2023年3月31日 星期五

一人飯局(2023年3月)

呢個零月又食咗唔少好嘢,月尾寫返啲輕鬆嘢,正好分享吓:

1. 生龍清湯腩(荃灣兆和街)

又係一間愈開愈縮的茶餐廳。魔術師咁多年來轉咗幾份工都係鍾意去一去MK食完晚飯再返屋企(見《新聞雜評(三百九十六)》),當年生龍在西洋菜南街的分店就是魔術師的飯堂之一,其巴基斯坦咖哩飯係魔術師最愛,叫個小辣(中辣好勁,唔使去咁盡)咖哩牛肉飯就夠哂惹味,連一向低食量的魔術師未可以掃哂一碟飯。可惜執吓一間執吓又一間,依家要食又要容易搭車返屋企的就唯有去荃灣了。

生龍清湯腩(荃灣兆和街):咖哩牛肉飯(小辣)$60、蠔油菜心$18、咸檸七$8,共$86。

2. 牛極(旺角女人街)

魔術師本來唔識食日式石燒,都係上一間公司班黃色有青帶識魔術師去食。離職後找到呢間連鎖店,在女人街有分店。似乎我城的日式石燒都係一個版:枱頭有喜瑪拉雅山岩鹽、胡椒粉等俾客人扭扭扭,亦有蒜蓉(魔術師最愛)、醬料等調味料,生菜沙律、白飯、牛肉湯任裝任飲。主菜係唔同部位的牛肉再以重量計價(《門徒》的昆哥一定唔鍾意),點完菜後便以一成熟的牛肉放在熱透的石上燒,要幾熟任客人自己切。不過魔術師次次都係掛住食沙律同飲湯(一碗餐前、兩碗餐後)而等到舊牛肉版烘到頗熟咁濟先嚟切。

牛極(旺角女人街):牛肩排180g $85、Coke Zero 一罐$10,共$95。

3. 美味小鮮肉(旺角女人街)

有日魔術師去完德發女人鋪同威威店睇碟,之後信步覓食就見到呢間主打一人火鍋的食店。入到去見到餐牌都有碟頭炒丁之類但無理由點呢炒嘢,嚟得梗係打邊邊。見餐牌收費都算相宜,調味料任加,魔術師最愛的豉油、辣椒、蔥粒、蒜蓉都有。用嘅係電磁爐火力都算猛,但如果好似魔術師咁戴機械表的就要小心手錶唔好貼咁埋以免受磁。火鍋湯底和配菜送到都算新鮮,望吓周圍見到有幾枱有青吃炒嘢的反而食唔哂走人,係味道伏伏地定係有事走先就不得而知;不過驟眼睇都唔少一支公火鍋食客,深得魔術師心也。

美味小鮮肉(旺角女人街):皇牌新鮮肥牛火鍋船$108、豬骨湯$5、鮮蝦(一份4隻)$41、咸檸七$20,連加一共$183。

***

伸延閱讀:

新聞雜評(三百九十六)

摩摩電影節之《門徒(Protégé)》:說教不壞,壞在爛尾

4 則留言:

  1. 咖哩令人想起都垂涎,除咗牛肉,請問呢間有冇羊?
    以前工作地方係僱用間主要請巴人的保安公司,有厨房畀佢哋煮嘢食,啲咖哩羊同酥油薄餅第二度好難食得返。😋

    回覆刪除
    回覆
    1. 記憶中餐牌好似無羊肉,open rice 都話無。

      咖喱羊我會推屯門咖喱屋同王子廚房。

      刪除
  2. 嗰間小鮮肉叫得潮汕火鍋 有冇啲乜嘢特別牛肉部位食 例如吊龍咁

    亞力士

    回覆刪除
    回覆
    1. 好似係有唔用部位嘅,有啲在餐牌,有啲可以在牆上招紙找到。有無吊龍我就唔肯定了。

      刪除