緣悠雅苑二三事

「綠油油」呢個形容詞，多數用來形容男裝帽子；將「綠油」配上「雅苑」，真箇十分有趣：

綠悠雅苑派表　有豪客「爭食」　

幫女兒入飛　付300萬首期

２０１２年１２月２２日

 

【本報訊】新盤再出現睇樓打蛇餅場面。原為「置安心」房屋計劃首個項目的青衣綠悠雅苑，昨日首天派發認購申請表及提前開放示範單位，熱爆全城，首日已派出逾1.5萬份申請表，超過3,000名市民逼爆示範單位，當中不乏合資格的「中產」人士望搶購單位上車。記者：程俊華　譚靜雯　陳新政

政府事隔多年重推資助房屋計劃，市民引頸以待，以市價七折定價的綠悠雅苑於昨日早上十時正式派表及開放示範單位，約九時許已有逾50人在項目位於長沙灣的銷售處門外排隊等候，冀搶先索取表格及參觀。雖然昨日並非公眾假期，但銷售處全日人頭湧湧，門外的一段行人路擠得水洩不通，場面墟冚。

輪候三小時睇示範單位

由下午起，睇樓人龍由青山道圍繞興華街伸延至元州街，最多有約500人排隊，要輪候3小時才能進入示範單位。

是次綠悠雅苑的申請門檻提高，一人入息上限為月入2.5萬元；二人或以上家庭月入上限為4萬元，故吸引不少具備購買私樓能力的人士，寧願入表「博一博」，望以折扣價上車，不想捱貴價私樓。居於九龍區的吳女士表示，希望用女兒名義申請，但會付首期幫買樓，「其實我唔覺得置安心特別平，因為買私樓都差唔多呢個價錢，不過我係想幫細路哥置業，但佢哋自己肯定負擔唔起，所以我諗住畀200、300萬首期，幫輕吓佢哋負擔。」

居於華貴邨700呎單位的郭先生表示，家中有兩子一女，「睇完覺得唔錯，起碼有齊裝修同送普通家具（電器），家兩個仔要同房上下格床，廿幾歲啱啱出嚟做嘢邊儲到首期？個女嫁出去都算，但男仔冇樓結唔到婚，所以做老竇嘅都要幫吓手！今次一定會抽，抽中咗就好彩囉！」

現任職紀律部隊的徐先生月入2.4萬元，剛好符合申請資格，因現時每月租住荃灣區私樓租金都要逾萬元，「家住緊嗰個單位市值超過800萬，負擔唔起」，見綠悠雅苑樓價合預算，「諗住入市，希望抽得中上車先有得結婚」。

首日派逾1.5萬份表格

任職IT界的鄭先生與妻子兩人多年來為了儲錢買樓，現居於深水埗的分租套房，月租4,000元以上，兩人收入合共超過3萬元，參觀過示範單位後，認為間隔一般，「好多窗台位，一來交通冇我家住深水埗咁方便，二來價錢真係貴咗啲，同私樓只差少少。不過都會考慮申請，目標係揀300萬左右嘅單位，希望做到九成按揭。」

魔術師諗極都唔明，阿吳女士有錢俾成200、300萬首期，照計坊間大把私樓選擇，使鬼幫個女買限制多多，轉售又要補地價的「置安心」？以最「壞」情況計算，吳氏將會買最貴售５１０萬的單位，吳女士付２００萬首期，女兒問銀行借３１０萬，分２５年供，年息２.４厘（所有假設下同），即係話月供要PV(0.002,300,3100000)=$13,752；計埋２％壓力測試，月供為$17,055（等於月薪６成），或月薪最少$28,000左右，超過單人申請限制，即係一係買平啲，一係再俾多啲首期。

即係咁，阿吳女士可以現兜兜俾200、300萬，照計身家唔少，阿女應該贏在起跑線，如果係單人申請，卻意味着最多卻只能搵$25,000（打理家族生意，人工任寫除外），又叫母親情何以堪？

又，阿吳女士幫阿女俾咗200、300萬首期，萬一就係因為咁樣而無哂錢，又係唔係夠資格伸請長者生活津貼呢？

＊＊＊

綠悠雅苑2房圖則解構

信報　２０１２年１２月２３日

青衣綠悠雅苑提供988伙，2房單位佔最多，共760伙，佔全項目單位數量77%，實用面積約535至550方呎。

2房圖則以2座E室為藍本，實用面積535方呎，2房2廳間隔，整體間隔四正實用。甫進室內，為玄關，左方為廚房。廚房呈長形，設有工作平台。經過廚房，為長方形大廳，可清楚分隔客、飯廳。客廳連接小露台。

穿過大廳為寢區，走廊左面為浴室，圖則所見，可放置浴缸，但沒有窗戶。浴室對面為較小的睡房，設窗台。

走廊盡頭的主人房，面積較大，亦有與房間寬度相若的窗台，間隔方正。

「置安心」又好，「住宅發售計劃」又好，乜唔係利民紓困措施嚟嘅咩？點解又會有地產霸權要來賺到盡嘅發水窗台？

又，點解人言報會話廁所係「黑廁」？馬桶背後係咪窗嚟架？

 

