2023年1月19日 星期四

狡兔

話說魔術師公司位置頗不就腳,離最近的黨鐵(00066.HK)站口與及比較多人氣有好嘢食的市中心都有約7分鐘步程;好處係返工(雖然魔術師有巴士直達公司門口)、放工(雖然魔術師慣咗搭廠車,見下文)、出街食飯日日咁行法絕對有益身心,壞處係趕起時間來就真係幾唔方便。公司亦相當「體貼」,在法定收工時間一粒鐘之魔術師慣咗加班(電車部誰不加班呢?),所以搭廠車亦為常態。好衰唔衰這天做耐咗,驚趕唔到車嗱嗱臨執嘢出門,上到廠車開埋車,一摸西裝口袋,才發現把 iPhone 遺留在辦公桌。

死喇,架廠車會喪幾個黨鐵站才放低我哋,而魔術師用來搭車張是 iPhone 版,無帶電話即係無得搭車返公司拎返個電話!好彩魔術師有帶銀包,仲有現金,可以好似蝗民遊客咁買單程票搭黨鐵返去,再行幾分鐘返公司。

好彩,魔術師按一按銀包,就發現原來仲有張實體發達通,唔使咁麻煩買單程票。

事緣就係當初領消費劵時,魔術師特意申請了一張 iPhone 版發達通,只用來搭車,賺盡正苦每月33%的交通津貼(見《小藍人喪跑消費劵》),於是原來張實體發達通就留返嚟做 backup,極之少用。

無錯,魔術師做咗咁多年電車業,勝在凡事都有 backup。電車智慧講俾我哋知,尤其是轉 iPhone,千祈唔好馬上 trade 咗部舊機:

1. 將舊機資料 full backup 上電腦

2. 將舊機的 Apple Pay 信用卡連同發達通刪走

3. 用透過「快速開始」功能轉移資料到新 iPhone

4. Set 返好指紋開鎖/Face ID開鎖

5. 加返信用卡連同發達落 Apple Pay

6. 有些與機身綁定的 app 是不能簡單地轉移資料。每個 app 都有唔同轉移方法,例如大貓 banking app 係可以一個月在兩部機使用,當用戶 login 咗新機之後,個 app 就會提示用戶 deauthorize 舊機;然後再用 single sign on 將大貓 banking app 同 投資 app、信用卡 app 綁定,算是比較貼心的設計。又例如 Interactive Brokers、智方便、Google Authenticator 的資料轉移都有佢哋自己的 procedure,所以舊機一定要留起一段時間做 backup,以防萬一新機搞唔掂,都可以用住部舊機先:即使無 SIM 卡,但可以用 Wifi 上網做嘛。

7. 如果有些 app 在轉移資料途中自動 logout,就要搵返份 password record 去 login 返,再唔係用 forget password 去 reset

今次魔術師 iPhone 轉新機(見《給自己的聖誕禮物:iPhone Not for Life》),過程非常順利,都係多得有 backup 所賜。唯一比較麻煩要 keep 住部舊機來用的就係公司 VPN 的 RSA soft token,皆因需要 IT support 重新再造返一個 token 俾魔術師用至得。不過,公司 IT support 尚算有效率,一個星期內已更新了魔利術師的 soft token。於是魔術師由拎咗部新機到搞好哂常用的 app,再將舊機 trade 走也只是一個星期而已。

(網上圖片)

最後,魔術師不時都在FB見到疑似是廢老將「珍貴相片」留在舊型號手機中,到手機唔見咗/壞咗就出嚟喊苦喊忽的帖文(可惜魔術師無留底,無法貼出來分享)。如果真係咁珍貴,點解唔叫班後生幫你 backup?兔年嚟緊,正所謂狡兔有三窟,最緊要 backup 呀!

***

伸延閱讀:

給自己的聖誕禮物:iPhone Not for Life

小藍人喪跑消費劵

4 則留言:

  1. 仲唔到仲有公司用SecurID。我哋早幾年已經甩走哂。

    回覆刪除
    回覆
    1. 「大」公司轉身極度困難,事事怕得要死呀!

      刪除
  2. 近十年,我所有用過嘅iPhone,唔係俾咗兩個女用,就仲係屋企侍機中…

    回覆刪除
    回覆
    1. //仲係屋企侍機中

      咁浪費,拎去 trade 都好吖。

      刪除