積壓如山煲劇單（2024年3月）

睇咗

1. Disney+：《洛基（Loki)》第二季

由於同第一季相隔都有一段時間，又無時間完全重溫第一季，所以有啲人物都係「跟唔到」，而洛基點解要誓死保衛「時變局（TVA）」，「時變局」滅亡後點解征服者康就註定一定會毁滅所有平行宇宙，魔術師就一啲都睇唔明（事實上征服者康已經唔提唔存在）。

魔術師評分：65分（100分滿分）

2. Netflix：《幽遊白書（Yu Yu Hakusho）》

劇情方面推進比較急，5集（5小時）就打完戶愚呂，完全感受唔到原作角色的成作、友情及戶愚呂的威勢和武道精神。人設方面只有藏馬較似原作，小閻王變了成年人、飛影唔夠矮、幽助亦唔夠「圓潤」、至於桑原，魔術師就覺得不如找《今際之國》的町田啟太（飾演苅部大吉）來演更似樣。

魔術師評分：75分（100分滿分）

3.  Disney+：《美國恐怖故事（American Horror Story)》第十二季 Delicate（上半部）

睇恐怖片通常唔會先睇評論，魔術師就係咁俾個 episode list fake 咗，初頭以為係個5集完的短篇，原來係有9集的，係因為2023年尾帝編劇和演員罷工而暫停製作，要到今年年中才續播。睇咗5集，不太恐怖，但故事都算流暢，慢慢推進。雖然好可能都係女主角生咗個魔鬼之子出來的套路，但有不再少女卻依然係靚女的 Emma Roberts 加持，魔術師都會追看下去。

魔術師評分：（暫時）70分（100分滿分）

4. Disney+ :《無限可能：假如...？（What If...?）》第二季

「媽浮」無厘頭「多元宇宙」單元動畫，第一季仲有啲紋路，叫做30分鐘一集之內完成起承轉合；第二季雖然偶有佳作，但更多時都係無頭無腦亂打一餐，坊間影評卻多數是正評，只能話魔術師唔識欣賞，用來攝時間都可以嘅。

魔術師評分：60分（100分滿分）

＊＊＊

將睇未睇

1. Netflix：《三體（3 Body Problem）》

原著久仰大名，究竟俾外國勢力拍成劇集又係點呢？

2. Disney+ :《Moving 超異能族》

聽間話 Disney+ 2023年就憑呢套泡菜劇「一片救全家」。究竟有乜咁把炮？魔術師都好想知。

3. Netflix：《暗夜情報員（The Night Agent）》

Netflix 2023 最高收視劇集，仲要唔係泡菜劇，較為正經的特務片，男主角幾靚仔。

4. Prime Video：《死期將至（Death's Game）》

又係泡菜劇，就連比較「親西方」的串流平台都不能幸免。又係要睇吓有乜咁好睇。

5. Netflix：《骷髏島（Skull Island）》

怪獸宇宙動畫，屬於「補完」工作。

6. Netflix：《大怪獸卡美拉：重生（GAMERA -Rebirth-）》

怪獸宇宙動畫，屬於「補完」工作。

7. Netflix:《星期三（Wednesday）》

魔術師第一季都未入坑，卻連第二季預告都出理，但可能要 2024 才有得睇，要諗吓等唔等埋一次過睇：

8. Netflix:《Fubar》

久違了的大隻佬再現《幼稚園特警》式的動作喜劇，可以用來攝時間。

9. Netflix:《阿諾舒華辛力加：人生三部曲（Arnold）》 

好多人鍾意史泰龍，貪其對 Rocky 和 Rambo 不離不棄，但魔術師就鍾意大隻佬多啲，雖然佢無乜演技但木口木面就係演技，而且無 set 死角色（Terminator 除外）戲路亦較史泰龍多變（起碼以史講嘢一舊舊咁，就好難做到喜劇效果）：

10. Netflix：《Sweet Home》第二季

第一季已經係麻麻哋，第二季上架後風評更是差劣，未定是否入坑。

11. Disney＋：《天龍八部》

CCTVB 搞咗兩對「中年好聲音」出嚟唱主題曲，又可以湊吓熱鬧睇吓完全無刪剪版係點嘅一回事。

仲有大量動畫、舊劇、紀錄片，包括 Marvel 劇、《陰屍路（The Walking Dead）》、《迷（Lost）》、《GANTZ 殺戮都市》、《二戰大事記彩色版（Greatest Events of WWII in Color）》 等...未能盡錄。

