2023年3月11日 星期六

慳稅三寶之可扣税強積金自願性供款

話說每次農曆新年去到大舅父家中「團拜」,二舅父例必問魔術師深圳層樓收租如何、會否重建之類之類。實情上魔術師好仔不論爺田地,層樓都係當年老父留返俾魔術師的「一番心意」(姜大衛腔),層樓值幾多,收幾多租魔術師都不為已甚,一切交由大堂家姐甲處理,魔術師只係間唔時 return home 打吓簿睇住條數(疫情關係都有幾年無返過去,遲啲都會返上去探吓堂家姐等人),所以對二舅父咁關心魔術師鄉間層樓實在不明白(可能無話題掛?)。好在最近個 focus 可以轉去基層公墓園副學士二表弟身上,話佢以一人家庭抽居屋都輪到「有利位置」(買居屋都算是務實作風,算係咁喇!),希望可以抽到(唔提唔知存不存在的CBD2概念的)啟德區云云(見伸延閱讀)。

魔術師心諗,二舅父果然係 control freak,二表弟買樓都唔可以離開老家黃埔太遠...

話題又再一轉,二舅父主動話中層公墓園博士大表弟仲未做夠年數,未攞到房屋津貼,所以未買樓,依家就以「可扣税強積金自願性供款」(TVC帳戶) 每年節省$10,200稅款幫補吓「儲首期」,又問魔術師有無做自願供強積金,強積金又點部署法?

根據現時我城稅務條例,2019/20及其後課税年度每名納税人可獲容許的扣除額(「合資格年金保費」及「可扣税自願性供款帳戶」兩者合計)為$60,000。大表弟有無買年金魔術師就唔清楚(因為大表弟在整個討論之中竟然無插口,究竟係咪佢對金錢理財完全無感,只係二舅父逼個仔買呢樣買嗰樣慳稅就不待而知),但由於跟二舅父整個討論都係買6萬「賺」$10,200(17% 稅階)為主,魔術師就假設大表弟係全數投資落 TVC。

魔術師最簡單的答案就係:「現時無做TVC!但可以考慮將來會做。」

道理很簡單,

1. 唔靈活

TVC最大的弱點 65 歲之後才可以提取:你買 TVC 的話,就等於你為咁「賺」$10,200而將$60,000鎖死直至65歲(以強積金計劃可提供的基金選擇來說,根本上揀來揀去都係嗰啲大路嘢,同ETF市場根本無得比),缺乏靈活性。以大表弟三十幾未到四十來說,又唔係黃人隨時自稱移民退休提早拎走強積金,為咗$10,200而將$60,000鎖廿幾三十年實在係ON9(呢句當然只番番在魔術師肚中,無當場爆出來)。

(圖片來源:投委會主頁 > 理財頻道 > 理財入門 > 退休儲蓄扣稅 > 常見問題, captured on 10 Mar 2023)

2. 收費貴

既然鎖在TVC賬戶就會被基金食開支費同保管費。就算以最低收費的貨幣市場基金而論,每年都食你起碼1%,10多年內就會將大表弟「賺」到的退稅蠶食殆盡:

(圖片來源:強制性公積金計劃管理局 > 強積金基金平台, captured on 10 Mar 2023)

假設基金收費為1%,60000-60000*(1-1%)^n=60000*17% => n=log(0.83)/log(0.99) => n=18.5,即以最低消費的基金而言,18.5年便會消耗完退稅額。如果大表弟買的是收費更高的基金,則更快被「吃掉」。

3. 無息收

正所謂加利仔有三個缺點:「跑得慢、冇速度、唔夠快」(皮蛋黃腔),TVC都一樣有三個缺點,除咗上文提及的「唔靈活」同埋「收費貴」之外,第三個缺點就係「無息收」。雖則話強積金基金收咗息唔派俾投資者而係會股息再投資,但同時都意味着「管理費再疊加」,又係益咗班基金經理。就好似以下的傷巷指數基金咁,絕大部份都係投資返落去盈富(02800.HK),咁點解盈富可以收0.08%但強積金卻要收超過1%的使費呢(開支比率加管理費)?

