這天魔術師行過去睇吓有無貓仔睇，幸運地見到藥材貓由後巷經過藥材隔離的牛雜粉麵鋪施施然地踱步返屋企：
可能藥材貓扭吓扭吓咁行實在太吸睛，一名正在牛雜粉麵鋪食緊嘢的巷女忽然麵麵唔食，跳了起來一把捉住藥材貓對手，成隻抱起來放到粉麵鋪前面吸；又係咁幫藥材貓掃背脊，藥材貓卻之不恭，咪起對眼享受。正當魔術師舉起手機想影返張相「巷女吸藥材貓圖」之際，有個路人阿伯忽然跳咗出來：「佢係藥材鋪養，好多 fans 㗎！」
「吓！？」巷女甚感驚訝。
魔術師同樣感到驚訝，看來巷女不是街坊，竟然以為藥材貓係浪浪又或者係牛雜鋪養的（所以先食到咁肥）？
巷女再跟藥材貓玩一陣，便返位繼續食。藥材貓享受完卻唔願走，可能想巷女請佢食牛雜。
＊＊＊
過咗好一排，魔術師又見到藥材貓企出嚟哂太陽。藥材貓一見到魔術師拎部手機出來影，便馬上衝上前在魔術師腳邊磨蹭了幾下，又喵了幾聲，可能係話無嘢食唔俾影。
藥材貓見無零食，便又返埋位哂太陽吸維他命D，仲怒睥咗魔術師一嘢添。
其實魔術師覺得藥材貓係認得人嘅，睇吓佢明明訓緊覺都可以知道魔術師在偷拍，就知佢係正醒目貓一名喇！
＊＊＊
士多貓三兄弟就比較少同場出現，呢排多數都只係見到鎯鎯貓，仲要有條長繩綁住。話說魔術師都見過士多貓兄弟走到去街尾（貓的地盤範圍是很大的），唔知係咪有青主人驚佢走失呢？
沒有留言:
張貼留言