2017年10月27日 星期五

覆讀者留言:變種特供

回想起來,20年前魔術師受港女同事「啟發」(見《我是港男》),開始了投資理財的生涯:當時的第一擊,就係大貓銀行提供的月供零售基金。當時月供基金應該係新事物,魔術師都算係最早初參加呢類計劃的「有為青年」,十分 buy 呢類計劃必 sell 的平均成本概念。果然,月供基金與現金儲蓄並行了好幾年,第一個100萬就這樣得來了(見《第一桶金》);同時,魔術師也體會到,每月月供和儲蓄的份額,對本金的比重開始減少,要「平均成本」也「平均」不到哪裡去...
銀行的月供基金生意愈做愈大。金融風暴更帶來了「月供股票」的點子:可以以平均成本法買入「好股」,就連股災都不怕...
***
最近有讀者提出疑問(見《思辨練習題:盈富基金無用論》):
Ken Wan 2017年10月25日 下午4:32
您好,我係因為想睇關於月供股票、盈富基金既文章而搜到呢篇,本身無拜讀您文章既習慣,投資知識功底亦並不深厚(如果提出咗一啲白痴觀點請多多包涵)。
您提出話一筆過買(先不論買乜嘢,因為理論應該買乜嘢都apply到,當盈富先啦)盈富,價位會比每月供款好,公式我睇唔明(文科仔,sorry),但觀點我唔係第一次聽,我係Ken Fisher既著作中亦有睇到類似既觀點。不過我有一點諗唔通:
如果只係買一次盈富(或其他嘢),以後永世唔會再加碼,咁您(同Ken Fisher)既理論應該正確,即係例如我有一手盈富咁多資本,我應該一次過買,而唔係分開12次去每次買1/12,呢點我同意,而且Ken Fisher亦做過佢既實證證明咗係啱。
但係如果你有需要再加碼,例如每次儲夠一手既錢又再去買,儲夠一手既錢又再去買,其實咁即係等於月供啦,應該正確啲嚟講,係定期投資,只係唔定額(因為投資額隨股價而變動),同埋係一夠錢就買,無視價位,否則又會跌入咗「捕捉低位」既迷思(呢點好多指數投資者,比如綠角,都指出係無可能做到)。
所以其實只要會有重複投資既行為,其實都係奉行緊月供背後既理念:隔開一定時間段進行重複投資,無視價位。如果係一筆過投資,就會墮入捕價位迷思,而呢點係基本上無人可以做到。
唔知我既理解正唔正確呢?
讀者 Ken 有個好有趣的想法:
每次儲夠一手既錢又再去買,儲夠一手既錢又再去買,其實咁即係等於月供啦,應該正確啲嚟講,係定期投資,只係唔定額(因為投資額隨股價而變動)
每次一儲夠錢就買一手 = 定期投資 = 月供?是真的嗎?
一儲夠錢就買一手 = 定期投資?
魔術師第一個問題就是,一般有理財紀律(魔術師唔用「財商」呢個咁 vague 嘅字眼)的打工仔,每月儲蓄份額通常是固定的(或只會在一個很小的區間上落),但股價卻是隨市況而動,是否可以「定期」儲夠錢買一手,或盈富(02800.HK)、或匯控(00005.HK)、或騰訊(00700.HK),就很視乎投資者每月可儲幾多錢:如果每月儲到10,000,可能真係可以頗為肯定每儲兩三個月就買到一手盈富或匯控,但騰訊就可能要儲6至8個月,實際時間就說不定了。
如果投資者每月只能儲1,000,就連可以儲夠錢買一手盈富的時間也說不定了,要很視乎市況發展如何。
所以,「每次一儲夠錢就買一手」並不等於「定期投資」;又除非「月供」是指投資者可以很屈機地以一個月儲的錢便足夠買一手心儀的股票,否則除以上的除極端情況外,「每次一儲夠錢就買一手」亦不等於是「月供」。
定期投資 = 月供?
那麼,餘下來的問題便是:「定期投資」是否等於「月供」?
先以李天命的思考三式中的第一式:釐清式(「X是什麼意思?」),去檢視一下何謂「月供」。
在投資的領域裡,就字面解,「月供」就是「每月供款投資」,廣義來說就係「隔開一定時間段進行重複投資」。當然,「月供」只是「定期投資」的其中一種運作方式,日供(美股可以逐股買,以低佣證券行運作,日供並不是不可能)、周供、季供、年供都可以係「定期投資」;所以,「定期投資」並不等於是「月供」
「月供股票」的背後理念
還有沒有更多對「月供」的理解呢?讀者留言中提及「月供背後既理念」,那是什麼意思?
就如本文開頭所說,通常伴隨住「月供股票」的理論,就是「平均成本法」;但要實行「平均成本法」,除了「定期投資」(例如每月供款)之外,沒有很 explicitly 寫出來的就是「定額投資」。
「定期投資」加「定額投資」的背後理念,就是「平均成本法」;單是「定期投資」,就只是幫投資者實行「有紀律地去儲蓄」的「營運計劃」,背後沒有甚麼理念可言。
就如強積金又或者坊間某些銀行所推廣的月供股票計劃,可以給客戶投資一籃子基金或股票,客戶更可以隨時修改下月某基金或某股票的供款額,只要每月總投資金額一樣便可。由於每月投資項目的分配可以隨客戶調配,變相容許客戶猜測市況,例如升得多的股票供少啲,跌得多的股票供多啲。
在這些「可加可減月供計劃」之下,「平均成本法」唔提就唔存在,最後只淪為給客戶「定期買碎股」的渠道了。
「每次一儲夠錢就買一手」的背後概念
前文已經講過,「每次一儲夠錢就買一手」,既不是定期投資,更不是定(金)額投資,不等於「月供股票」,「平均成本法」更是無從說起。那麼「每次一儲夠錢就買一手」背後的概念又是什麼呢?
顧名意義,「每次一儲夠錢就買一手」,就是「定(數)量投資」,每次買一手。假設投資者儲蓄率係固定,股價升時,需要儲夠「買一手」的時間便愈長;股價跌時,需要儲夠「買一手」的時間便愈短。
看懂了沒有?「每次一儲夠錢就買一手」背後概念就是「平均時間法」。
跟「平均成本法」的弱點一樣(見《平均迷思(2nd edition)》),假如投資者每月儲蓄額相對一手股票的「入場費」較少,「平均時間法」也是「買跌思維」,要股價下跌才能縮短買入一手所需的時間,從而由股息得到「複利效應」;不過,由於「未儲夠錢就一手」時,資金處於 idle 狀態,營運效率(複利效應)就不及每月均能夠以碎股形式投入市場的月供股票了。

