2017年11月26日 星期日

被實習對象

做完手術後,魔術師被推回病房,這是醫護發覺魔術師的膀胱頗脹,便由兩男護士幫魔術師插尿喉,然後以心外壓的手勢擠壓魔術師的小腹以助放尿,尤幸當時麻醉藥力未過,倒不疼痛;反而兩條男護竟然鬥估可否幫魔術師放「一公升眼淚尿液」出來,倒是令魔術師不知好嬲定好笑。
不過,在幫病人放尿這等「厭惡性工作」中,二人能夠苦中作樂,輕輕鬆鬆,態度頗是正面。
再過了一天,魔術師便被調去康復大樓,要跟這個可愛的骨科病房說再見了。
遺憾的是,魔術師始終分不清楚那些白色制服或 工作服中的些微分別,如何代表了護士的職級和工作。
(按:上網查找,原來我城醫管局是沒有統一醫護制服的,只有統一的工作服,這是甚麼道理呢?)
去到康復病房,多了唔少「阿姐級」的護士,後生女的比例驟降,可幸比例大約還有百分之五十的女護是可以一看的;反而,男護就後生仔多,目測只有一兩個叔叔級的男看護而已。
有趣的是日間會有東華醫院護理系的「小朋友」們由長毛導師帶領,實習一些簡單的非技術性工作,例如量血壓,篤手指度血糖等。見到那班就連有青的算不上的「小朋友」手忙腳亂,魔術師心中雖然失笑,但倒也暗地裡配合。
例如有一次正規看護(可惜是男!)要幫魔術師度血糖,萬事準備好卻遲遲唔篤落去,原來就係要等一班「小朋友」到來,看「大師兄」示範,並由長毛導師講解,「小朋友」們默站一旁抄抄寫寫...
奇怪的是,「小朋友」們竟是男多過女。
篤完手指,血糖度數正常,看護將一片消毒紙巾遞給魔術師按住手指的小傷口...
一名小朋友竟然識得「安慰」魔術師:「按住兩分鐘,好快就止血。如果有流血就話俾我地知喇!」
哈!呢班黃毛小子,真係當魔術師係阿公阿婆咁氹!
當然魔術師也不會口衰,只是點頭示意。
長毛導師見魔術師好相與,便走來表明身分,話自己帶住一班「小朋友」來實習。
其實長毛導師梗係唔會選個刁民維園阿伯給學生仔們實習,魔術師斯斯文文,當然是個適當人選。見到那班跟平時在傳霉見到的有青大不相同的「小朋友」,自然十分支持:「係囉!後生仔係要支持下嘅!」。
然後,數日以來,那些幫助魔術師學習行走、恢復力量的物理治療師、職業治療師,都是年青一輩的。似乎都不是坊間經常墥口墥面的「有為青年」。
究竟,黃C巷蜀憤世嫉俗的有青究竟代表了多少民意呢?
***
伸延閱讀:
東華學院
公院新工作服防護士走光(蘋果日報 2015件4月16日)

【本報訊】護士在市民心目中傳統形象是「白衣天使」,白色制服是象徵,醫生則多穿恤衫、打呔兼外披醫生袍,但公立醫院將於下年度推出新工作服,將現時橫跨醫管局轄下42間醫院和醫療機構近60款工作服整合為4款,分別供醫生、護士、藥劑師,以及營養師或物理治療師等專職醫療人員,在工作時穿上,如醫生和護士將分別改穿粉藍色和紫藍色開胸扣鈕衫褲。
方便休息和轉身
港島西聯網總經理(護理)李麗賢在醫管局刊物《協力》中表示,來自醫生、護士、專職醫療及藥劑部4個職系的代表組成工作小組,由前年10月起商討及進行諮詢,去年10月定出各個職系的新工作服款式。
據醫管局介紹,4款工作服均有針對各種職系工作需要而作出特別設計,例如護士的紫藍色新工作服有小企領設計,以減低護士們俯身照顧病人時「走光」的風險;醫生則為了方便他們通宵候命時可躺下休息,他們的粉藍色新工作服則以無領設計。
4款新工作服布料不能太薄,以免被「看透」,衫身亦只有少許修腰,方便工作時身體郁動轉身。但推出新工作服後,白袍西裝醫生和白色制服護士是否會絕迹醫院?李麗賢強調,工作服不是制服,各部門可決定是否需要穿工作服。公共醫療醫生協會會長陳沛然指,工作服可讓病人更容易分辨醫護身份。

