乜ｓｉｒ學員有嘢問：債基月息是否由本派？

魔術師有好些舊同學、舊同事都係從事「理財顧問」（或直接啲講，即係「賣保險」）的行業。唔知佢地係唔係受過訓練，有一定的 script，開場白十之不離八九都係話自己對投資有幾無知，幾咁唔認識，要來請教一下魔術師，扮下矮人以滿足一下魔術師的虛榮心。
到得見到魔術師「上當」，順利打開話匣子，那時這些「理財顧問」便會話鋒一轉，講話魔術師的理念係幾咁有問題，然後就拋一輪書包，旁徵博引，引述一些名家大師之言，還魔術師覺得自己原來都很「渺小」。
對「理財顧問」來說，最理想的便是魔術師驚覺自己原來一直都自以為是，在自謙為「很無知」的「理財顧問」面前，無知又自大的其實是魔術師自己。
就在魔術師氣餒沮喪，頓覺自己只是「庸才」一名的時候，自不然會對比「無知的魔術師」略懂多一點點的「理財顧問」言聽計從（魔術師要去問真高手嗎？人家才不理你呢！都係只係搵個比自己叻少少的「理財顧問」俾意見好啲！）。
當然，世間事不會太理想。
魔術師沒有受過類似的銷售訓練，不知道這些捉緊客戶心理的 script 有沒有什麼名堂；不過魔術師只知道，十個有十個「理財顧問」，去到拋書包的 step，就已被魔術師「打」到落荒而逃。
又咁講，職業無分貴賤，做 sales 推銷產品本來是正當行業，魔術師對其本質上並無惡感；sales 形象低，主要係來自邪門的銷售手法：你唔係去聆聽並明白顧客所需，再做 consultancy 或 advisory，而係去 manipulate 客人的心理或需要，催眠客人製造需求，令客人當刻覺得有需要去買某些產品，但冷靜下來客人卻發現不是那麼的一回事，最後投訴無門，所以才有「sales 呃人」之說。
我城開班財演多如恆河沙數，打開 Facebook 實會見到有關的面書廣告，但其中最出名的開班又非最鍾意要其學員自認「庸才」的，就非乜ｓｉｒ莫屬。
這天閒來無事，走去睇下乜ｓｉｒ那些疑幻似真的讀者／學生來信，竟然見到乜ｓｉｒ話「有同學問債基派出的息是否由基金本金中提取？」乜ｓｉｒ作為城中著名的良心導師，當然需要澄清：

（圖片來源：債基收息的風險與回報10年期剖析 #1446， retrieved on 29 Oct 2017）

（題外話：乜ｓｉｒ的讀者／學生來信好鍾意話跟乜ｓｉｒ「相逢恨晚」。要知道「相逢恨晚」係雙向嘅，讀者／學生取得乜ｓｉｒ的「寶貴意見」，學識一拆二、按爆八成、借貸力由無變有、做埋劏房收租仔、有剩錢拎去債基疊增，的確係「恨晚」：而乜ｓｉｒ相金先惠才會額外留神，當然都係「恨晚」：正是姣婆遇着脂粉客也。不過，最近「相逢恨晚」的「歪風」，似乎吹到財經博客之上（見伸延閱讀），魔術師見之不禁失笑：你做伸手黨得的是免費資訊，當然是「恨晚」，但人家回應你可是要花氣力的，恨不恨晚就難說得緊了。要知道雙方付出根本就不對等，何來「相逢恨晚」之有？其反智之處及其中文程度之低劣，可以再從伸延閱讀之中理解一下。）
又會咁啱嘅，魔術師想起日前《債基月息從本派？》，馬上便要對號入座，原來該文有４千幾 hits （截至２０１７年１０月２９日），睇嚟真係唔少人關心債基派息問題，搞到一個月內可以累積到呢個瀏覽率，對魔術師來說已經算係非常唔錯的成績。究竟呢４千幾 hits 之內，會唔會有乜ｓｉｒ的學員在內呢？

其實要 search 乜ｓｉｒ個推介其唔難，都唔知佢左遮右遮做乜。唔通佢班學員都係飯來張口，衣來伸手的伸手黨？

（圖片來源：聯博基金的派息組成情況，retrieved on 29 Oct 2017）

上圖紅色框框的疑似就係乜ｓｉｒ推介。當然魔術師唔係要拆乜ｓｉｒ大台，先睇呢隻乜ｓｉｒ 無 highlight 但在 Fun 超市都有推介的聯博－環球高收益基金（AB Global High Yield Portfolio）（AT HKD）:

（圖片來源：聯博－環球高收益基金（AT HKD），retrieved on 29 Oct 2017）

可以見到此債基價格表現尚算不錯，但如果係靠佢每月派息做現金流，呢一年來就愈派愈縮。而乜ｓｉｒ早前亦有提及以澳紙債基賺盡匯水變動之法，所以就順便睇埋聯博－環球優越收益基金（AB Global Plus Fixed Income Portfolio）（AT AUD H）：

（圖片來源：聯博－環球優越收益基金（AT AUD H），retrieved on 29 Oct 2017）

魔術師只能夠話以澳元計價格變動不大（所以乜ｓｉｒ才鼓勵學員炒價），每月派息亦甚為飄忽，時多時少，魔術師就唔建議用佢來做固定每月現金流的收息組合成員了。
再睇返聯博基金的派息組成文件對「可分配淨收入」的定義，可謂跟安聯基金的定義類似（見《債基月息從本派？》）：

從 2013 年 10 月 29 日起，本文件內的可分配淨收入之計算方法已變更。以新方法計算的可分配淨收入是指本月份就有關股份類別的淨投資收入或包括本財政年度內以往月份
(如適用) 之盈餘 (即股息加上利息收入減去費用及開支)。可分配淨收入並不包括淨實現收益 (如有)。

比較聯博－環球高收益基金（AT HKD）（下稱「聯博」）及早前在《債基月息從本派？》中提及的安聯動力亞洲高收益債券基金 (美元) AMg 每月派息（下稱「安聯」），睇勻全年，以每月派息論，聯博雖然都有從資本派息，但派出的百份比較安聯少；不過安聯就善用從資本派息來「維穩」，致令每月派息保持不變，令投資者容易計數，不似聯博咁實牙實齒地減派息。派息政策可謂各有優點。
不過睇返兩年圖，以回報來說，安聯就似乎稍勝一籌了：

（圖片來源：Fundsupermarket.com > 圖表中心, retrieved on 29 Oct 2017）

＊＊＊
伸延閱讀：
Fundsupermart.com：高現金派息類別——債券基金（２０１７年１０月）
天路客：我在IB第一次買債券的流程（yogie4/12/2017 2:40 下午）
債基月息從本派？
電車男的職業病