***
伸延閱讀:
李天命《思考三式VS三大盲潮》
思辨練習題:盈富基金無用論
平均迷思(2nd edition)
第一桶金
我是港男

33 則留言:

  1. 月供股票無乜用之外,最唔鍾意嘅係永遠都有碎股,以後要沽出碎股就要以比市價較低的價位才能沽出,只會益咗碎股佬。
    另外,做得月供股票,每月都唔會供太多錢,好多銀行月供股票收取的手續費比例相比供款就高得驚人,真係揾苯七。

    回覆刪除
    回覆
    1. //以後要沽出碎股就要以比市價較低的價位才能沽出
      //做得月供股票,每月都唔會供太多錢,好多銀行月供股票收取的手續費比例相比供款就高得驚人

      例子:
      http://www.bochk.com/tc/investment/securities/monthly.html

      每個計劃最多可選擇20隻股票,手續費按每個計劃收取,僅為供款金額的0.25%,即每月最低收費只需港幣 / 人民幣50元(已包括佣金、印花稅、交易徵費及交易處理費)。此外,更豁免保管費及代收股東權益(例如股息)手續費,助您節省更多。

      您可以正股的市場價格沽出任何計劃內的股票(即使股票數量未必是整「手」),獲享更高回報。您亦可因應個人投資需要,調整供款金額或更改股票組合,手續費全免,讓您靈活把握投資機會。

      您可透過自動轉賬形式以證券結算賬戶或中銀信用卡作扣賬供款,供款金額並無上限。透過中銀信用卡供款,更可賺取簽賬積分,連續供款時間愈長,兌換積分的比率愈高。

      刪除
    2. 正是魔鬼在細節,且不說0.25%如果作為佣金收費是最高的(尤其相對證券行),只算那最低收費50元,月供得股票都唔會供太多錢,假設每月供最低標準1000元,手續費就高達供款5%!而一些銀行(例如恒生)更是以每隻股票計而不是供款金額計最低消費。

      至於印花稅、交易徵費及交易處理費加埋0.2%左右而已。

      https://www.hkex.com.hk/chi/market/sec_tradinfo/trancost_c.htm

      刪除
    3. 風兄:
      //魔鬼在細節
      Ken:
      //收費按比例計係較貴但同時又免除了其他收費,拉匀當打和。

      我知道最低$50的問題呀. 但如果風兄有睇C9王國, 啲「國民」係好喜歡月供的, 而且往往唔會供咁少. 好多都算死草供到盡供$20,000, 一次過供幾隻銀行股, 公用股, 得明再依照市況調配(所以我先話係「買碎股」的渠道).

