摩摩電影節之《五億探長雷洛傳II之父子情仇（Lee Rock II）》：爹親娘親不及事頭婆親

吖，劉華２６年來的雷洛都無乜變，咁唔知佢做返楊過又得唔得呢？


上集講到雷洛（劉德華飾）重遇帶埋個仔偷渡落嚟，在藤器廠打工的舊情人霞女（邱淑貞飾）。二人叙舊，霞女介紹兒子，名字叫做雷仲賢；又話自己一生人只跟一個男人扑過嘢，暗示自己咁多年來都非常 dry：

呢一段講雷洛以私人獎金勸降銀行劫匪伍克平（張達明（唔係藍大嗰位）飾）跟劇情跟主線劇情無關，但雷洛先提高獎金至一萬，再倒扣來逼伍克平就範的橋段實在是頗有趣味，亦證明由龍獅時代的小毛賊到現今世代的黃Ｃ佔派、「散後組織」，在利益面前，義氣一定是第尾：

為了跟顏同（秦沛飾）爭坐油尖區的探長位，雷洛委託豬油仔（吳孟達飾）找來老鼠明，要得到油尖區的黑道情報：

雷洛老婆白月嫦（張敏飾）出身黑道，不是一般的港女，竟然歡迎雷洛接霞女入門，條件只係扑嘢不准太大聲。可惜好景不常，龍獅政府竟然在這時宣佈廢除納妾，奉行一夫一妻制，並且要由公墓園以身作則做起。嫦去找霞女，疑似叫佢死咗條心，點知見到霞女竟然帶有雷洛的家傳玉墜，方知自己才是真正的小三。霞女怪天怪地都只能怪自己命苦，留下玉墜和書信，帶住賢仔遠走他方：

顏同獲得各大黑道撈家支持，以大量資金賄賂鬼頭一哥。成功靠外父幹，嫦父白飯魚提示雷洛，要向經常過大海輸錢的一哥嫂埋手。跟數十年後的許係人一樣，一個人大花筒就易被人乘虛而入，更何況當時一哥嫂仲惡過龍蝦，可以直接登堂入室去一哥辦公室，在事頭婆幅玉照之下叫一哥睇雷洛交來的文件？

原來當年一哥可以隨時開新位，唔使經財委會批准亦無販民拉布，於是在顏同升任油尖區探長之時，雷洛卻已空降到自己設下來的總華探長一職，治得顏同死死的：

雷洛化身民間特首，在黑警大會中提出了「施政報告」，將收規常規化、制度化，又將黑金按比例分給各級黑警，儼如「員工福利」，更離奇的是引入類似美帝的選舉人制度去以人口及收入安排各區的大檔粉檔雞檔等：

在雷洛治下，當日慧眼識英雄的毒梟跛豪是既得利益者，於是叫一眾手下幫手維持治安，警民合作，將我城打造成亞洲最宜居的城市：

顏同慫恿利益受損的毒品拆家老虎蟹（陳惠敏飾）去殺雷洛。顏同收買了黑警，竟然整個差館都可以去了開小差賭錢，無人落案，殺手乘機下手。只是黑警家眷的嫦又竟然可以在警署自出自入，湊巧告知了雷洛警署竟然無人，救了雷洛一命。顏同怕東窗事發，便殺了老虎蟹滅口：

雷洛早着先鞭，在未有職業英語計劃之前，便自行進修英文，又引入關公，叫眾鬼頭黑警一齊將燒豬分而食之，自此關二哥便升格成為受黑白二道景仰之人物。另外，雷洛的生意愈搞愈大，貿易地產旅遊夜總會乜都做，黑錢愈洗愈多，就連跟佢搵食的豬油仔和老鼠明都可以身光頸靚。但就在這時，事頭婆調來了新一哥：

新官上任三把火，新一哥發現當時的我城其實其唔係咁美好，要求雷洛撲滅黃賭毒。雷洛順水推舟，洗太平地十天，逼得那些毒友企街出來「違法達義」，進而集體被投案，逼爆差館。雷洛又發動輿論攻勢，要功夫茶日日寫衰新一哥，逼佢撤銷「除三害」運動：

在一個酒會中，雷洛巧遇即將成立老廉的卡達先生及其助手比爾（郭富城飾）。比爾怒斥雷洛就是搞到我城變到如此此不義的罪魁禍首。雷洛以笨土理論，中國人不要跟鬼頭打工來勸降比爾，比爾卻串返雷洛轉頭話一個都係鬼頭啫。其實大家都係打事頭婆工，有乜好爭呢？最後雷洛發現比爾原來就係長大了的兒子雷仲賢：