＊＊＊

期待中

暫時無。

＊＊＊

無乜期待中

1. Netflix：《魷魚遊戲（Squid Game）》第二季

第一季已經係過譽，如果兩季完魔術師都可以俾個機會佢完埋佢好頭好尾。

2. Netflix：《殭屍校園（All of Us are Dead）》第一、二季

未入坑。如果兩季完魔術師都可以有時間就睇：

＊＊＊

最後貼上魔術師的 all time favoruites 影集/動畫/單元劇/紀錄片頭十名（僅限現時在 Netflix、Disney+、及 Amazon Prime 的非電影類片種)，排名分先後：

1. Netflix:《闇（Dark）》

三季完燒腦穿越神劇，無 bug。

魔術師評分：100分（100分滿分）

1. Netflix:《魔剎（Monster）》

漫畫改編之暗黑系動畫，分鏡出色。魔術師由錄影CCTVB直至買碟二刷，同先父一齊欣賞之動畫之二（另一套就係《銀河英雄傳說》）。

魔術師評分：100分（100分滿分）

1. Netflix:《今際之國的有栖（Alice in Borderland）》

兩季完求生劇，漫畫改編。淨係睇囡囡已能完勝。

魔術師評分：100分（100分滿分）

4. 《紙房子（Money Heist）》

知名西班牙「神劇」，五季完。雖然講到教授幾咁算無遺策，但其中靠不可預測的巧合及符碌的情況亦唔少，真係「好運好過好波」；要睇不如睇女督察（後稱里斯本(Lisbon)）的英姿、奈洛比（Nairobi）的「人事管理技巧」；及東京（Toyko）的西口西面。

魔術師評分：90分（100分滿分）

4. 《新世紀福爾摩斯（Sherlock）》

魔術師最鍾意 attention to details！

（圖片來源：BBC iPlayer: Sherlock, captured on 26 Aug 2023）

魔術師評分：90分（100分滿分）

4. Amazon Prime Video：《刺客旅館：捍衛任務世界（The Continental: From the World of John Wick）》

《殺神（John Wick）》衍生前傳劇集，講大陸飯店經理 Winston（Colin Woodell 飾）的前半生。酒店接待沙隆（Charon）讚以青年身份出現。有 John Wick 式打鬥，係幾爽幾好睇。本片仲有 Mel Gibson 參加演出。

魔術師評分：90分（100分滿分）

7. Disney+:《美國恐佈故事（American Horry Story）》第一至十二季

季度單元故事，共用相同或類似的世界觀，追看無難度。本來係幾好睇的劇集（魔術師個人喜歡 Season 2《Asylum》、Season 1《Murder House》＋Season 3《Coven》＝Season 8《Apocalypse》），但愈拍愈頹，由第10季開始覺得有啲無厘頭，故事亦開始唔吸引，無乜新意和追看性，加上元祖演員全數退場，無哂癮，追看下去也只是情意結而已。

魔術師評分：（第1至12季平均)85分（100分滿分）

7. Netflix：《冥王（Pluto）》

浦澤直樹又一力作，喜歡《魔剎（Monster）》的觀眾不容錯過。劇情改編自手塚治虫的《小飛俠》篇章《地上最強的機械人》，所以有不少手塚治虫的「童真」feel，跟浦澤直樹的暗黑風有少許錯配，而且結局解畫有啲牽強，個人覺的得稍不及《魔剎》和《二十世紀少年》。故事起源於一個似曾相識的背景：中亞國家波斯王國被某自稱世界警察的國家指控藏有大殺傷力機械人，聯合國調查團發現本無此事，但戰爭經已開打，引伸出不少愛恨復仇，人類和機械人（人工智能）的包客與矛盾的故事。

魔術師評分：85分（100分滿分）

9. Netflix: 《少年法庭（Juvenile Justice）》

呢套係少有可以叫魔術師有心機追落去的韓片，有時仲深宵播放一晚追睇兩集：是關女主角的價值觀啱哂魔術師：年輕唔係大晒，對於窮兇極惡的少年犯，一定要嚴懲，否則佢地只會嘲笑法律的無能。不過，本片結局有啲不太合理，太過正能量：以結局案件的有青之殘忍性格，無可能只在女主手臂上刺一刀，而唔係割喉棄屍；肥婆部長亦不可能在庭上為其慣性草率結案而影響的受害人公開道歉吧！

魔術師評分：80分（100分滿分）

9. Disney+: 《解碼追兇（Signal）》

金憓秀實在太迷人，估唔到當時48歲的女主在過去時間線做20歲出頭的新紮師妹毫無違和感。本劇在逆轉時間線的劇本尚算講得通，但本來應該是正義化身的「電波刑警」卻有不少徇私、鶳之舉，加上個結局為了鋪下一季（結果唔成事）而寫爛咗個尾，美中不足。

魔術師評分：80分（100分滿分）

其他：《黑鏡（Black Mirror）》：因單元故事，表現飄忽，魔術師暫不評分。