21 則留言:

  1. 我住過多次醫院, 對這班年輕人真的冇投訴. 不過, 有專業精神不代表不激進, 不想笨土. 專業有人教, 政治冇人教. 說得漂亮是有理想, 現實是...... 撫心自問, 我們成年人又是否太苛刻?

    回覆刪除
    回覆
    1. //有專業精神不代表不激進, 不想笨土.

      成年人或者可以做到咁,但越後生既會越喜怒形於色,而影響到工作態度。就算唔影響到做嘢,但日常閒談話題一定有所反映,而且相由心生,激進或(因激進後絕望而)犬儒一定會寫在嘴臉上,這甚至連中年人都不能掩飾。

      我自己做過幾份工就深有體會,而魔兄經過上次份僱傭兵工作後體會應該比我更深。

      刪除
    2. 同意呀,摩摩。

      無錯,有專業精神不等於不黃C不笨土。但正是相由心生,我唔認為醫院班後生會係上次我在大檸樂遇到那種「我就是不喜歡拎住個背囊」而死霸住個位的有青。

      好多時激進的人都缺乏耐性,都是 Me Generation,而醫護人員卻需要細心,看到的多是更需要幫助的人,按道理應該唔會認為社會欠自己太多。

      巷蜀就更加係不曾理會過如何可以實行的「夢想」,同醫療界去找solution 的思考方式應該不同。

      上一份僱傭兵工作的小妹,佢地將自己定位為被客戶呼之財來揮之即去的「阿四」,又是被公司剝削的對象,心態完全不同。

      病房中只有CCTVB可看,尋日《新聞透視》有訪問一位為病患者工作的女黃C,話走去佔中,失敗後自己失落沮喪到要睇情緒病,呢啲就真係有樣睇。

      刪除
    3. "在大檸樂遇到那種「我就是不喜歡拎住個背囊」而死霸住個位的有青" 是自私冇家教, 君不見很多阿叔阿嬸在巴士上將包包放在鄰座,見你唔到見你唔到......與黃不黃C無關

      無論如何, 這班年青醫護以至所有肯努力的年青人值得支持鼓勵

      刪除
    4. 是的,肯努力的年青人是值得鼓勵的。諷刺的是,在我往年做義工的經驗裡,成績中等的是最有上進心,一頭一尾的反而難教。

      我沒有説過那位有青就是黃C呢!

      不過黃C跟有青(或其他自私無家教的人)的共通點是 自我中心,總會給自己的行為找個自我感覺良好的理由就是了。

      刪除
  2. 以前有個同學話佢割包皮時被用作實習對象,仲話在場的護士好靚靚,結果手術不太順利。XD

    回覆刪除
    回覆
    1. 哈哈,後生仔實在是太年輕了。手術不順利的結果是甚麼?會不會有後遺症? XD

      刪除
    2. 割包皮應該好細個做先至好,覺得姐姐靚靚已經遲咗啲啲 XD

      刪除
    3. 割完包皮未好,無得打JJ XD

      刪除
  3. 乜唔係做唔成醫生律師果班先有機會黃咩?
    我就冇見過「真.有錢人」或有本事嘅人黃。
    大部分嘅人其實唔理呢啲嘢!當自己時運高。

    回覆刪除
    回覆
    1. //乜唔係做唔成醫生律師果班先有機會黃咩?

      「髮正會司」班人咪係黃C劣師囉!

