讀者留言開新篇之Not everyone in workplace is your friend

魔術師平日「竄訪」不同的社交平台，好些時候都見到不少啜核有趣的妄民留言，值得拎嚟笑吓討論，不過又怕妄民留言有愈來愈短的趨勢，好難寫上一篇有咁上下 substance 的 blog 文（除非又整個「妄言雜評」系列（笑））。想不到這天貓讀者留言講大罵某同事事件，咁啱就令魔術師想起以下在 LinkedIn 讀到的留言，可以另開文章討論（由《覆讀者留言》變《讀者留言開新篇》，魔術師可謂俾足面比卡超了）：

今日返工好嬲,我在上層寫字樓工作,今日告訴某同事(不在同一寫字樓)話佢地漏左野叫佢地補交,就係咁簡單,佢同我講佢地無做錯,唔會補交

於是我就問佢究竟有乜野唔明,向佢解釋返正確做法,佢都係同我講佢無錯

結果我忍唔住大鬧左佢15分鍾, 內容大約係: 而家你做左幾多年,我做左幾多年,點解人地同你講唔岩,你唔去理解下,淨係識話自己無錯呀, 而家都無人追究責任啦etc, 跟住我又講: 點解你地做錯野我上層要接受你,而我而家叫你補交你又可以唔交呀etc

我鬧到自己進入了忘我境界,忘記左老闆既存在,於是我又入左老闆房解釋,跟住老闆攪掂左,但係由於我條氣唔順,雖然件事完左,但我頭都痛埋,影響了情緒

放工渣車回家,benz佬係roundabout 響我安,我心諗有無攪錯呀,係咪你直衝就可以呀,渣車係咪唔識收油呀,跟住佢又再次響我安, 我平安回到家後靜下來覺得呢個世界不平靜

話是這麼說：「我們不應跟同事交朋友」，反過來說我們又是否應該跟同事交惡、或當成是敵人、或嫌惡的對象呢？

魔術師的確是不贊成與同事交朋友的，因為同事間始終存在利害關係，就如《兩枝金筆》事件中，魔術師就係當年以為跟一齊打機的 senior 好熟，開玩笑地講咗句「咁都錯得咁樣衰？」，就即時被 senior 發難你而家話邊個樣衰呀？」，投訴給當時的上司S，要魔術師吃不了兜着走。總之，Not everyone in workplace is your friend，有利害關係就更難「帶眼識人」，所以同事間保持一般工作上的態度即可，無謂太過深交（男女感情例外 XD）。

又，Senior D 是黃人，為了下一代有更好的將來，現時已以「讀書」為名「移居」楓葉國，前同事S都係學佢。

又又，講起前同事S，佢應該係最後一個魔術師會（曾？）當成是朋友的（前）同事吧？

（魔按：前同事A算是網友在先同事在後，不是先同事後朋友。）

至於鬧爆同事，咁呢位同事一定係惹自己唔順眼。魔術師年青多10年8年都一樣會好好火，在公司會抦人串人；但近年己收歛咗，反而以自嘲、幽默搞笑面對。一來自己都算小型財務自由可以賺錢買花戴，鍾意就唔撈拍拍屁股 take a break，毋需要受同事間那些無謂人的閒氣；二來正正就是同事只是生命中的過客（「無謂人」），根本就無需要為他們動氣，要知道激氣是會傷身的。總之學上面 LinkedIn 金句所言，公司只係「求財」的地方，並唔係為了「求氣」，而且你咁緊張，公司也未必領情，隨時話裁員便裁員呢！

而且阿貓佢應該係通過電話或 video conference 鬧人（因為被鬧的「大枝嘢」不在同一個 office），其他人（包括老細）未必好清楚對方的語氣態度，好容易會認為「你控制唔到情緒就係你唔啱」。其實件事大可以講返俾「大枝嘢」聽其他同事是否都交齊資料。如果佢唔交的話，就一係堅決唔幫佢處理（適合於公司有明文規定要交什麼資料），一係就如實遞上去話欠某某人或某某組的資料就算，唔使話「大枝嘢」唔肯做的。

最後，魔術師都係講返自己唔識揸車的原因（見《不懂駕駛》），就係除了使費大（行車要俾油錢（現在有電動車可能可以慳啲）、唔揸都要俾泊車費（更貴）），另外就係壓力大（路面上要人車爭路，塞車時又不能放鬆睡覺（甚至更為精神緊張，反應慢一點開車就俾人呠），搵位泊車更是麻煩），倒不如坐巴士或搭的士（或烏巴），當請個司機服侍自己無咁嬲...而且在車上訓又得做自己嘢又得 - 就好似呢篇文魔術師就係在巴士上打完嘅！

＊＊＊

伸延閱讀：

兩枝金筆

不懂駕駛