豬油仔找到了霞女，原來當年霞女去了澳洲打工，供了賢仔讀大學。賢仔黃Ｃ上腦，阻止雷洛見阿媽，唔止 unfriend 老豆，仲要大義滅親，立誓親手拘搞呢位不義老豆，激到霞女病發暈倒。賢仔又想阻止雷洛去探望霞女，結果俾雷洛用猿司長的前身律政師大返轉頭：

米帝想將雷洛拉下馬，便使出絕招，以政治手段對付。一哥先重整架構，以大量新華探長沖淡舊華探長，搞亂雷洛早就建立好的制度；又將雷洛升職，實際削權，並提拔藍剛與顏同取代。雷洛見米帝今次來勢洶洶，知道無法與抗，便申請提早退休，撒資準備移民楓葉國：

老虎蟹細佬從荷蘭回來要幫大哥執仇，顏同將罪名到雷洛身人，實行借刀殺人。雷洛在榮休宴中，接到霞女病重的消息，趕忙去探望，點知遇上汽車炸彈與及歹徒襲擊。雷洛腿部中槍受傷，搞到一褲都係，但依然硬挺住去見霞女，嚇得賢仔呆住。賢仔將「害死阿媽」（點害法？）的罪名賴在雷洛身上，唔肯跟父親一同出霞女面前出現，一家團聚；最後幸得豬油仔點醒，賢仔肯去「做埋最後一場戲」。雷洛安慰霞女，一家人將來可以去旅行，點知講得無幾句霞女就嚥了氣，看來唔去旅行真係會死：

霞女臨終前將雷洛的家傳玉墜交給賢仔；但霞女一死，賢仔便將玉墜交還雷洛。這時槍手殺到，賢仔竟然一翻身可以將霞女的病床反轉當盾牌，仲企圖抱屍逃走。雷洛勸服賢仔放下霞女，二人一起逃走。雷洛父子發動主角屈機大能，自己最多只受小傷，但槍手卻個個瓜直。父子倆墥穿了無數塊玻璃，終於無穿無爛咁逃到天台。雷洛叫賢仔獨自逃命，賢仔當然唔客氣，但走走下卻在路中拾到家傳玉墜（塊玉墜識瞬間轉移？）：

顏同封鎖了醫院，上到天台想親手了結雷洛，但卻給雷洛的手下反包圍。雷洛打了顏同一身，為霞女出氣（暗示當年東頭村大火的顏同做的？）。這時賢仔因掛念玉墜主人折返，唔知係唔係聽到雷洛咁有情有義，便原諒了雷洛，選擇性執法以貪污將顏同拘捕，仲要大大聲聲話係「父子勾結」：

最後，一眾黑警包括雷洛的心腹與及顏同都被老廉請去飲咖啡，而雷洛則遠走楓葉國安享晚年，並道出了「做人咁辛苦就係為了食飯」這個馬屎撈最底層的需要：

＊＊＊
與其話「雷洛傳」係人物傳記，倒不如話係「架空人物傳記」：第一集仲有少少俾觀眾睇到人物原型係呂樂（對白發音亦「呂樂」而唔係「雷洛」），算係小子向上爬，成為白道中的黑道大王為結；但第二集卻是完全失控兼虛構，個所謂父子情仇的劇情可以放落去求其掛一個名的人物處亦無大問題（例如楊過 vs 楊康）。人物有幾反智就幾反智，就算唔好話顏同不復當年咁老謀深算（竟然不知就裡，沒有情報，連雷洛另外開個總華探長的位子俾自己都唔知），讀番書的海龜賢仔更是無厘頭將自家的不幸懶在父親身上；比較正常的，就只係雷洛發表「施政報告」將黑道規範化，又跟新舊鬼頭一哥玩嘢，同埋米帝點樣明升實降削雷洛權嗰幾段，不過都唔係無 bug：以雷洛性格，會咁快認輸知道唔夠米帝鬥，搵定後路走人？
另外，本片其他黃精式唔認真，求求其其的地方都唔少：例如雷洛幾時俾個玉墜霞女，等佢可以戴住同元配老婆見面？點解在醫院中，玉墜可以忽然出現在梯間？槍戰中主角不死，無限子彈等等都唔使再講...
可能，第一集都叫有個 framework 俾個劇本去跟，第二集就只有 ICAC 和雷洛遠走楓葉國做骨幹，主線係自由創作就搞到成地都係 bugs，足見在８、９０年代我城影圈都叫輝煌的日子，其實啲劇本都係好Ｘ的。
＊＊＊
伸延閱讀：
摩摩電影節之《五億探長雷洛傳：雷老虎（Lee Rock）》：黑警便是這樣煉成的
不去旅行會死？