魔術師在上文《慳稅三寶之可扣税強積金自願性供款》就唔太推介以強積金自願供款來慳稅，主要原因就係要等到65歲退休來可以拎得返啲錢，為咗慳17%稅鎖死咁耐硬食管理費，只會因小失大（由此路進，強積金自願供款來慳稅只適合仲有一兩年便退休的工資奴去食到盡）。至於同自願強積金供款 share 同一個扣稅 quota（由2019年4月1日每名納稅人每年上限為60,000元）的合資格延期年金，又抵唔抵玩呢？
所謂年金，就係一項保險產品，客戶供款數年（供款期，例如5年），供滿後將筆錢放在保險公司內滾存生息（累積期，可以係0年至5年、10年、15年不等），客戶就可以在年金期內獲發定額年金，可以係每個月領一筆錢，領10年，又或者終身領取，視乎各保險產品的不同賣點。
|
|
（圖片來源：投委會主頁 > 理財頻道 > 理財入門 > 退休儲蓄扣稅 > 常見問題, captured on 10 Mar 2023） |
記得魔術師在2017-18年間曾經分析過正苦及保險公司的非延期或延期年金計劃（見伸延閱讀），結論就係買嚟只係得啖笑；但當年仲未有扣稅安排，到依家都可以再重新審視一次。而且依家有 Open API，多咗好多中介公司提供格價服務，就好似以下呢間網上保險中介咁，就做咗個坊間唔同的延期年金計劃的比較：
|
| （圖片來源：10Life > 比較扣稅年金, captured on 13 Mar 2023） |
保險產品一買就以十年計，中小型保險公司雖然回報較佳，但始終俾唔到人信心；穩紮穩打的話當然係考慮有名有姓的保險公司中排名最高的 Grandpa 錢莊人壽保險：
|
| （圖片來源：中銀人壽主頁 > 產品資訊 > 退休年金 > 退休年金中銀人壽延期年金計劃(固定年期)（手機銀行投保）, captured on 13 Mar 2023） |
|
| （圖片來源：中銀人壽主頁 > 產品資訊 > 退休年金 > 退休年金中銀人壽延期年金計劃(固定年期)（手機銀行投保）> 產品小冊子, captured on 13 Mar 2023） |
沒有研究就沒有發言權，魔術師就用 Grandpa 錢莊手機app 試吓申請，原來首年保費超過我城貨幣37,500元就可以有20%首年保費折扣，如果係用來扣稅一定食硬：
魔術師今次就試吓輸入資料做15年 plan，即係供5年，每年$60,000，無累積期，第六年開始即時每月提取$2,928.60，拎足10年(120期)：
同情地理解，手機app 的現金流表格不可能太詳盡，要將年金期每月收份的現金流簡化成每年做單位，否則太長的話要向下碌到沒完沒了，用家就無心機去買呢份保險了。魔術師不是保險佬，當然係會用 Excel 詳細計一次唔同 scenario 的內部回報計率（Internal rate of return, IRR）。假設年金計劃在2023年3月28日的開始供款，年繳，5年後供滿；第6年2028年3月28日起每月開始拎年金，拎足10年，考慮無任何優惠、有首年保費8折優惠、有17%稅務優惠（今年報稅，下年交，稅務優惠在下年實現），得出下表：
從附表可見，如果無任何優惠，則 Grandpa 錢莊人壽的呢個年金產品的 IRR 只有2.02%；如果只計首年保費8折優惠亦只得2.58%；係當計埋首年保費8折優惠同埋扣稅（假設最高稅階17%）就可以去到4.98%。證明個回報主要係來自扣稅，假如投資者係低收入低稅階甚至係無嘢做的話，咁呢個 plan 就無肉食了。換句話說，如果魔術師買呢個 plan，就預咗要做多5年工資奴，無得提早退休了！
最後，以即買即收息，同樣係在2038年3月31日到期的1.25%尾帝國債做比較，孳息率為3.467%，足證年金產品最叻都無用來扣稅也！
|
| (圖片來源：Interactive Brokers Trader Workstation(IB TWS) > Bond Scanner > US Treasuries > T-Bill and T-Note and T-Bond, Exclude Variable Rate, captured on 16 Mar 2023 HKT 00:20) |
＊＊＊
伸延閱讀：
要50歲以上先可以取回年金，唔適合後生人士
回覆刪除保險佬：你只要30歲買一份30年 plan，35歲買一份25年 plan，40歲買一份20年 plan，45歲買一份15年 plan，咁你就年年有得扣稅，到50歲開始就可以持4份年金，直至60歲為止！
刪除//保險佬：你只要30歲買一份30年 plan，35歲買一份25年 plan，40歲買一份20年 plan，45歲買一份15年 plan，咁你就年年有得扣稅，到50歲開始就可以持4份年金，直至60歲為止！
刪除問題係我一個低端工資奴， 點樣４５歲後連供４個ｐｌａｎ？ 我唔駛食飯俾家用乎？
保險佬：一份 plan 供5年㗎咋！所以第一份 plan 由30供到34，由它滾存去到50歲開始拎錢拎足10年；第二份 plan 由35供到39， 由它滾存去到50歲開始拎錢拎足10年；第三份 plan 由40供到44，由它滾存去到50歲開始拎錢拎足10年；第四份 plan 由45供到49，到50歲開始拎錢拎足10年，到你就可以每月收到4份單的年金，你話係咪爽歪歪呢？
刪除／／保險佬：一份 plan 供5年㗎咋！
刪除我呢個數口唔精既工資奴， 會發現一個問題， 我４５歲仲供緊一個ｐｌａｎ， 但有３個ｐｌａｎ鎖住我D錢， 全部都要５０歲先拿到錢， 就算拿到既錢夠ｃｏｖｅｒ幾份ｐｌａｎ本金+一定金額的回報， 但人生俾幾個ｐｌａｎ鎖住晒D錢， 我唔駛有其他計劃？
而且要４個ｐｌａｎ都可以平安到終點， 前有雷曼， 依家瑞信又話有事， 點知會唔會４９歲先同我講全部蝕９晒做唔到個回報？
我有join中人壽個plan，他的回報確實不吸引，去到退休平均每年只有每年2%左右收益。所以由始至終買年金的目標就是扣稅。所以方法應該是，去到回本(大約係10年，即5年供款後的再5年)就全數取走供款。用這筆錢去買股收息為佳
刪除//全部都要５０歲先拿到錢， 就算拿到既錢夠ｃｏｖｅｒ幾份ｐｌａｎ本金+一定金額的回報， 但人生俾幾個ｐｌａｎ鎖住晒D錢， 我唔駛有其他計劃？
刪除//點知會唔會４９歲先同我講全部蝕９晒做唔到個回報？
保險佬：年金 plan 係 for 退休用，鎖住你啲錢就係想你唔好亂用。 呢間係Grandpa錢莊，係保證回報，你唔通連Grandpa都唔信？
//方法應該是，去到回本(大約係10年，即5年供款後的再5年)就全數取走供款。用這筆錢去買股收息為佳
保險佬：我地呢個係保證回報，你買股收息隨時會好似大貓咁話唔派就唔派！
變返魔術師 mode：
刪除用年金來慳稅，真係會綁住啲錢，cut plan 又會有 surrender fee，我自己就會將其當成係分散投資，量力而為，有閒錢至做。相比做尾帝國債，無得慳稅，回報較有得扣稅的年金差1.5%，但違約機會極低（一定派足），仲可以隨買隨沽，即時有息收（半年派一次），如果只係二揀一我會揀尾帝國債而唔係扣稅年金。