話說魔術師最近幾個月都返過去深圳做港燦理財（見《港燦理財（十八）之更新錢莊 return home card 紀錄》、《港燦理財（十七）之搶人仔》、及《港燦理財（十六）之復常勇者》等），深感國家發展迅速，中華民族偉大復興，返到屋企諗諗吓淨係用民企支付佬同微信囡綁定尾帝錢莊 Cash Back 卡賺積分，又或者去申請大貓 Pulse 銀聯鑽石雙弊卡實在太過正字唔正確，於是就打開裝咗好耐都無乜點用到、最近見到有優惠先用返一兩次嘅 Grandpa 錢莊 Pay app，一於試吓 app 申請乘車碼，睇吓將來有機會「北上消費」出行用 Grandpa 錢莊支付會唔會比用支付佬同微信囡更靚仔！
|
| （圖片來源：中國銀行（香港）> 信用卡 > 推廣優惠 > 最新優惠 > BoC Pay 乘車碼搭車享5X積分回贈 逢星期五更享半價優惠！,captured on 4 Mar 2024） |
見上圖，要啟用乘車碼先要綁定 Grandpa 錢莊嘅銀聯雙弊信用卡...
魔術師都有啟動支付佬同微信囡的乘車碼，亦試過用微信囡搭深圳地鐵，都無咁麻煩要好似 Grandpa 錢莊咁一定要綁信用卡(大貓 Reward + 都係要用銀聯二維碼，所以又係無端端要申請雙弊卡)，人哋微信囡係可以用錢包餘額的。
點都好，魔術師依照指示申請 Grandpa 錢莊張虛擬雙弊卡，跟手就成功啟用，並加入 Apple Pay：
好嘞，魔術師即時啟用乘車碼，然後跟手生成個二維碼睇吓...
頂！成功啟用後就即時停用？試咗幾次都係咁，玩咩？
於是魔術師就打去客戶服務熱線。
循例電話系統都要魔術師輸入現有信用卡號碼。
魔術師輸入現有早前持有的 Grandpa 錢莊信用卡號碼，點知就俾電腦系统 reject，話搵唔到卡資料。
魔術師再輸入一次，再被 reject。
核對過一次，並唔係入錯號碼。
明明張卡都持有咗一段時間，又唔係新申請的虛擬銀聯卡，點解會話搵唔到呢？
魔術師再打去一次，今次選無信用卡號碼可以提供。
「我哋嘅線路比教繁忙...」
等咗半粒鐘，終於有人接聽。
魔術師跟CS囝囝甲說明致電所為何事，CS囝囝甲就要魔術師輸入「電話理財密碼」，核實身份。
依家樣樣都係網上做，邊仲有人用電話理財？魔術師也不肯定自己有無 set up 過，只好試吓墥吓。
果然係錯。
CS囝囝甲：「先生，你輸入嘅電話理財密碼錯誤。」
魔術師：「係呀，我都唔記得我有無 set up 過，你有冇其他方法核實身份？」
CS囝囝甲：「我哋只能夠用電腦理財密碼。先生你唔記得的話，就要打另一個號碼去搵支援。」
魔術師開始火滾：「咁即係又要我等多半粒鐘？我唔使你轉駁，你講個電話號碼嚟，同埋要撳乜選項可以搵到人幫手？」
魔術師一定要CS囝囝甲提供電話號碼，否則由佢轉駁，一旦 cut 咗線魔術師就唔知再打俾邊個了
CS囝囝甲無奈，只好依言提供資料。
魔術師打去第二個電話，今次比較好彩，「只係」等咗15分鐘。
這次接聽的是CS囝囝乙...點解其他錢莊的 CS 都係囡囡，而 Grandpa 錢莊的 CS 就係囝囝？
魔術師再講明來意，CS囝囝乙就竟然又要魔術師輸入「電話理財密碼」。
魔術師發覺佢真係無聽書：「我頭先咪講咗我唔知有無 set up 到電話理財密碼囉！你有無第二個方法俾我核實身份？」
要個客教返轉頭，CS囝囝乙有點尷尬：「咁你可唔可以接收短訊做認證？」
當然可以喇。原來係有第二個方法的。
魔術師成功通過身份驗證後，CS囝囝乙話乘車碼啟用後即時停用，係因為張新虛擬銀聯卡加咗 Apple Pay 之後就會自動被鎖，依家佢幫魔術師解鎖，15分鐘後就可以用得返了。
又係申請卡時提供加入 Apple Pay 的選項，加咗就自動鎖卡，又唔通知客戶，Grandpa 錢莊的做法真係匪疑所思。
魔術師再問點解張舊卡會在系統搵唔到，CS囝囝乙就答話因為魔術師無 set up 電話理財密碼的緣故。
究竟係咪真㗎？
魔術師跟住就問點樣可以 reset 電話理財密碼，CS囝囝乙就俾咗第三個電話號碼魔術師。
魔術師再打去問，今次就唔使等好耐，就有CS囝囝丙接聽。
魔術師重覆一次問題，問點樣可以 reset 電話理財密碼。
CS囝囝丙：「你要落分行搞喎！」
DKLM，玩咩！？咁嘅服務，由 AI 做仲好喇！
是夜再試一次，依然係死。CS囝囝乙完全係老點的。只好明天再搞。
老老實實，雖然魔術師無申請到大貓 Pulse 銀聯鑽石雙弊卡，但根據過往經驗，無論係大貓網上銀行、手機銀行、Reward +、PayMe、同埋打去 CS 的用戶體驗，都係遠勝 Grandpa 錢莊相對應嘅電子支付平台及服務，真係唔話外國勢力係勝一籌都唔得！
＊＊＊
伸延閱讀：
我上年都整咗張 BOC 双幣卡（實体卡），但冇用 BOC Pay。用云闪付 APP 都可以用乘車碼搭地铁。
回覆刪除我都係鍾意將啲支付平台綁定在一起，有咁多功能就用咁多功能。
刪除令人諗起 內地一眾國企雖然有壟斷優勢，但成日用人唯親，效率較低
回覆刪除我嘅遭遇完全 relate 唔到「用人唯親」喎！
刪除上次去北京，本身有微信都連唔到個城際APP，結果都係出咗張交通卡。但用咗2、3日後，就日日滴滴打車，因為睇完景點就唔想再行一大段路落地鐵。在深圳也試過用微信掃CODE過閘，但個人感覺無「拍」卡咁方便，哈
回覆刪除WILL
//在深圳也試過用微信掃CODE過閘，但個人感覺無「拍」卡咁方便
刪除唔怪得發達通咁「固步自封」喇！
我估你張卡一開始佢已經幫你開咗電話理財密碼，所以default出唔到短訊認證，要CS整先出到。早幾年仲神奇，如果曾經開過網上理財account，之後裝手提電話app係唔准登入，打上CS問亦都冇解決方法。係最近先准取消網上理財account，再經電話app開返account。
回覆刪除神奇地過咗一晚，乜都無做過個乘車碼又 work 返了。可能要過夜先識得 reset 。
刪除