由於轉組後魔術師的職銜名稱從未「正名」，故前排各大頭領要求魔術師幫手指揮救火時，第三世界廠仔都唔知魔術師係乜水，甚至當魔術師係羅拔，只視為靚仔一名，真至魔術師要求美顏上司出信講到明魔術師係欽差大臣，班廠仔先採取較合作態度。
做做做，做到出煙又火滾，心情大壞，自不然要去購物減下壓，今次買嘅係可以幫手下火、紓緩壓力的鋼琴一部：
查實年前裝潢時，魔術師早就叫設計師在房間中預留位置擺放鋼琴，之不過型號就未定，只係諗住買部靜音琴玩下，因為就算係紓緩壓力彈下玩下，都要係夜晚放工之後吧？只要逛下ＴＬ，就知靜音琴的選擇唔多，Yamaha嚟講，好多人都會諗係大路的Ｕ系列，例如U1-Silent就最「經濟實惠」了；之但係，月前魔術師卻在ＴＬ的尖沙咀總店相中了這一部叫M112T-Silent的非旗艦型號。
首先，最最緊要的，就係呢部琴係Made in Japan，淨係呢三隻字就已經值回票價了，要知道現在較平民化的Ｕ１系也是有由東南亞廠仔同鄉出品的型號（好像是Ｕ１Ｊ系列，有錯請指正），莫說是ＪＵ的類別了。魔術師跟廠仔們不咬弦，可能的話自然不會用他們出產的物品。
另外，雖然本型號話明叫M112T-Silent，只有112cm高，以魔術師拙劣的琴技，也感覺到音色不賴，很實在，跟有121cm高的Ｕ１不相伯仲；琴鍵的touching也很結實，沒有低檔次琴鬆鬆的，好像找不住著力點的感覺。
第三，Yamaha聲稱M112T-Silent的靜音系統屬於SIMPLE series（同U1J-Silent一樣），但睇返實物，係有錄音和MIDI in/out的，可以接駁Mac機的GarageBand（需MIDI2USB線，魔術師用後再評），所以理應係同高一檔次的SG Series（例如U1-Silent）一樣才對。
最後，當然就係價錢，係就係貴過廠仔版的平民Ｕ系，但卻平過U1-Silent一大截（下圖為數月前之價單），性價比非常不俗。近日魔術師去ＴＬ尖沙咀時已發覺該琴已售（果然有識貨之人！），遍尋之下在太古城才找到此琴芳蹤，便馬上扑鎚買之，作價＄５６,０００（其實一部琴都唔係好貴，何以怪獸家長買琴給子女時會諸多考慮？況且一部鋼琴如果保養得好，可以好保值的。），可分３６期供款，月供＄１,５５５.５６，若以現金價比分期價平２千為例（現實上魔術師無問到），則月息僅為０.２％（=Rate(36,-1555.56,54000)），或年息２.４％，點計都遠低於通脹，分期付款除笨有精也。
翻查Yamaha網頁，就知呢款琴早已停產，查詢時店員答覆全港只剩四部，皆為陳列品，可謂買一部少一部矣。
＊＊＊
＊＊＊
參考資料：
＊＊＊
伸延閱讀：
2012/12/05 23:43:48
賢兄， 點解要買M112T呀？同埋買靜音琴？靜音琴過幾年會壞， 同埋個TOUCH同NON﹣靜音琴有少少唔同架， 以保值計， 靜音琴無乜人要， 二手價值不高， 你都俾緊56000， 不如加多少少錢買部U1好過喇，
回覆刪除BTW， 估唔到賢兄都識彈琴。佩服
賢兄， 你的問題， 等小弟試答。
回覆刪除在香港， YAMAHA是沒有U1J的， 有了U1J，有邊個去買U1。
何以怪獸家長買琴給子女時會諸多考慮？因為香港地閒閒地成萬蚊呎，擺部直身琴要用大約20平方呎空間（以5呎X4呎計算）， 果度成二十萬架喇！
我知,咁個touch係差少少,但都真係少少而已.因為始終都係多數夜晚黑玩一陣,所以靜音是必需的. 否則一部non-silent的U1都只係貴幾千.
