魔術師資產配置（２０１７年９月結）

本月亞太區及港美股市均有調整，不過沉船基金受惠於歐股反彈，竟然能微升少許收市，收報＄１５５.３２，保持領放；複式盈富當然無驚喜，隨大市下調至＄１４０.１４，排第二；第三名依然係生活基金，收報＄１２６.９１；房託組合以＄１２５.４１緊隨其後，暫時仍然未能超越前者進佔三甲。
第五名係強積金組合，由於一早已將恆指基金調往環球債券，收報＄１２２.２３，損失比複式盈富輕微；第六位係合格線債券及現金組合，收＄１１４.８２；商品組合死貓彈完又再回落，收報＄１０３.３３，敬陪末席。
整體上除商品外，所有投資組合回報皆在合格線之上，表現合理：

至於財務計劃方面，魔術師上一個７年計劃係身家（資產淨值, Net Asset Value（NAV））要在期內增值１００％，結果係超額達標，在６年內完成，第７年結算為身家達原計劃的１２１％。今次魔術師改以短年期計劃代替，就係在３年內，即２０２０年１０月前，淨流動資產達至８００萬（我城貨幣，下同），理論上足夠做「專業投資者（Professional Investor, PI）」踩入私人銀行的門檻（當然實際上魔術師的資產分散在各大銀行及經紀行，不會歸一集中做私銀）。

其實魔術師都有諗過，現時淨流動資產都已經超過７００萬，今次的目標係三年內增值幾十萬，會唔會太過保守呢？不過只要再細心睇返自己盤數，三年內樓當然不可能供完，但信用卡分期還款就剛好完成；亦即是說，三年後的流動負債主要只包括１２個月的樓按貸款。
相反，如果係兩年計劃，則到時的流動負債會主要包括１２個月的樓按貸款加上１２個月的信用卡分期還款；換句話說，除了最後１２個月，分期還款在會計上是不會減少流動負債的。
畢竟，還款就是為了「縮表」，只減了長期負債，對流動負債沒影響實在接受不來，為了令自己的心理好過一點，於是魔術師便將計劃加多一年，起碼還完款都叫做有個結果吖馬！

＊＊＊
伸延閱讀：
信用卡分期不「裸借」