎碧提半島單位,先天上就夠空間走簡約風格,至於「華而不俗」,就真係好見仁見智嘞!

「華而不俗」最緊要就係要配合女戶主的要求,就係用啲用金色(左上、右上);所謂「金生水」,女戶主好可能係水命人,計返最有可能就係68年生(54歲)、77年生(45歲)、86年生(36歲),其餘年歲就太老唔啱整到咁姣屎凳篤、或太後生唔會搞到咁 decent 矣。由於又白又金,切雞C為咗加返啲色彩,便由牆身着手,一係搵C父用人手油藝術漆、一係就鋪牆紙,再唔係留白等女屋主掛畫(左中、右中、左下、右下),總之就借機整色整水斬返筆:

由於女戶主唔需要工人姐姐服侍,於是切雞C便將廚房和工人房合併,變成開放式廚房(左上、右上、左中)。女戶主跟節目做介紹嘅其他戶主都係一樣,十項全能,一腳踢又鍾意款客又做埋大廚,實在十分令人佩服(又話巷女唔識煮飯嘅?);於是切雞C便將開放式廚房伸延,加上吧台吧凳(右中),一面煮一面跟親友客人互動。開放式廚房伸延至整色整水的牆身,加埋特色傢具,的確十分「簡約」,幾乎就係「家徒四壁」(左下、右下):

睡房用弧形床頭燈,圓形屬金,金生水,一樣係配合返個風水要求,呢一點唔錯(左上),不過唔知點解記者仔在講解時講到「女戶主鍾意邀請朋友」時就影住張床(右上)...記者仔 show 完個揭來揭去的梳妝枱之後(左中),就讚切雞C好貼心,話睡房中的衣櫃有高身格俾戶主放長裙、旗袍;亦有普通高度放恤衫西裝(右中)。女戶主鍾意招呼客人,卻不介意得個開房式廚房,但卻要個獨立空間做衣帽間(左下):於是切雞C便將同睡房隔咗個客廳的客房打造成衣帽間(右下),一啲都唔嫌隔得遠:

戶主又話唔介意廚房係開放式,但就想要個獨立書房(左上),於是切雞C便在另一間細房整個窗台書枱俾戶主(右上),加多幾個書櫃,盡量將收納空間歸入戶間內(左下、右下):

如果俾魔術師揀,睡房、衣帽間、和書房應該連在一起成為一個私人生活空間,尤其是工作做到攰就可女碌上床訓一陣,一樂也。呢個案例單位將睡房、衣帽間、書房分在三個角落,魔術師就唔太識欣賞了。

精華版如下:

***

伸延閱讀:

(圖片來源:福山堂 > 命卦速查表, captured on 5 Oct 2022)

8 則留言:

  1. 點解喺記者仔,長腿記者妹呢? 冇心機睇仔細...XD

    //所謂「金生水」,女戶主好可能係水命人
    成球幾嘢,用咁多金,是但整咩都應咗個局喇

    //變成開放式廚房
    //的確十分「簡約」,幾乎就係「家徒四壁」
    又開放式廚房(好似開門就見灶)呢嗰剩女疊埋心水唔使嫁的了。成間屋又白雪雪冰洞一樣。

    //睡房中的衣櫃有高身格俾戶主放長裙、旗袍
    旗袍?究竟剩女幾多碎?

    //尤其是工作做到攰就可女碌上床訓一陣,一樂也。
    魔兄想寫嘅喺"可以碌上床",定喺"拉女碌上床" XD

    回覆刪除
    回覆
    1. //點解喺記者仔,長腿記者妹呢?

      長腿記者妹可能仲讀緊書,要返埋最後一年

      //成間屋又白雪雪冰洞一樣。

      姑姑 XD

      //旗袍?究竟剩女幾多碎?

      我估77年生。

      //魔兄想寫嘅喺"可以碌上床",定喺"拉女碌上床" XD

      為保持笑點,我唔改錯字鳥!

      刪除
  2. //點解喺記者仔,長腿記者妹呢? 冇心機睇仔細...XD

    魔兄個題目O米答佐又"感慨"佐囉: 《盛女錢真係好賺 》XD
    旨意魔兄及其主要讀者們, D切雞C 要餐餐切雞飯O勒 XD

    --Dogdogchi

    回覆刪除
    回覆
    1. 記者仔可能可以趁機兜搭吓,畢竟都係小鮮肉。

      刪除
  3. 冇姐姐,好明顯係唔想多個人同住,但俾得成球半裝修又一人住三房的富婆,應該會請不留住的幫手打點。又:要住到成屋白,佢應該冇乜朋友先係囉,上到嚟作客的應該好好驚整污糟佢地方... 如果留家時間多,又實情冇乜各到的話,佢絕對需要製造理由俾自己走動吓喇,所以咪要三個空間做唔同功能囉。

    回覆刪除
    回覆

    1. //冇姐姐,好明顯係唔想多個人同住
      //應該會請不留住的幫手打點
      跟姐姐一對一你眼望我眼有時又真係好尷尬,的確請鐘點家務助理幫手打點做吓清潔說夠。

      //佢絕對需要製造理由俾自己走動吓喇,所以咪要三個空間做唔同功能囉。

      哈哈,講到好似當咗自己係狗要定時去「遛」咁 。如果有工返,都夠活動時間的。

      刪除
  4. 我覺得真係煮飯既人唔會做開放式,因為好大油煙,始終香港細屋,唔同外國HOUSE既開放式
    成間屋咁簡約又白色,125萬真係唔知點出黎,
    或者佢真係好有錢囉
    我個人都仲老套,睇唔明而家d新裝修,都係以前果隻正常d
    唯一最大分別我認為裝修應該要升起d櫃,因為可以用吸塵拖地機械人
    同埋屋企都係要以暖色為主

    回覆刪除
    回覆
    1. //成間屋咁簡約又白色,125萬真係唔知點出黎,
      ... 相信係要搞個開放式廚房。

      //真係煮飯既人唔會做開放式
      可能人地只係整吓啲簡易嘢,沙律呀咁,便自稱「好鍾意整嘢食款客」了。

      //可以用吸塵拖地機械人

      吸塵機械人尚可,但拖地就嫌唔多夠力擦。

      //同埋屋企都係要以暖色為主

      如果間屋唔潮濕的話,可以多啲用牆紙,畢竟油灰水易揩花揩污糟。

      刪除