      另外,我也從C9王國得知, 男樣係有免月供手續貴優惠的.

      http://www.ncb.com.hk/nanyang_bank/popup1/ncb_20170821_sercurities_t.html
      http://www.ncb.com.hk/nanyang_bank/html/121044.html

      刪除
  2. 謝謝魔術師分享。

    我認為月供有個優點係逼投資者無視升跌,逼佢做投資;如果儲夠一手買儲夠一手買,投資者要好有自制力去克服捕價迷思,否則會一直揸現金去等心目中口價,好彩就等到卻唔一定等得到。
    所以我覺得如果唔係有一定克制力嘅人(例如一般師奶散戶或者投資經驗不多嘅人),都係建議做月供。

    投資改動會削弱平均成本效果,呢點同意,所以我覺得就算做月供,都要明白長線持有同埋價低買價高賣嘅道理。
    不過我仲有一點唔明:有啲人會認為高位賣貨等跌再買返,咁就即係捕價,而我認為呢樣嘢(預測市場)其實係無辦法做到。我自己傾向buy and hold,優質股唔怕長期持有,而且賣咗唔會等於等得到佢跌價。想問下魔術師點睇呢?

    回應上面風中追風,有啲銀行碎股可用正股價賣就不存在呢個問題,收費按比例計係較貴但同時又免除了其他收費,拉匀當打和。

    回覆刪除
    回覆
    1. I would like to know which bank would take odd lot at market price without any discount.

      刪除
    2. 我用緊中銀可以,其他有冇銀行得我就唔太清楚

      刪除
    3. //我覺得如果唔係有一定克制力嘅人(例如一般師奶散戶或者投資經驗不多嘅人),都係建議做月供。

      我都同意月供呢種強制性儲蓄可以幫助初學者掌握市況, 建立起投資感覺, 訓練EQ; 不過由於月供愈久效率就愈低,所以供到一定日子(魔術師解議不超過5年), 就要「畢業」,不能永遠留在BB班.

      有些財博及C9王國的名人都是以長線月供為榮, 動不動便返十年八年, 這是十分不理智的做法, 亦等於說咁多年來該投資者都沒有建立起一套有效的交易規則,自己亦無定力按紀律執行.

      //如果儲夠一手買儲夠一手買,投資者要好有自制力去克服捕價迷思,否則會一直揸現金去等心目中口價,好彩就等到卻唔一定等得到。
      //有啲人會認為高位賣貨等跌再買返,咁就即係捕價,而我認為呢樣嘢(預測市場)其實係無辦法做到。我自己傾向buy and hold,優質股唔怕長期持有,而且賣咗唔會等於等得到佢跌價。

      同意. 我用嘅係資產配置,每月rebalance 股票:商品:房託:現金/債券的比例, 伸延閱讀如下:

      魔術師資產配置(2017年10月)
      https://magicianyang.blogspot.hk/2017/10/blog-post_4.html

      魔術師資產配置(2017年1月):解畫篇
      https://magicianyang.blogspot.hk/2017/01/blog-post_5.html

      //I would like to know which bank would take odd lot at market price without any discount.
      //我用緊中銀可以

      正解.
      http://www.bochk.com/tc/investment/securities/monthly.html

      刪除
    4. 我無心去鑽研投資,我奉行投資理念相信以下幾點(雖然我無辦法知道啱定唔啱):
      1 無人可以預測市場,例如價格,趨勢,或者下一隻爆升股
      2 鑽研投資,付出時間心血同成果唔係成正比,即唔係睇得越多就越識投資,就算交晒學費瞓落金魚缸都唔會學得識
      3 我相信指數投資嗰套,只要攞返一個同市場回報差唔多就夠,我唔會希望做好多功課去搵下一隻騰訊

      所以投資有咁上下回報就得,我唔會亦唔覺得有人可以長期贏過市場,我情願留返啲時間陪屋企人,睇多兩本書,而唔係睇公司年報。

      月供又好,定額抑或定量甚麽都無所謂,我會下咁樣嘅定義:
      首先忽略一次性投資唔提,因為好少人做得到,就算你收到股息再買返落去已經唔係純粹嘅一次性投資;如果多次投資,用咩方法去做間隔嘅規則都唔緊要,只要滿足兩點就ok:1 唔好用價格去做買貨嘅規則(即例如唔好set跌過幾多%或者跌過幾多天線就買),因為市場無法捕捉;2 set好規則之後,揀隻穩陣標的然後跟實自己規則去買,唔好見跌市就縮
      做到以上兩點,就用咩規則買我都覺得無咩所謂

      魔術師點睇?

      刪除
    5. //我無心去鑽研投資

      作為一個受過見血的教訓,近年累積經驗還算順風順水既過來人,睇到你呢一句,我勸返你一句:

      "你快點回去火星吧,地球是很危險的"

      我對第1和2點絕對嗤之以鼻,閣下認為不能測市只是閣下讓自己不去鑽研的藉口,如何令自己進化我亦無謂多說反正閣下也不會聽; 至於"睇多啲書唔睇年報"是價值觀的問題,這沒分對錯,反正任總(閣下知道任總是誰嗎?)每周末早上最佳娛樂是讀公司年報和各類經濟報告,這純粹是個人喜好和選擇;。

      但閣下留言給我最大觀感就是閣下是"又痕又怕痛"之輩,以為"所以投資有咁上下回報就得"是一件很容易,可以對市場認識很少之下做啲好routine既嘢就可以達到--我只能對閣下這麼on9的想法表示遺憾。

      很簡單,如果過去20幾年是月供nikkei index,除了浮浮沉沉外還可以得到什麼?但一個idiot,如何對一個市場的前景有前瞻性,和更重要的更需要心理控制的,對自己的糾錯思維和措施?