回覆刪除係喎,TL的網頁都無話有代理過U1J.
回覆刪除不過以傷港人的性格,馬拉/印尼做的還是日本製的,都分得好均真架!
又,20幾萬算咩嘢錢? 讀一年幼稚園都5、6萬喇!
!-_- 你又會唔打電話會自己用腳尋... 一次過俾哂個價錢同分期爭好遠的，你有問冇？
回覆刪除我好電話恐懼症,如無必要,最憎打電話,寧願行街算.
回覆刪除我睇過TL的分期價,其實只係爭兩三千,唔多的.
假設通脹係4.5%，咁現金價要52300才breakeven,看牌價已知沒甚麼可能了(我不是C9,是不會很人議價的).
靜音琴始終都係爭啲喎！112矮咗啲囉！我從不建議學生買呢款琴，停產係有原因嘅，不過你都買咗就冇謂講了。
回覆刪除查實你11點前彈琴無論幾大聲都冇人可以投訴到你！
／／我從不建議學生買呢款琴，停產係有原因嘅，不過你都買咗就冇謂講了。
回覆刪除又點同呢，我係自娛，又不是用來參加什麼比賽考什麼級，求其將就下就好了。停產嘅原因，講來聽下都好；尤其是如果我有誤導他人的話，咁就請不吝指正了。
／／查實你11點前彈琴無論幾大聲都冇人可以投訴到你！
最弊我隨時要同英美開會，１１點前隨時未返到屋企。
QUOTE
回覆刪除不敗的魔術師 :
我睇過TL的分期價,其實只係爭兩三千,唔多的.
假設通脹係4.5%，咁現金價要52300才breakeven,看牌價已知沒甚麼可能了(我不是C9,是不會很人議價的).
UNQUOTE
點解計通脹唔係計就咁同一筆錢放銀行有幾多息的？52300如果平2000果度3.8%。
唔使議價的，你問就得。以後買親呢D大店嘢，記住問：一次過付／現金價幾多。(問咗唔係師奶，唔問果條係水魚... 百老匯呀乜鬼果D全部一開腦，就有呢張價單響入面)
BTW，你驚講電話的話，話聲我知，我打，就收返你果個現金差價俾我做阿四的代價好了 XXXXDDDD
／／52300如果平2000果度3.8%
回覆刪除分期價係５６Ｋ呀，現金價平２０００仲要分３年，計埋咪係年息2.4%囉（我有列公式的說）。
銀行利息近乎０，我就唔計了，要計不如買高息股(例如中電港燈之類有4%息).
real rate = nominal - inflation = 2.4% - 4.5% = -2.1%，負利率梗係用分期供喇。
擺明你買樓賺咁多係知其然不知其所以然的（笑），淨係知道升就已經夠了。
a 係咪本身都是blogger? 3 sons?
回覆刪除心血來潮，心有靈犀，唔知我up乜，當我白撞算了..(wakaka~)
QUOTE
回覆刪除不敗的魔術師 :
／／52300如果平2000果度3.8%
分期價係５６Ｋ呀，現金價平２０００仲要分３年，計埋咪係年息2.4%囉（我有列公式的說）。
銀行利息近乎０，我就唔計了，要計不如買高息股(例如中電港燈之類有4%息).
real rate = nominal - inflation = 2.4% - 4.5% = -2.1%，負利率梗係用分...UNQUOTE
我呢D婆仔都係鍾意慳得幾千有幾千，要計一輪呢筆錢一次過俾晒的機會成本，將來買高息股有回報幾多幾多實在複雜左D (機會率好難講呢，將來的事)。我都鍾意即慳即賺的感覺，大滿足哩 XD XD XD
多事喇你！ ＸＤＤＤ
回覆刪除//機會率好難講呢，將來的事
回覆刪除所以我咪淨係計通脹囉!
//我都鍾意即慳即賺的感覺，大滿足哩
明嘅!同埋有啲人會因為好似可以分期供款,每月只係俾好細數目,結果碌碌下就碌爆卡了.