2017年3月11日 星期六

有樓萬事joke(四):納米之都


呢集算係搞笑版《星期X檔案》:CCTVB唔講唔知,原來我城人均居住面積150呎,劏房戶人均48呎,而俾「真・港豬」住的豬欄就有50至80呎!
1. 「傷港人真係好有住屋需求,除咗啲年輕人想扑吓嘢之外...」呢句真,游小三果然能夠庶一袋年青人發聲。呢班友仔心智遲熟,生理早熟,去爆房又太有叫G feel,所以先至有咁多劏房應運而生!
2. 「400萬買實用面積500幾呎,劏3至4間房,自己住一間,其他出租叫租客幫你供樓,自住之餘仲有得賺」,「當你自住咁細的空間,你做人就會積極」呢一段真係浮誇得濟。魔術師就唔信以佢咁嘅語氣同態度可以搵到租客嘞!
3. 又,有睇開魔術師文章嘅網友都應該知道,魔術師就連一般的收租仔行為都唔係咁睇得起,更何況係劏房呢啲在乞兒兜裡搶飯吃的欺負弱小行為?睇怕呢啲咁無恥嘅行為,除咗呢位劏房專家之外,就只有乜 sir 做得到!

4. 今集勵志篇早咗少少播出,第二個 case 嘅小情侶住市區工廈,4,000蚊左右就夠,單位廁所無熱水爐又無去水位,所以要行出去公共浴室沖涼,好鬼72家房客 feel。
5. 最大的問題是工廈不可用作住宅用途,會有法例問題,如果住客出事保險未必會受理。
6. 個女仔仲話「幸福指數有8」,而男嘅就話「難得搵到個肯一齊住工廈的女人」,新一袋年輕人的確是可以有情飲水飽!
7. 其實佢地個目標依然係買棲,仲好識諗咁話「與其去怨,不如留返啲力氣去搵錢」,算係有比較正面的人生觀。

8. 住貨櫃,$3,500,包車位,100幾200呎 「冷氣熱水爐抽氣扇廁所開放式廚房乜都齊」,不過就係多啲蛇蟲鼠蟻啫。嘿,講到蛇蟲鼠蟻,多得過魔術師兒時住的山邊木屋?
9. 旁白話貨櫃姐住貨櫃慳咗幾年錢,終於都上到車;其實同公屋一樣,公屋以前叫「廉租屋」,擺明係正苦平租俾班傷民,等佢地儲到錢之後搬走再流轉。係唔知幾時開始,「廉租屋」的質素愈起愈好,搞到公屋富戶有錢都唔肯搬走,先至有689覓地建屋難,「粒粒皆辛苦」之嘆。

10. 呢位小姐有書唔教,創業賣精品,7,000租鋪,「下鋪上居」,訓鋪頭閣樓,去體育館沖涼,借餐廳食肆的洗手間,果然係能屈能伸。不過...賣埋唔唔等使的「精品」,真係好難捱到出頭天喎!


11. 呢位40歲,有車有樓事業有成,日日可以「訓到自然醒」的財務自由哥,原來當年係「沙膽哥」,40萬03年沙士入市,樓市上升就不斷換樓加按,身家就係咁樣累積而來。
12. 雖然話「有人肯交租,業主先有租收」,但財自哥卻認為收租只係老人家的行為,最賺錢的就係「買櫻求槓桿」:買樓就係要趁後生,可以問銀行借到錢,返工只係求份糧(見《一切由糧單開始》),講法同上一篇前同事A的留言一樣。
13. 財自哥的金句就係:「唔買樓就係仆街蠢!」,但卻是 inconvenient truth。魔術師就即時諗起年前同博士表弟講買棲,細舅父嫌貴成日睇跌唔贊成買;但係細舅父卻無諗過,我城樓市走勢多年來呈大湛小回格,就算係升咗3成再跌返2成,依然比佢當初嫌貴的價位貴囉!
***
伸延閱讀:
有樓萬事joke(三):買樓靠父按
一切由糧單開始
乜 sir:交13k租住山頂道 #1291


利用香港現時舊樓租務回報與新樓之回報差距再拓闊之原理,一開波買舊樓劏埋賺盡收租,計今日400萬既樓劏好,收租可達22k(因為而家劏房已經上到7000一間,係荃灣。見相片。留意7000係唐樓,要住有LIFT可能要搵細劏位)。那若有人偷偷地九成上會買400萬樓,月供為360/259*10000 ~ $13800,收租即達22k。我當佢比完40萬首期加印花稅約8萬再加4萬佣金,付出50萬買樓成本後現金仲淨50萬。