      好多成功人士每日做啲看似好routine既嘢,其實背後是有好深厚修為backup,而且是經過無數試錯找到最適合自己的方式持之以恆,並且從看似routine行為中找到agile式的自我進化; 而不是一句"不想鑽研"推搪,然後自我感覺良好般紙上談兵憑空想一個看似一勞永逸的方法出來。

      世上從來無一勞永逸的事。

      本來我不用越俎代庖寫咁多嘢,反正如閣下這種水魚(而且是很快被洗走,以後永遠退出市場的)當然是越多越好,只是我唔抵得頸性格又發作,而且借啲意總結一下自己思路而已。

      除了"回去火星"外,另一個忠告是: 咁怕煩而又痕又怕痛,不如簡單啲,努力啲儲錢在我城買層樓上車算數吧!

      刪除
    6. Ken Wan:

      //無心去鑽研投資
      //無人可以預測市場,例如價格,趨勢,或者下一隻爆升股
      //鑽研投資,付出時間心血同成果唔係成正比
      //投資有咁上下回報就得,我唔會亦唔覺得有人可以長期贏過市場
      //留返啲時間陪屋企人,睇多兩本書,而唔係睇公司年報。

      以上幾個 point 其實都係講緊一點:就係閣下對投資無興趣,研究投資是一件苦差事,退而求其次就要跟市場回報一樣便可以了,倒不如將時間精神心力放在其他 priority 上,例如家庭時間、或睇下書咁。
      一句話:就係 margin cost in studying investment > margin benefit (alpha) gained from investment.
      我唔排除有些大師真係能夠找到長期跑贏市場的方法,但明顯佢地會視究投資、年報為興趣,或工作的一部份,絕不會覺得是件苦差事。
      換句話說,如果你無興趣或無時間心力去鑽研投資的話,你已經「輸在起跑線」上。對於「跑得慢、唔夠快、無速度」,同時要求不高的一般市民來說,投資指數 ETF 的確是一個性價比合理的理性選擇。
      不過,我城市場的ETF種類不多,尤其缺乏收息類或房託類的ETF,不能滿足我的資產配置戰略需要,結果都係要以投資個股及海外市場配合。

      //唔係睇得越多就越識投資,就算交晒學費瞓落金魚缸都唔會學得識

      不同意。我唔多明白你所謂「識投資」是甚麼意思。如果講緊係「交晒學費瞓落金魚缸」呢種「銀行門口C9式」的「投資」(跟我個老粗堂阿哥一樣),那所謂的「識」其實只是在「執行上層次」。我心目中的「識投資」,係指依照自己的 financial objectives 去砌一個組合及計劃,並且 set 好 rules 去確切執行,體現出自己的戰略和戰術構思。

      //忽略一次性投資唔提,因為好少人做得到

      唔明。「一次性投資」點解「好少人做得到」?

      //唔好用價格去做買貨嘅規則(即例如唔好set跌過幾多%或者跌過幾多天線就買)

      同意。好多人係先用基本分析定下買甚麼股,再用技術分析來找買入時機;而我就係先用基本分析定下乎合投資主題的若干「觀察名單」,再以技術分析找出在某個指定的時間點上,應該投資於哪一隻(或哪幾隻)股票。

      //set好規則之後,揀隻穩陣標的然後跟實自己規則去買,唔好見跌市就縮

      同意。嚴守紀律係「識投資」的必要條件。

      摩摩:

      //我對第1和2點絕對嗤之以鼻,閣下認為不能測市只是閣下讓自己不去鑽研的藉口,如何令自己進化我亦無謂多說
      //"又痕又怕痛"之輩

      我覺得以上的思維,適合大部份港豬(港豬其中之一個 behavioural traits 就係「又懶又貪」)所以咁多港豬去搵乜sir呢類財演去找捷徑。

      //任總(閣下知道任總是誰嗎?)每周末早上最佳娛樂是讀公司年報和各類經濟報告,這純粹是個人喜好和選擇。

      所以我寧願寫 blog 計身家思考一下投資都唔去煲劇... XD

      //好多成功人士每日做啲看似好routine既嘢,其實背後是有好深厚修為backup,而且是經過無數試錯找到最適合自己的方式持之以恆,並且從看似routine行為中找到agile式的自我進化

      台上一分鐘,台下十年功;但現在「時代唔同咗」,所有人都變得無耐性,但又沒有成功的捷徑,唯有就係降低要求,自我感覺良好地找一個 solution 出來。
      其實,如果可以有選擇的話,呢班「對投資無興趣」的人,應該從來都唔參與投資活動;但問題是特衰政府的財金政策(包括樓市及MPF)等都「逼人投資」(甚至是世界趨勢),故此這一群唔想在投資市場內「當兵」的人都要「逼住去參軍」,佢地就唯有揀一些最「無痛」的方式去實行。
      我唔會責備呢種人,只係會覺得佢地幾可憐:被逼放棄天神村裡的快樂生活不特止,仲要搞到去打越戰。

      //努力啲儲錢在我城買層樓上車算數吧!

