留住我吧

包青天上司：「嗱，呢度講呢度散喇！阿魔術師佢真係好厲害，我完全唔擔心佢。不過呢，做阿頭嘅係要識將佢擺係適當嘅地方先至可以發揮所長，否則係會爆炸嘅。」
農曆年前，包青天上司叫來組內眾人「今天阿 sir 請食飯」，趁過年前食一餐，順便跟大家宣佈本 project 的亞太區 lead 香主Ｂ離任，將會學Ｃ嬸咁「移植」上海的消息。
其實包青天上司組中各人因為「無人工加事件」，已經各自萌生去意，而當時 Chi Lam 與及同事Ｔ已鐵定分別內部調遷及離職；就連魔術師自己也不例外，除了　update 咗份 CV 放上各大工資奴平台之外，也有佛系搵工：即係唔太 aggressive 咁，只係每日望下網上平台，見有啱嘅就寫吓去咁。奇怪的是，呢排唔多見到以往經常煩住魔術師的 recruiters 們（除了那間經常白墥的 Huxley，依舊不時都白墥）。

言歸正傳，包青天上司在飯局中講到明米帝 Project Director 自己都泥菩薩過江，不斷咁搵機會將個 project deploy 落去亞歐美各國，否則就 justify 唔到自己的存在價值。於是包青天上司便召開飯局，講到明有意內部調職者請舉手，不過就唔會預魔術師同埋心腹Ｌ一份，原因就係我地都係「叻人」，識得照顧自己咁話。
席間有同事問包青天上司又有何打算，點知佢竟然話「同公司做到最後一刻」，然後一係賣咗層樓，移居呆灣，退休去也（但老婆同阿女仲係老美）；一係就跟香主Ｂ轉戰上海，作退休前最後一擊云云。
到咗過完年，事情終於開始明朗化：就算係米帝，亦難逃被 downsize 的命運；但 Project Director 卻依然有若干動作，就係想將個 system deploy 落去歐美分部，同埋就係蝗國！而由於 Project Director 肯定唔識殘體字的關係，我城 team 就有存在價值，加上小鮮肉同事Ｊ同埋後生米腸Ｍ又走人，「減肥過度」反而會有即時危險...
於是，包青天上司前幾日又捉咗組內眾人去哦牌，講到明魔術師的能力完全能夠 convince 到米帝，而老鬼米腸Ｍ來咗我城幾次，就知道魔術師「唔能夠同蠢人一齊做事」，所以可以再安排魔術師個位置，做個 thinker...
魔術師都唔知包青天上司所講是否係真事，事關同老鬼米腸Ｍ接觸並唔多，條友亦唔似咁能夠觀人於微；不過點都好喇，包青天上司此言係想留住魔術師...
當然，魔術師的回應只係扮傻，不置可否；不過，呢個時勢，好多時明天起身就成個世界唔同咗，佛系搵工，都係要依然繼續的。
包青天上司又提到心腹Ｌ，由於佢只係３０幾歲，又因為呢個 project 識咗個同事做女友。雖然依家女朋友仔去了李加坡分部做 secondment，但總有返來成家立室的一日，所以包青天上司想轉心腹Ｌ由僱傭兵轉為正規軍，以公司幅利利誘佢唔好走人...包青天上司咁講法，可能係想魔術師唔好「誤會」佢大細超；不過，其實魔術師都唔太稀罕做返正規軍的說。
至於其他同事，得力助手Ｅ都應該可以留低；而大番薯叔叔和拍檔秦先生就應該無得留低了。