2017年10月29日 星期日

繳費「零」的 error message

魔術師是一個十分 old school 的人,錢銀嘢多數都係用電腦網頁版搞,唔會用手機做,貪網頁版睇得多啲清楚啲,亦無咁容易按錯掣。日前坐言起行,便要經網上繳費靈從大貓銀行調配資金到一窿證券準備行使盈富基金10月份認購期權(見《魔術師資產配置(2017年10月)》),誰知竟然出 error message,轉唔到賬;於是魔術師又發揮電車男精神,嘗試幫繳費靈 debug,最後雖然將轉賬數額調到低至5萬個我城大洋,但依然是殘念:

Error code 如下:
(圖片來源:繳費靈 > 一般取消原因編號, retrieved on 28 Oct 2017)
印象中魔術師最近並無報失或更新過任何銀行卡,究竟係發生咗乜嘢事搞到繳費靈變繳費零呢?

這天趁午飯時間便到公司附近的大貓分行 walk-in 查問,接待魔術師的是一名貌似剛畢業很 green 的「客戶經理」。出乎意料地呢位後生仔真係頗為 attentive to details,竟然先問魔術師的繳費零戶口是否跟大貓戶口連繫起來!
的而且確,繳費零係顯示唔到戶口號碼的!
客戶經理唯有相信魔術師一面之詞,再去查找魔術師戶口的轉賬限額,似乎無乜問題:

但其實,根據大貓的說明文件,繳費零轉賬限額 default 就係10萬個我城大洋,根本無得客戶去更改:
(圖片來源:HSBC Hong Kong: ATM Card User's Guide, retrieved on 28 Oct 2017)
客戶經理只好心不甘情不願的致電後勤部查問,結果後勤部就俾返繳費零個 hotline 佢打去問!
睇佢個樣似乎真係已經被班後勤部玩到怕。
客戶經理打去 hotline,開着擴音器,電話錄音劈頭第一句就話:「多謝致電易辦事...」
客戶經理的確是太年輕了,以為打錯電話,馬上便 cut 了線。
魔術師便提醒他:「繳費零個 system 係 ride on EPS 的。」
這時魔術師隱隱覺得有點不妥
客戶經理便打第二次,聽了一輪電話錄音之後按掣,接聽電話的繳費零「客戶主任」竟然是個很老很電車的男聲。
客戶經理說明來意,往後便由魔術師 do the talk。
由於心中早有個底,魔術師很快便跟繳費零電車男確認了一件事:原來當年魔術師係以某張大貓信用卡在繳費零終端機啟動繳費零戶口,信用卡連繫到魔術師的大貓支票戶口,以後所用轉賬都是從支票戶口提款。早前魔術師買了 Mani Wonders Card Dispenser (見《Mani Wonders Card Dispenser 開箱》)之後曾重組了一次信用卡組合,將唔用的信用卡取消,而當年開戶的信用卡早就進入「荒廢」狀態,故此難逃一劫...
而問題就係,要經繳費零付款成功,淨係扣數戶口無問題係唔足夠的,當年在繳費零終端機碌卡啟動繳費零戶口的信用卡或提款卡都要生效,才可以確保轉賬成功。
要糾正錯誤好容易,只要用另一張連繫住扣數戶口的提款卡在繳費零終端機碌一次,更新紀錄便可。
魔術師便去就近的OK便利店辦理,取回收據,果然見到有一行係寫住卡面編號:

回家再細想,正如魔術師提醒大貓的客戶經理,繳費零係 ride on 易辦事系統。魔術師有理由相信當客戶以繳費零的網上或電話進行交易,繳費零系統其實就係以電腦模擬,扮用該張已登記的信用卡或提款卡碌一次易辦事付款,所以實體卡有其存在的必要。
哎,好好地的網上付款都搞到咁複雜,咁多年繳費靈仲係用緊舊思維抱殘守缺,我城仲話學人搞創新同 Fintech...真係搞條毛咩!
***
伸延閱讀:
魔術師資產配置(2017年10月)
Mani Wonders Card Dispenser 開箱

沒有留言:

張貼留言