      正如前僱傭兵公司的小妹所言,現時做收租仔買樓收租雖然回報低,但就是最 brainless 可以成功致富的方法,就算街邊執紙皮的阿婆都可以做得來!

      //我唔抵得頸性格又發作,而且借啲意總結一下自己思路而已。

      摩摩呢個客席主持,當之無愧。

      刪除
    7. //好多人係先用基本分析定下買甚麼股,再用技術分析來找買入時機;而我就係先用基本分析定下乎合投資主題的若干「觀察名單」,再以技術分析找出在某個指定的時間點上,應該投資於哪一隻(或哪幾隻)股票。

      我都係。我會睇目標股票是否升破某些技術位作為入市/加注指標,持貨就用跌破某些技術位作為走人指標(我從不溝貨)。如果升跌背後有消息作為催化劑,成為長期趨勢的轉角位會更為準確,尤以跌破為甚(可能因為人性對同樣數額的利益,損失的痛感會比得到的快感來得大)。

      //嚴守紀律係「識投資」的必要條件。

      這就睇夠唔夠「conviction」。背後唔夠信念、只靠囫圇吞棗強記的紀律是很難嚴守的。

      //所有人都變得無耐性,但又沒有成功的捷徑,唯有就係降低要求,自我感覺良好地找一個 solution 出來。

      我覺得最大問題是很多懶人試圖找一個「一勞永逸」的方法等自己以後唔使諗(王子公主以後快快樂樂生活在一起...)係最大問題,而且這不只於資本投資範疇。但世界「變幻原是永恆」,背後有一套心法監測住、而且有隨時糾錯進步的勇氣和魄力才是王道。

      //我唔會責備呢種人,只係會覺得佢地幾可憐:被逼放棄天神村裡的快樂生活不特止,仲要搞到去打越戰。

      只能怪呢幾年全世界都QE.。80年代閒閒地7-8厘活期儲蓄利率既年代我有生之年都唔知返唔返到黎。

      //摩摩呢個客席主持,當之無愧。

      多謝。好說。

      我最後推薦給呢位留言讀者的是,是在YouTube搜「英sir」或「自己做fundman」,犧牲一個下午陪屋企人或睇書(肯定不是投資書)的時間,睇晒頭兩季這個我認為非常好的投資者入門教育節目。你未必要跟住佢做,但起碼請去打仗前,知道戰爭是什麼一回事。

      刪除
    8. 寫漏幾個point。

      //不過,我城市場的ETF種類不多,尤其缺乏收息類或房託類的ETF,不能滿足我的資產配置戰略需要,結果都係要以投資個股及海外市場配合。

      認識各類非指數、尤其海外的etf,本身就需要投資知識。

      //如果講緊係「交晒學費瞓落金魚缸」呢種「銀行門口C9式」的「投資」(跟我個老粗堂阿哥一樣),那所謂的「識」其實只是在「執行上層次」。

      即是類似個個禮拜去踢波,但從不操練,亦從實戰中反饋經驗。這絕不是什麼「學費」,因為「學費」是要「學習」的,重複自己的錯誤無限次毫無寸進,這並沒有任何「學習」成份。

      //我心目中的「識投資」,係指依照自己的 financial objectives 去砌一個組合及計劃,並且 set 好 rules 去確切執行,體現出自己的戰略和戰術構思。

      當然還有長期回報是meet到自己的financial objectives ,才能為之叫「識」。

      刪除
    9. //背後唔夠信念、只靠囫圇吞棗強記的紀律是很難嚴守的。

      我成日話港豬是「高學歷,低學問」,源頭就係鼓勵以應試技巧壓倒一切的教育制度。

      //我覺得最大問題是很多懶人試圖找一個「一勞永逸」的方法等自己以後唔使諗(王子公主以後快快樂樂生活在一起...)係最大問題,而且這不只於資本投資範疇。

      其實呢個又係loop返去「搵必勝的model answer」的迷思:獨孤求敗的武功是融會貫通,從有招進化到無招;但對於在填鴨式教育中長大的港豬來說,你叫佢地「融會貫通」,使出自己的一套心法武功,佢地係會覺得好唔踏實的。你睇下唔少財博及其留言者,好多時都會 quote 甚麼甚麼名人金句,甚至有時係 quote 埋啲偽金句偽託權威都要拋書包,就合港豬們對「自己理念自己講」係幾咁無信心。