(圖片來源:強制性公積金計劃管理局 > 強積金基金平台, captured on 10 Mar 2023)
(圖片來源:盈富基金官方網站 > 基金資料及表現, captured on 10 Mar 2023)

更唔好話用同樣一筆錢(例如$60,000)買盈富長揸,渣渣地都有3%股息收呢!例如買巷股指數基金做TVC慳17%稅,但就蝕息蝕管理費;相對買盈富大家走勢賺蝕一樣,但就贏股息贏管理費,慢吓手5年之內就可以追上來,比之前最保守的貨幣市場基金快得多了。

總結

既然講到TVC好似加利仔咁滿是缺點,咁點解魔術師仲話考慮將來會做?答案就係以上「唔靈活、收費貴、無息收」三大死穴都係時間愈長愈對投資者不利(二舅父的盲點就係以為慳$10,200係「一年計」(因為每年都可以慳$10,200),無將「每年的$10,200」攤長到大表弟退休為止),即係好似大表弟二表弟呢啲新一袋年青人離65歲退休仲有好長時間,當然就唔好蝕俾理財演;但好似魔術師咁,諗住 plan 幾時 FIRE(Financial Independence and Retire Early),咁「收尾嗰兩年」(三年都已經窄窄地,僅僅可以接受,因為慳17%稅攤3年即是平均一年5.67%,息率已經略低於魔術師的收息組合)才會去做TVC慳稅,例如17%攤兩年都有8.5%回報也。

至於「合資格年金保費」的睇法,就另文再講。

***

過完年,收到二舅父短訊,二表弟買左安秀園200多呎的納米一人單位,作價200萬(應該搶唔到啟德XD),相對魔術師當年買龍門居,都係97萬而已,但係就有接近600呎實用。樓價飛升,實不知人間何世,怪不得會因財傷義,搞出駭人命案了。

***

伸延閱讀:

公務員事務局:房屋福利

【居屋2022】安達臣安秀苑懶人包:位置+面積+平面圖+價錢全面睇 新區「開荒牛」呎價平過將軍澳(地產站 2021/12/22)

簡約公屋|甚麼是啟德「CBD2」?電車、單軌、地下街均落空?即睇世運道商住分布(有線新聞 2023年02月04日)

港燦理財(十二)之好仔不論爺田地

慳稅三寶之合資格延期年金

慳稅三寶之自願醫保

19 則留言:

  1. 感謝魔兄分享。我都諗過慳稅3寶。但睇過好多評論都買唔落手。最有趣係問agent 比detail 諗住計吓數,身學下野。全部都口講口賠,terms and condition 一d都唔比。
    我都唔知點比較。

    回覆刪除
    回覆
    1. Agent 呢類廢物行業就連 internet research 都唔識/唔願去做,淨係想呃水魚,遲早俾 AI 取代。

      刪除
  2. 魔兄講得啱,後生係最需要錢嘅時候,呢個年金慳稅係On X 操作。

    回覆刪除
    回覆
    1. //呢個年金慳稅係On X 操作

      我係講緊可扣税強積金自願性供款,唔係年金。

      //後生係最需要錢嘅時候

      二舅父曾經問過我,二表弟年前做咗兩年定期,0.1% 息,有無辦法唔使手續費可以拎返錢(可能想用來俾居屋首期)。我只能話二表弟實在太蠢,明知會有加息潮仲晨早做咁長嘅定期;如果佢問過行話唔得就係唔得,再唔係就上東張西主扮慘。

      二舅父話二表弟咁「蠢」係「唔想佢亂買嘢」,即係又係老豆叫個仔做乜做物,同時又反映咗二舅父真係好驚自己兩個仔無「自制力」,先做埋啲長期 committment 的理財策略。

      其實年青人無自制力就做乜都死,唔止係理財,職場上控制唔到自己情緒,一樣係墥板多過食飯。

      刪除
    2. 年金扣稅係OK架,當然大前題是你要交超過10000元的稅。一般年金供5年就會在8年左右保証回本,折合每年節省10000元稅,即供6萬省1萬,有每年保証12.5%收益,我猜魔兄會後面再分析。

      刪除
    3. //committment

      Typo: 應為 commitment

      //年金扣稅係OK架

      年金扣稅尚可,遲啲再寫。

      刪除
    4. //啟德「CBD2」概念是源於2011年時任特首曾蔭權
      吓連明日大愚都唔知搞成點, 貪曾嘅嘢仲有人會期待?

      //二舅父話二表弟咁「蠢」係「唔想佢亂買嘢」
      究竟喺亂買啲咩,定喺每年去N次旅行唔去會C?

      //其實年青人無自制力就做乜都死,唔止係理財,職場上控制唔到自己情緒
      冇自律虛度光陰都唔喺咁理想

      刪除
    5. //吓連明日大愚都唔知搞成點, 貪曾嘅嘢仲有人會期待?

      所以又變地住宅項目起公屋了。

      //定喺每年去N次旅行唔去會C?