好啦,quote下【樓市贏家】劏房發達方程式呢篇文章,內容係:「聽過一班80後年輕人,早幾年開始夾錢在新界區買樓做劏房,到依家已經有四、五層樓收緊租簡單講就係一班後生夾錢做劏房」。知道咁講一定有人鬧,不過鬧既人多數係自恃站在道德高地同唔係持份者。若果你自持完全守法加上有志氣,咪自己搞架美食車去做生意,逐蚊咁賣雞翼賣到發達囉。
另外,違反建築物條例做劏房係刑事罪行? 留意條例同法律,已經係兩件事。業主將佢既業權唔跟公契咁去改建,係違反左公契,同埋唔跟消防條例,預左比人捉到要還原,唔做要釘契,釘左賣唔到,照收租。除此之外,請問有否其他明顯責任? 同埋違反了消防條例,是否犯法? 若果要捉消防,大把人要將屋企個廚房門換過(或者根本拆左)。
至於租客係劏房入面燒死左? 究竟業主是否「有事」? 咁請問如果租客係一間唔劏原則既屋入面燒死左,業主係咪一定「無事」? 筆者唔係律師,但主張大家一齊用些邏輯思考。上網睇睇好不幸,踏入2017年有4-5單單位入面燒死人既個案,有劏房有正常間格既屋。那究竟「劏房」同係一間「原則既屋」入面死左人有咩分別呢? 求教。


10 則留言:

  1. 呢位四十歲又喺唔似四十,似乎連男士嘅歲數都好奇幻吓。喺唔喺劇情需要去報大或報細?或者太早半退休老得快啲?

    ///"與其去怨,不如留返啲力氣去搵錢"

    原來都有年青嘅港豬未覺醒喎!傷巷還是有前途的。

    其實要多謝返魔術師兄咁有心天天出post,我冇乜機會會留意到呢一輯電視節目。

    回覆刪除
    回覆
    1. //似乎連男士嘅歲數都好奇幻吓。

      做收租仔其實係替租客打工(佢唔交租你就頭痕),所以未老先衰都唔出奇.

      //原來都有年青嘅港豬未覺醒喎!傷巷還是有前途的。

      其實我覺得之前嗰幾個後生都okay的, 只係在社會出「問誰在發聲」的都是那群有青.

      //其實要多謝返魔術師兄咁有心天天出post,我冇乜機會會留意到呢一輯電視節目。

      有時寫下其他嘢調劑下吖馬! 仲有一集今晚寫埋佢.

      刪除
  2. 女方出入公共浴室,唔怕有危險?
    公厦案例似係仆嘢空間,幾個人夾份,輪住用。又似係储物房,做代購。

    回覆刪除
    回覆
    1. //女方出入公共浴室,唔怕有危險?

      所以女方要等埋男方一齊去輪浴室...男仔夜返女仔就無得沖涼住!

      刪除
  3. 友儕中有不少2003年大學畢業的,呢群真係社會對佢地唔住,因為由畢業就業到買樓周期佢地都係撞正社會最低點... 就用唔到呀 自然醒哥果D喇。

    "與其去怨,不如留返啲力氣去搵錢"

    物以類聚,我認識的「後生」都係呢種例子多過有青...

    回覆刪除
    回覆
    1. //呢群真係社會對佢地唔住

      係班收租霸透支哂個社會的經濟負擔能力啫!

      //我認識的「後生」都係呢種例子多過有青...

      所以我話你係pseudo blue blood XD

      刪除
  4. //公屋以前叫「廉租屋」,擺明係正苦平租俾班傷民,等佢地儲到錢之後搬走再流轉。係唔知幾時開始,「廉租屋」的質素愈起愈好,搞到公屋富戶有錢都唔肯搬走,先至有689覓地建屋難,「粒粒皆辛苦」之嘆。//

    公屋起得太靚, 真係好心做壞事
    出現公屋舒服過私樓
    特別係舊公屋重建又市區又靚仔, 有D仲要地鐵上蓋 - 比如元洲邨
    試下俾間我, 剷我都唔捨得走,
    邊個要我走, 我拎罐石油氣同你死過

    公屋應該係臨屋區咁既鐵皮屋
    政府仲三幾年就泥個越搬越僻
    咁先夾到住戶有能力就走
    個所謂既公營房屋上流架構(公屋>居屋>私樓)先有得玩

    依家玩大佐就無得返轉頭

    回覆刪除
    回覆
    1. //政府仲三幾年就泥個越搬越僻
      //特別係舊公屋重建又市區又靚仔, 有D仲要地鐵上蓋 - 比如元洲邨

      D, 到時朱HD又走出嚟話不遷不拆綁住自己係屋村藍球場條柱度賴死架喇!

      //個所謂既公營房屋上流架構(公屋>居屋>私樓)先有得玩

      根本成個plan就係咁, 都唔知係邊條木咀要搞到愈起愈靚...

      刪除
  5. //劏房專家

    我只服以下幾棟及同類大廈的劏房業主:合宜、香檳、福樂...起碼人地真係「創造價值」.