      伸延閱讀:
      簡易數學(七)之愛因斯坦沒告訴你的事:複利的威力
      http://magician__yang.mysinablog.com/index.php?op=ViewArticle&articleId=11742356

      //是在YouTube搜「英sir」或「自己做fundman」

      黃國英算是一個比較正氣的財演。

      //認識各類非指數、尤其海外的etf,本身就需要投資知識。

      懶人最大的問題就是沒有興趣去為自己升呢,而只係想做伸手黨跟人隊尾,殊不知「跟人」只係「知其然不知其所以然」,遇上突發事情時唔識變招,反而增加了風險。

      //重複自己的錯誤無限次毫無寸進,這並沒有任何「學習」成份。

      呢類人多數是無心亦無力,唔想學,亦無能力學,只係去「伸手跟人協會」做個會員:所謂「學費」,其實只係「會費」。

      刪除
    10. 我都寫滴咗:

      //你收到股息再買返落去已經唔係純粹嘅一次性投資

      坊間好多財博提都好buy「複利的威力」, 但又想企業派息. 其實複利的威力會隨 human intervention 而遞減, 「複利的威力」排序依次為:

      不派息,資金留在企業再投資(例如巴郡) > 以股代息(例如匯控) > 手動股息再投資 (例如魔術師複式盈富組合) > 派息給投資者.

      刪除
    11. 觀乎各位都係一生志願追逐爆升股嘅高手,我覺得自己投資理念同各位唔係好同,我諗我都係時候退場。

      自問唔係咩又痕又怕痛之輩,只係彼此理念不同。如果各位都覺得小弟唔似無的放矢之徒,想了解一下我嘅投資理念,可以睇下John Bogle或者Burton Malkiel嘅著作,又或者台灣 綠角嘅blog。

      多謝各位幾日嚟賜教。

      刪除
    12. //我無心去鑽研投資
      //想了解一下我嘅投資理念,可以睇下John Bogle或者Burton Malkiel嘅著作,又或者台灣 綠角嘅blog。

      自相矛盾。

      刪除
    13. Ken Wan:

      //睇下John Bogle或者Burton Malkiel嘅著作
      我沒看過John Bogle 和 Burton Malkiel 的書,看來Ken君話自己「無心鑽研投資」實在自謙得過份。
      講書的話 Joseph 應是閣下的好對手。

      http://dreamandinvestment.blogspot.hk

      //觀乎各位都係一生志願追逐爆升股嘅高手

      但Ken君呢一句似乎「露了底」。你初頭問我有關月供股票的看法,我好言回應並分析了定期、定額、定量的分別,但誰知道你又話題一轉,話「月供又好,定額抑或定量甚麽都無所謂」,走咗去講指數投資:
      1. 我自己傾向buy and hold,優質股唔怕長期持有
      2. 無人可以預測市場
      3. 鑽研投資,付出時間心血同成果唔係成正比
      然後再問我點睇。
      我的回應是花多少時間鑽研年報等等是個人好惡選擇,不過我也唔認為時間心力的付出跟回報成正比。另外,我也給你的幾篇伸延閱讀,內裡載有我的投資理念,操作方法,和持股組合等。
      假如你有仔細閱讀的話,你會發現我都持有唔少,包括 Vanguard 在內的ETFs。我亦都有講過由於我城某些種類的ETF不足,需要進軍海外市場的問題。
      在資產配置方面,我的伸延閱讀已經講述了個股和ETF都係我達成 financial objective 的工具,並附上實際投資組合。
      只是閣下似乎沒有看過,你問我點睇似乎只係想我贊同你,否則應該不可能達到「魔術師是一生志願追逐爆升股的人」這結論。
      你問我點睇,我有回應,甚至回應得更多,容許你有思考空間,但你明顯沒有看過,反而只是在自說自話(Roger?),還硬給我安上「追逐爆升股」的「高手」呢個角色。

      //又或者台灣 綠角嘅blog。

      綠角我為什麼沒有看過呢?我在「拒交陀地」系列不是多次指出他作為一名「開班奴」,收費教人以 Effectively Connected Income 去問美帝政府退稅,實際上是有逃稅之嫌嗎?

      https://magicianyang.blogspot.hk/search/label/拒交陀地

      //如果各位都覺得小弟唔似無的放矢之徒,想了解一下我嘅投資理念,可以
      //多謝各位幾日嚟賜教。

      怎麼說呢?先自謙一輪,然後旁徵博引,沿途自說自話,最後話「你都係唔明架喇」,再叫人睇書:
      在宗教領域,這叫傳教;
      在投資領域,這叫sales(賣基金、保險)
      在政治領域,這叫黃C。

      摩摩:
      //自相矛盾。

      自謙變虛偽,以「扮矮人」方式去挑戰客戶,讓客戶覺得自己原來很無知,呢種口吻通常在保險界中見到。

      用語理分析去找破綻,你就會覺得前文不對後理的人(通常係不學無術,只係識拋書包的 sales)很可笑,唔會激氣架喇!