      二舅父應該唔會俾成30歲的二表弟去旅行,何況佢舊年仲做手術切咗一截腸,後遺症就係成日要去次所。

      刪除
    6. 講起後生時要用錢,呢單cash flow mismatch. 我諗起SVB. 明知係活期存款。做咩買咁多長期債券? ps 咁其他銀行投資幾長周期既資產可以係邊度睇。

      刪除
    7. 最 layman 可以睇 cash ratio 同 quick ration

      https://corporatefinanceinstitute.com/resources/accounting/liquidity-ratio/

      認真的就要睇 Annual Report 拎 debt structure 同埋 asset portfolio 出來計,一般業餘投資者好難吓吓咁跟法。

      https://www.youtube.com/watch?v=oWJ2P6ueXVI

      刪除
  3. 當年97萬已可買到600實呎, 堅正。
    宜家政府為左督數,大部分居屋都係得二三百呎,港人越住越細,慘慘豬

    回覆刪除
    回覆
    1. 都係多得當年上司K一句「你阿媽有心贓病係你嘅問題...!」(見《歷任上司評》)促使我去買樓,即使只係由無房的公屋(大興邨)搬去三房居屋(龍門居),都係我人生的一大轉變。依家諗返轉頭,真要要多謝前上司K的「激將法」。

      刪除
    2. 咁又老實,現今世代又真係可以細小小都得嘅, 所有野都 digital, 屋企無左一堆 CD,DVD, 相簿 , 舊書, 個電視機都比之前簿到得返 1/10 , 又唔係個個家庭生 3-4 個 ....細小小將貨就價,都係正常嘅!

      刪除
    3. //現今世代又真係可以細小小都得嘅, 所有野都 digital,
      啪啪啪冇得digital--「隻公猴入唔到去咁點算?」XD

      刪除
    4. //所有野都 digital

      我真係好憎將 soundbar 當成是主流的廣告文宣!

      //細小小將貨就價,都係正常嘅!

      但係要搵下手買家就有啲難,套現有難度,間接限制了向上流動的機會。

      //「隻公猴入唔到去咁點算?」

      下下一篇塞內設計會寫 XD

      刪除
  4. //所以對二舅父咁關心魔術師鄉間層樓實在不明白(可能無話題掛?)
    可能想你賣左層樓比佢 (親友價)

    //魔術師心諗,二舅父果然係 control freak,二表弟買樓都唔可以離開老家黃埔太遠...
    安達臣去黃埔, 車程一個鐘走唔甩

    回覆刪除
    回覆
    1. //可能想你賣左層樓比佢 (親友價)

      又想煲青紅蘿蔔湯?

      //安達臣去黃埔, 車程一個鐘走唔甩

      可能係 FOMO,總之二表弟抽到簽就買住先。

      刪除
  5. //當年上司K一句「你阿媽有心贓病係你嘅問題!」
    佢都係工資奴吧?唔明點解亳無同理心。

    //連明日大愚都唔知搞成點
    攪,好似係一島開3份,留下Y型水道云云。唔攪都要攪郊野公園呀。有地先唔會再有7頭議員(今次係林潮順) 話叫深圳讓地起公屋呢D羞家說話。

    //港人越住越細,慘慘豬
    係2003業主大遊行選擇喎! 停售居屋、唔開郊野公園、唔開新市鎮、唔填海是當時大部份市民共識嘛! 一停9年,唔係話要有地就即刻有吧。無地又要起屋咁就逼D、細D,仲要就番大家荷包呢!巷幣同美元掛鉤,資產泡沫化,呎價咁高,預備大單位又有幾多家庭攞得出首期?

    WILL

    回覆刪除
    回覆
    1. //佢都係工資奴吧?唔明點解亳無同理心。

      就係工資奴先至咁官僚。我個素球好簡單,只係話用來做測試的系統,有問題唔使半夜三更 call 醒我全屋,嚇親我阿媽;反正我 attend 咗個問題,去到下一步其他 team 都係等第二朝先跟進,咁我夜麻麻做起做根本無乜價值。但工資奴上司當然唔係咁諗,佢就係驚再上司問點解測試緊嘅系統有問題都慢手慢腳去處理,怪罪下來佢要我謹守崗位,有事梗係D其他組先。

      //係2003業主大遊行選擇喎! 停售居屋、唔開郊野公園、唔開新市鎮、唔填海是當時大部份市民共識嘛!

      其實老董8萬5係好嘅,不過係班業主炒櫻太過,怕跌怕痛,所以先逼到董伯伯腳痛;過咗成廿年,依家住埋啲納米間位用埋啲變形傢俬朝桁晚拆又唔辛苦嘅?

      刪除