      醫生都好似有班黃C組織,不過搞搞下好似無哂聲氣咁。

      //我就冇見過「真.有錢人」或有本事嘅人黃。

      Wiki 王 應該係假黃 XD

      刪除
  4. //魔術師始終分不清楚那些白色制服或 工作服中的些微分別,如何代表了護士的職級和工作。
    (按:上網查找,原來我城醫管局是沒有統一醫護制服的,

    我記得喺高級嘅護士有戴帽或個帽款式唔同普通護士。不過真喺N年前同埋當時好細嗰可能記錯。

    //見到那班跟平時在傳霉見到的有青大不相同的「小朋友」

    有幾多喺所謂真.傷巷人又有幾多喺蝗一袋...又可能真喺夾喺中間嘅八九十後最「與別不同」


    //成年人或者可以做到咁,但越後生既會越喜怒形於色,而影響到工作態度。

    的確,其他專業或者都可以激進啲都OK,但喺醫療嘅就唔得,對住一嗰因為病到七彩蠻不講理嘅,如果唔可以"最柔軟的身段"面對及解決問題,一早被篩出去。或者頂唔順做唔到。

    回覆刪除
    回覆
    1. //我記得喺高級嘅護士有戴帽或個帽款式唔同普通護士。

      依家成個病房的護士都無戴帽的。

      //又可能真喺夾喺中間嘅八九十後最「與別不同」

      又係喎!睇班「小朋友」應該都唔會超過20歲,係90尾同千禧後的一袋。

      就算係正規嗰班醫護,都應該係90後。

      //但喺醫療嘅就唔得,對住一嗰因為病到七彩蠻不講理嘅,如果唔可以"最柔軟的身段"面對及解決問題,一早被篩出去。或者頂唔順做唔到。

      係呀,大部分後生嘅醫護,服務態度都非常良好;反而有個別阿姐級護士,西口西面咁,個款十足十陪住「真見蕉」打黃傘出庭嗰班女人。

      刪除
  5. 我覺得投身入護士界的,做幾多賺幾多心中有數。不似商界個個不知自己好醜,就認為懷才不遇,世界欠了他們,憎人富貴嫌人窮,咁咪憤世疾俗囉。

    回覆刪除
    回覆
    1. //世界欠了他們,憎人富貴嫌人窮,咁咪憤世疾俗囉。

      做醫護嘅,大把機會見到比自己不幸的人,實在唔太容影覺得世界欠咗佢;反而最容易認為不義政府對弱勢社群照顧不足,繼而轉黃。

      刪除
    2. 但講真, 政府醫院都照顧到好多有需要嘅人. 我覺得好睇嗰個人點樣去睇. 呢個世界, 永遠都有嘢不足, 永遠都無可能完美, 或者無可能一步到位. 如果只識得留意不完美, 鑽咗牛角尖, 就做咩都係會變黃.

      刪除
    3. //呢個世界, 永遠都有嘢不足, 永遠都無可能完美, 或者無可能一步到位

      對面床有位阿伯,頸椎受傷,手郁得但坐唔到起身,仔女似乎又有輕微智力問題,其他親戚又話年紀大不宜做手術,在復康病樓內已訓了兩個月,日日要醫護幫手換片。

      最近老人妻子又中風,佢為咗想見老伴一面而要求醫生做手術,但此時時機已過,醫生話做咗都好唔返...

      結果日內老人會被送去老人院,個低能女來探病仲鬼咁開心話:「爸爸,老人院見!」

      真係見之令人心酸。

      刪除
    4. 幾年前踢波搞到手腕裂骨,被強制留醫咗係骨科病房一晚。成晚都聽住好多人呻吟,其實真係好sad。

      刪除
    5. 骨裂都只需要訓一晚咁犀利?

      刪除
    6. 其實後來照過X光只系好細既裂紋,不過當晚醫生話如果有移位就要即刻做手術,所以要訓一晚,借啲二排隊照X光而已。照完發覺唔使開刀,朝早直接打石膏就走得了。

      刪除