      刪除
  3. 無錯,我就係儲夠N手先買貨既人,係可以平均成本啊,不過係「平均地高成本」,哈哈。所以有人SELL月供股票/基金,咪問下佢,平均成本係指平均高成本定低成本?LOL睇下佢點答

    要真正做到平均低成本,只有係熊市出盡奶力買貨,熊市過後所買既貨已經好難拉高成本。不過,敢咁做既人又有幾多呢~

    回覆刪除
    回覆
    1. //要真正做到平均低成本,只有係熊市出盡奶力買貨,熊市過後所買既貨已經好難拉高成本。不過,敢咁做既人又有幾多呢~

      價值信徒最叻就係無限補時,磨爛蓆直至價值回歸。

      刪除
  4. 即使月供當儲蓄,始終要靠揀股票的眼光。如果早十年高位開始月供思捷,就點平均成本都只會喊得一句句。

    「每次一儲夠錢就買一手」,我即刻諗到如果系茅台的話點實行...

    回覆刪除
    回覆
    1. //即使月供當儲蓄,始終要靠揀股票的眼光。

      月供都係指數ETF穩陣好多。

      //「每次一儲夠錢就買一手」,我即刻諗到如果系茅台的話點實行...

      無止境的等,不禁心動搖。

      刪除
  5. 月供梗四叔,地鐵,领展。當儲蓄,反正又以股代息又派红股,碎股就冇所謂了。
    一心储股,為將來製做股息收入。

    回覆刪除
    回覆
    1. 我只會以股代息. 月供金額對身家的比例太低, 唔再係重點; 要儲股就用資產配置資金調配形式增持.

      刪除
  6. 仁者壽,躁者夭!意見觀點交流貴在各抒己見,何必人身攻擊、貶低別人抬高自己?!看到這些無禮的回應實在超不爽!

    回覆刪除
    回覆
    1. 摩摩或者燥咗啲, 言辭中攻擊力太高,我在此先道個歉先!

      不過又咁講,我又睇唔到摩摩如何「人身攻擊、貶低別人抬高自己」的成份. 現時坊間流行一種歪論, 就係如果自己感到被offend, 就叫「人身攻擊」,希望匿名君唔係呢個意思.

      人身攻擊
      廣義的人身攻擊(personal attack; name-calling)指在溝通對話時,攻擊、批評對方個人因素相關之斷言或質疑;如人格、動機、態度、地位、階級或處境等。若進一步以此作為論證之基礎,而作出與前提不相關的結論,則是訴諸人身的謬誤。
      狹義的人身攻擊必須具備主體、客體、攻擊行為、實質損害發生,這四者缺一不可。如果沒有攻擊的人對受攻擊的人做出攻擊行為,這個行為必須有實質損害的發生,無法證明完成此行為並產生實質損害,是無法討論人身攻擊的。狹義的人身攻擊經常以謾罵的形式表現。
      哲學家李天命認為,只要沒有將品格批判當做駁論的理據,批判他人就沒有犯訴諸人身的謬誤。否則父母責罵子女,法庭判辭批評罪犯的操行,便全都犯上訴諸人身的謬誤了[1]。

      刪除
    2. 躁,我認; 下文再說。

      人身攻擊,正如魔兄所言,我所有言論都是根據這位ken君的留言意見,我亦對ken君在留言外的其他背景亦一無所知,想"攻擊"其"人身"亦無從談起。

      貶低ken君的看法,這是一定的,因為我強烈感受到其"我要吃牛,但殺牛等dirty job就唔好搞我"的arrogant心態,說難聽點,何只"又痕又怕痛",直程"何不食肉糜"!

      "我無心去鑽研投資"絕對不是問題,投不投資鑽不鑽研是個人價值觀取向,沒有對錯之分,我身邊好多人有啲無投資開的,吹開水會講下投資,但我俾下提議後佢地無再跟進,我亦不會有什麼意見; 不準備投資而對市場或投資技巧大放厥詞的,我亦只會一笑致之(比以往凡事爭辯大有進步,哈哈)。

      但你講明無心鑽研仲大放厥詞(第1和2點,雖然戴晒頭盔話"我無辦法知道啱定唔啱")後,一個屈尾十話"有咁上下回報就得",但又要"我情願留返啲時間陪屋企人,睇多兩本書","要食牛肉但劏牛唔好搞我"的對市場和投資的arrogance就躍然mon上...之後仲要憑空度一個可以"不沾鍋",劏一次牛就以後有牛肉食的方式! 作為一個曾經被市場打到半死,後來幾經鑽研磨練才重新活過來既活躍投資者,我看到咁arrogant既睇法才是非常不爽就真,所以迫不及待以arrogant的語氣回應。況且,一個對投資市場咁arrogant既投資者,預言其會變"水魚"也不是什麼"人身攻擊"吧?