＊＊＊

80後「蛇王」攞表博一博

２０１２年１２月２２日

【無殼蝸牛】

青衣綠悠雅苑昨首度開放示範單位，吸引大批市民排隊睇樓。前往示範單位的市民中不乏80後青年及單身一族，更有從事速遞工作的打工仔「蛇王」睇樓，只為索取申請表，一圓置業夢；參觀人士中更有不少父母幫子女索取申請表，更計劃為子女繳付首期。

先上車後結婚

從事速遞業的80後鄧先生，現每月以4,000元租金居於深水埗的套房，他昨早專程「蛇王」到示範單位參觀，希望能抽中購買一房單位，「家樓價好貴，根本上唔到車，呢個盤（綠悠雅苑）雖然都唔平，但比私樓平咗都想博一博。」為求一圓置業夢，他更計劃辭去現時月入約1.3萬的工作，另覓薪金較高的工作供樓。

另一80後青年宋先生自畢業後就開始儲蓄置業，但積蓄一直追不上樓價，至今仍是無殼蝸牛。他參觀完示範單位後，認為間隔實用，室內光猛，雖然已經是市價七折，定價仍太高，但仍會以單身人士申請，惟認為抽中機會很渺茫，「碰吓運氣先，都知會好多人爭，但有機會就試咗先，始終自己冇物業。」他又稱，明年政府推出的白表免補地價計劃他都會去申請，希望成功上車後與女朋友結婚。

除了單身一族外，不少睇樓人士都是父母一輩，主要為子女索取申請表。葉太指單位實用，間隔及用料與私樓質素相若，價錢也合理。她稱，子女有計劃結婚，所以先「幫吓眼」，「私樓普通都要成四百萬，大學畢業生出嚟做嘢只有萬幾蚊人工，就算做多兩、三年都喺二萬蚊，供私樓壓力好大囉。」

其實點解咁多「單身青年」有住宅需要？一時又話唔想做樓奴供樓供幾十年，講到好似供咗樓就轉唔到工咁；一時又話無樓女朋友唔肯嫁俾佢，乜婚姻又唔係預咗結幾十年直至老死嘅咩（好多港女都話婚禮係「一世人一次」，唔好同魔術師講預咗要離婚呀吓！）？依家啲「年青人」究竟想點？想自由時就連儲錢都唔想，想結婚時政府就有層樓俾佢地？

＊＊＊

置安心計劃已告「死亡」

２０１２年１２月２２日

【前朝遺物】

特首梁振英上任首個推出的資助房屋計劃青衣綠悠雅苑，下周五起正式接受市民申請。綠悠雅苑其實是前特首曾蔭權留下的歷史遺物，曾蔭權政府原意推出「可租可買」的置安心計劃，協助夾心家庭「上車」，梁振英上場後，把計劃變成「只賣不租」，更以市價七折推售，變相成為居屋翻版。梁振英及一眾官員，現時隻字不提「置安心」，前朝的置安心計劃已告「死亡」。

過去幾年樓價持續上升，民怨沸騰，為了挽回管治威信，曾蔭權在2010年的《施政報告》宣佈推出「先租後買」形式的置業資助措施，名為「置安心」，圖紓緩夾心階層的置業壓力，並預留青衣、鑽石山、沙田、大埔和屯門5區土地，共提供約5,000個單位，供月入不超過3.9萬元的家庭申請。但鑑於社會意見，曾蔭權其後將置安心改為「可租可買」，但受助家庭的收入水平仍高於居屋，其定位也設定在居屋計劃之上。

杯水車薪　難息民怨

不過，梁振英上任後將約1,000個於青衣青綠街的置安心單位全數轉租為售，更以市價七折發售，令大批一心想參與置安心計劃上樓的青年及家庭，因計劃變成「只賣不租」而希望落空。房協把青衣置安心新盤命名為綠悠雅苑，家庭入息及資產限額與白表免補地價居屋更相類似，令置安心完全「居屋化」，即使綠悠雅苑能令一些中產上車，但只是杯水車薪，相信難平息大部份人置業難的怨憤。

毒果今次無講錯，ＣＹ將「置安心」由「可租可買」變成「只買不租」之後，計劃本質跟本就同居屋大同小異。其實居屋為市民解決基本自住樓需要，本來係「行之有效」，但係唔知點解當年成為樓市大跌罪人，貪曾將之停售，後來更愈搞愈複雜咁整個「置安心」出來，現在將其變相「糾正」，功德無量也。

＊＊＊

原來「蝸居部落」仲未摺呀吓！

仲有就係阿議員助理，搵得８千幾蚊一個月，都係度話供唔到樓。究竟佢知唔知咩係充分條件（sufficient condition），咩係必要條件（necessary condition）？要供樓，係要有一定經濟實力嘅，唔好下下話單身青年有住屋「需要」，夠１８歲就唔想同父母住得唔得？好似議員助理咁，假設佢月供４千，跟返之前的還款期和息率，可負擔貸款為９０.２萬，計埋９成按，可負擔樓價為１００萬。即係咁，殘舊公屋都可能買得到嘅！

又，以依家小朋友的起跑線來說，５歲就要識５國語言，３千個英文字，小四就要考到八級鋼琴...如是者，照計精算、財務分析等等應該係中學文憑試的必修題目，以免太過側重於文學藝術，同學們要學返啲pragmatic啲嘅嘢先得架！

＊＊＊

伸延閱讀：

女朋友唔肯嫁俾我

＊＊＊

參考資料：

房協網站：房協宣布發售青衣「綠悠雅苑」

2012/12/27 00:28:17