白撞電話

自從香港政府閞始立例監管果Ｄ電話錄音既廣告同問卷之後，呢類電話真係少左，但係取而代之既就係真人對答既ｃｏｌｄ　ｃａｌｌ，情況可謂無改善過。
不過都好，起碼響悶悶地既時候，有人可以同魔術師解下悶。
＊＊＊
男：喂，請問閣下係唔係９ｘｘｘ－ｘｘｘｘ既機主?
魔：係，咁你其實知唔知我叫乜野名？
男：…
魔：你都唔知我個名，即係白撞喇，拜拜！
＊＊＊
女：請問閣下係唔係９ｘｘｘ－ｘｘｘｘ既機主?
魔：係…
女：〈不待魔術師說完〉我地係「情義理財」打黎既，而家有一項低息貸款提供俾閣下…
魔：我Ｄ錢夠用有突，唔使借喎，拜拜！
＊＊＊
女：請問閣下係唔係９ｘｘｘ－ｘｘｘｘ既機主?
魔：係…
女：〈不待魔術師說完〉我地係「為零食館」打黎既…
魔：我同「為零」唔係好熟，唔使預我喇，拜拜！
＊＊＊
女：請問閣下係唔係９ｘｘｘ－ｘｘｘｘ既機主?
魔：係…
女：〈不待魔術師說完〉我地係「搵笨柒旅遊公司」打黎既，而家有套旅遊套餐…
魔：我都唔去旅行既，拜拜！
＊＊＊
男：請問閣下係唔係９ｘｘｘ－ｘｘｘｘ既機主?
魔：係…
男：〈不待魔術師說完〉我地係「一生免費寬頻」打黎既…
魔：唔使講嘞，我最憎你老闆，出爾反爾，無Ｄ口齒，拜拜！
＊＊＊
男：喂，請問閣下係唔魔先生呢？
魔：我係。
男：我係代表「傻記環球電訊」打黎既，為左多謝貴客多年來既支持，而家有個「生豬」既優惠套餐提供俾閣下…
魔：對唔住，「死」呢Ｄ咁「優質」既網絡，我係唔會用既，拜拜！
＊＊＊
女：喂，請問閣下係唔魔先生呢？
魔：我係。
女：我姓盧，係「楷楷保險」…
魔：保險我買左啦喎。
盧：或者你份保險有Ｄ野係冇ｃｏｖｅｒ到呢，不如大家約個時間，你拎你份保險出黎睇下…
魔：呀盧小姐，我點解無端端要俾份ｐｏｌｉｃｙ你睇，你覺唔覺你呢個要求好戇居？拜拜！
（過了一會，電話再響。）
盧：（語帶哭音）你做乜鬧我戇居呀？我都係打份工咋喎！
魔：呀盧小姐，我又唔識你，但係你又有我中文全名同屋企電話，如果你係我，會唔會覺得好無安全感，又會唔會入將份保單俾呢位白撞既陌生人睇，你連呢Ｄ問題都問得出，唔係戇居係乜？
盧：個電話係公司俾我既，我點知佢點得黎喎！
魔：呀盧小姐，你Ｄ資料點黎唔關我事，而事實上你就係騷擾左我．我而家想收線嘞，拜拜！
＊＊＊
大家千祈唔好以為魔術師以「整蠱」呢班電話推銷員為樂，只不過魔術師以為個人電話號碼是屬於私人資料，白墥電話便是屬於滋擾性質．魔術師可以當果Ｄ「乜乜乜電話號碼既機主」係街邊派傳單，但係好似盧小姐果Ｄ知，就等於知你姓名仲上埋你屋企拍你門，不用對呢Ｄ「搵食啫，犯法呀？」既人太過客氣。

2007/11/24 22:38:19