      至於"抬高自己",我覺得反而是ken君的言論貶低了一眾勤勤勉勉並且持續進步的業餘/職業投資人才對。

      //黃國英算是一個比較正氣的財演。

      黃國英係小弟偶像,11年睇佢本簡體版的«全勝牛熊»大大扭轉小弟投資甚至處事理念,當然其串咀作風亦很啱小弟何車。可以睇睇佢呢個有啲長既訪問,開頭有佢講串咀同humble既睇法:

      https://youtu.be/iF1ZvexWbO8

      簡單講,就是其自認為對市場好humble,串咀只是對"對市場唔humble既人而言"(例如今年年頭起睇淡足三季,但hsi就升足三季的沈大師)。

      我去過黃國英啲投資講座,佢真係會窒啲問廢問題既觀眾,例如明明講咗邊幾隻係廢股,Q&A時候仍然不假思索問: 呢隻(廢股)點睇?

      我要對魔兄道歉,因為始終因為我的躁進搞串咗你個主場; 我亦要對自己道歉,因為始終未戒甩"唔抵得頸的急躁"; 但我不會為自己對ken君留言的貶抑評論道歉,因為如果我戒甩躁進,我只會好似黃國英皮笑肉不笑咁串得佢更厲害!

      刪除
    3. //殺牛等dirty job就唔好搞我"的arrogant心態

      其實好多港豬都有呢種做大爺心態:我唔理,我出咗錢,你就要幫我搞掂佢。

      「而家我回報要求唔係好高」,ETF should be doing its job。

      //對市場或投資技巧大放厥詞的,我亦只會一笑致之

      潮流興「謙卑」,所以偶像博客成日講到自己乜都唔識,樣樣嘢在佢眼中都「好神奇、好厲害」,卻依然可以周圍供稿,人氣大旺。

      在早前對Ken君的回應,我分享了幾篇講述我投資理念的舊文,誰知 Ken 君呢位「文科仔」(我最討厭人用「文科人唔識計數」來做藉口)卻只以一句「無興趣鑽研投資」來回應...但之前作佢又言必 Ken Fisher,我又真是摸不著頭腦:

      https://en.wikipedia.org/wiki/Kenneth_Fisher

      //投不投資鑽不鑽研是個人價值觀取向,沒有對錯之分

      同意,所以我其實唔係好明 Ken 君問我對佢個人好惡「點睇」的意思。

      //況且,一個對投資市場咁arrogant既投資者,預言其會變"水魚"也不是什麼"人身攻擊"吧?

      總好過預言「如果我城要毀滅」嘅。

      //例如今年年頭起睇淡足三季,但hsi就升足三季的沈大師

      呢類「大師」係我城特產來的。

      //佢真係會窒啲問廢問題既觀眾

      俾著我都會。

      //我要對魔兄道歉,因為始終因為我的躁進搞串咗你個主場; 我亦要對自己道歉,因為始終未戒甩"唔抵得頸的急躁"
      //好似黃國英皮笑肉不笑咁串得佢更厲害!


      嘻嘻,算喇摩摩,要做個串人唔容易的。 XD

      刪除
  7. 嘩隔幾日冇睇咁熱鬧嘅?

    //公式我睇唔明

    呢啲個人投資其實要幾多數學?要理科程度數學先至明白?

    回覆刪除
    回覆
    1. //嘩隔幾日冇睇咁熱鬧嘅?

      鬼咩, 重九先同人鬧交, 真係留返拜山先講嚕...

      //要理科程度數學先至明白?

      藉口嚟啫. 難得呢位Ken君無興趣研究投資,卻依然睇咗咁多投資書, 真係難為咗佢咯.

      刪除
    2. 哇,你地講野有骨過我咁多,因住又俾人話你地早夭呀 XD

      刪除
    3. //哇,你地講野有骨過我咁多

      咁我真心想問,如果我死蠢到連加減乘除百分比一次方程式代數都唔識不特止又懶得去學,掛住一個月睇三十本書,可唔可以做個人投資啫...

      //因住又俾人話你地早夭呀 XD
      //仁者壽,躁者夭!

      嘩邊嗰咁涼薄!XD

      其實應該喺"靜者壽",孔夫子冇話"躁者夭"㗎啵。

      //是在YouTube搜「英sir」或「自己做fundman」,

      射射摩兄推介, 都算喺引出咗啲好嘢益咗我呢啲街坊嘅!



      刪除
    4. //早夭

      四張機,鴛鴦織就欲雙飛。可憐未老頭先白,春波碧草,曉寒深處,相對浴紅衣。

      瑛姑同周伯通個仔就早夭...我地就「四張幾」,點叫得做早夭呢?

      //懶得去學,掛住一個月睇三十本書,可唔可以做個人投資啫...

      你已經投資在自身喇!

      //孔夫子冇話"躁者夭"㗎啵

      燥者俾人D就有之。

      //引出咗啲好嘢益咗我呢啲街坊嘅!

      摩摩不耐都有唔少好嘢益大家的。

      刪除