我愛姑慈

我和慧慈剛吃完晚飯，正呷著那杯佈置得頗精緻卻又不太好味的餐飲．忽然侍應帶來了一位男子坐在我的隔離．
我瞟了慧慈一眼，知道慧慈跟那男子對望了一眼．我微感奇怪，慧慈平時眼高於頂，那裡來的男子可以吸引到她的注意？
「蓬！」
哇，嚇了我一跳，我的心靈可是很脆弱的．原來係果條麻甩仔將那個重到無倫既黑色公事包放在我個Ｇｕｃｃｉ袋的隔離．
都係慧慈衰啦，貪方便叫人黎埋呢ｄ餐廳，又要行樓梯上樓上，野食又麻麻，我坐既仲要係一張長長既梳化，係就係有位擺野，但係要用隔離檯ｓｈａｒｅ呢個空間呢，一陣佢個袋責親我個Ｇｕｃｃｉ既話，睇下我同唔同佢死過丫！
這時電話忽然響起來，是慧慈的短訊．坐響我對面都要ｓｅｎｄ　ｓｍｓ？
「喂，穎妍，你隔離條仔都幾有架喎，兩枝Ｍｏｎｔ　Ｂｌａｎｃ插係袋，仲要係金架，重到恤衫袋都變哂形呀！條呔係Ｙ記架！」
唔怪得慧慈條衰女睇到眼都唔貶啦！
我斜眼望去，果個黑色公事包的銀扣上，寫著「ＢＡＬＬＹ」．哼，好叻咩？
咦？幾時隔離檯來了一個短裙妹？原來條仔係約左人既．
睇見個短裙妹就眼冤，又唔識打扮又要包到自己好似木乃伊咁，九成十都係無ｑｕａｌｉ去ｓｈｏｗ架啦．Ｓｈｏｗ腳呢，條裙就唔該再短ｄ．仲要拿住個大袋，娘到爆！
溝仔溝到你咁既死款，你都得架啦！
「俾個袋我，放黎我呢邊丫！」
下！喂，我地兩張檯之間已經有兩個袋架啦喎，仲放埋呢個ｃｈｅａｐ袋過黎？容乜易刮花我個Ｇｕｃｃｉ架！
嘩！個ｃｈｅａｐ袋真係責過黎！
ｃｈｅａｐ人用ｃｈｅａｐ袋，我不禁怒啤了果條ｃｈｅａｐ妹一眼．
「個袋不如都係擺番過黎我呢邊啦！」
哼，都算你知機！
「唔使啦，得架啦！」
喂，呢條死人麻甩仔有無搞錯！
我正欲再怒啤果條ｃｈｅａｐ精，忽然眼前一花，有光射住我隻眼．
原來係條麻甩仔摺起衫袖，用隻錶反射天花板既射燈射黎我隻眼度．
我正想爆粗，卻聽見慧慈叫：「唔該埋單丫！」仲響檯底下輕輕踢左我一腳．
我忍住啖氣，拿起Ｇｕｃｃｉ便走．
哼，以後都唔好再俾我見到佢地兩個！
嗯，慧慈好少咁好死架喎，唔通佢想界條麻甩仔？
2007/10/11 19:27:21