    //更何況係劏房呢啲在乞兒兜裡搶飯吃的欺負弱小行為?睇怕呢啲咁無恥嘅行為,除咗呢位劏房專家之外,就只有乜 sir 做得到

    劏房專家同乜sir只係趁社會一d民生資源短缺囤積居奇而已。

    不過用槓桿囤積是否必勝,五至十年後就知了...每次牛轉熊,都有一批「專家」從此消失的。

    //「廉租屋」的質素愈起愈好,搞到公屋富戶有錢都唔肯搬走
    //依家玩大佐就無得返轉頭

    其實可以靚公屋照繼續起,但在呢個階梯下面再整個「廉價公屋」:只要合晒消防例,就盡量跟返最早期的廉租屋(以前走廊煮飯食應該唔合而家消防例),呢d廉價公屋輪到的話你可以選擇要唔要...反正而家輪候名冊咁長,就算size同劏房差唔多,但物管同安全好劏房咁多,又戶戶獨立電錶唔怕濫收電費,租金又平一大截,梗有劏房戶輪到肯遷入的。

    //呢位小姐有書唔教,創業賣精品
    //不過...賣埋唔唔等使的「精品」,真係好難捱到出頭天喎!

    見到佢個名就諗起street fighter個Blanka.

    世上食水最深往往是最唔等使既野,你睇swalorvski!不過齋賣無自己品牌,想靠此出頭又窄左d。當然佢剩係想過老闆癮又唔同....

    //財務自由哥

    佢最主要是有眼光,睇準低位之後狂用槓桿令身家加速膨脹...不過這樣孤注一擲,準就日日自然醒,錯就好似羅兆輝在常平暴斃。

    //「唔買樓就係仆街蠢!」

    如果你筆儲蓄無其他用途(例如投資或做生意),的確物業是遠勝現金的儲存財富方法。

    //不過鬧既人多數係自恃站在道德高地同唔係持份者
    //若果你自持完全守法
    //同埋唔跟消防條例,預左比人捉到要還原,唔做要釘契,釘左賣唔到,照收租。除此之外,請問有否其他明顯責任? 同埋違反了消防條例,是否犯法?
    //那究竟「劏房」同係一間「原則既屋」入面死左人有咩分別呢?

    你改到間屋唔跟消防例有安全隱患,被揭發都可以繼續收租、燒死租客唔使負刑事責任,這已是很明顯的「法律漏洞」,斷估無刑責都有道義責任吧?係法律係無你符,但點能夠同原則樓燒死人可比?

    這很明顯是詭辯--將「無刑事責任」等同「無道德責任」;但佢唔係話人指責只是自持「道德高地」咩?既然你咁唔在乎別人的道德指責,大可一句「我就係無道德,但法律吹我唔漲,吹咩」,咁可能仲有d「真小人」之風。當然佢咁講係想佢學生過到自己良心一關,先有得繼續被佢洗腦...

    //咪自己搞架美食車去做生意,逐蚊咁賣雞翼賣到發達囉。

    一個地方物業的價值,最終是取決於該地能帶給居民的價值--現在這批收租仔對社會破壞性最大的觀念,就是「物業的價值只在於物業本身」。


    回覆刪除
    回覆
    1. //世上食水最深往往是最唔等使既野,你睇swalorvski!

      唔等使嘢我寧願買 Tiffany... 不過 S牌的模特又真係幾靚就真.

      //反正而家輪候名冊咁長,就算size同劏房差唔多,但物管同安全好劏房咁多,又戶戶獨立電錶唔怕濫收電費,租金又平一大截,梗有劏房戶輪到肯遷入的。

      輪公屋仲要嫌三嫌四又要平又要住市區的只是那群要求私淫空間的有青, 真正有居住需要的基層人士照計無咁多嘰吃.

      //過這樣孤注一擲,準就日日自然醒,錯就好似羅兆輝在常平暴斃。

      更可笑的是一般中剷以為槓桿之下賬面身家多咗就有「財富效應」使大咗,真係人地未燒炭班中剷就先要跳樓。

      //如果你筆儲蓄無其他用途(例如投資或做生意),的確物業是遠勝現金的儲存財富方法。

      最主要係物業買賣唔容易,搞呢搞路又要睇樓又要做按揭又要去律師樓等等,好少話可以一時衝動咁去買賣,一動不如一靜之下,供供下啲錢除咗還利息,就變咗儲落層樓(本金)度,低技術得嚟又易成功。

      //係法律係無你符,但點能夠同原則樓燒死人可比?
      //劏房專家同乜sir只係趁社會一d民生資源短缺囤積居奇而已。
      //既然你咁唔在乎別人的道德指責,大可一句「我就係無道德,但法律吹我唔漲,吹咩」

      其實做得劏房,以剝削弱勢來滿足自己,基本上已經無乜「道德」可言. 可能有學員怕跟乜sir搞劏房,一旦出咗事要上身,所以先發文耍賴皮,講到自己「無犯法」,道德可以放埋一邊。魔術師未有時間查證相關法例,但諗起花園街大火事件,作為業主管理不善導致人命財產損失,就算無刑事(唔使坐監),只要法庭證明到業主有疏忽,照計苦主一樣可以循民事向業主追討,後果可大可小。

      http://suetmui.blogspot.hk/2012/08/blog-post_23.html

      //現在這批收租仔對社會破壞性最大的觀念,就是「物業的價值只在於物業本身」。

      基本上同中古歐洲奴役農民的地主無分別.

      刪除