港燦理財（十八）之更新錢莊 return home card 紀錄

日前收到蝗國大貓傳來的 SMS 短訊，話魔術師的 return home card 即將到期，要返上去更新資料。查實魔術師早就更新咗張 return home card（見《中女服務長知識（Return Home Card 篇）》），只係未返上去更新錢莊資料而已。又想，魔術師在深圳工傷錢莊都有個戶口用來收租用，點解又收唔到 message 叫 update return home card 呢？也罷，唔理咁多，今天（3月2日）就返上去一次性搞定吧。

一如既往，對魔術師來說，要返深圳去工傷同大貓，最快捷都係在屯門坐亡命 van 到上水再去羅湖。多得丹爺代炎的「非觸式e-道」（見《瞬間睇廣告（九）》），傷巷過關竟然係有效率過深圳方 - 巷方過關魔術師可以唔除眼鏡可過到容貌辨識，但深圳應該唔得，一定要除眼鏡（多年前一直如是，近年有無 upgrade system 可以有眼鏡都得就唔知了）。

去到羅湖商業城工傷銀行，先撳錢拎兩萬人仔，待會可以「合法走私」返我城；撳錢例牌又係要排隊，好在今次時間尚早，ATM 機未被撳乾（見《港燦理財（十七）之搶人仔》）：

其實國內錢莊星期六日都開門到下午4點（辛苦哂同志），照計都會 refill ATM 機，而且又話國內消費已經電子化，一眾客戶應該都唔使成日都咁急住拎現金吧。又，錢莊開到星期六日下午4點真係好方便，不過如果要我城班錢莊職員返埋星期六日全日，魔術師諗佢哋應該會「罷工抗議」（題外話，錢莊罷工算不算是影響社會穩定、危害國家安全，要二十三條侍候？笑）。

撳完錢就入分行，學早前班廢老咁到「自動化XX機」（見《港燦理財（十六）之復常勇者》）前搞手續更新錢莊的 return home card 資料。原來魔術師之前誤會了，以為係因為廢老廢才要職員在「自動化XX機」幫手；事實係整個過程係要職員現場核對過客戶的銀行卡、身份證、及 return home card，才將 return home card 插入「自動化XX機」更新資料 - 所以個 procedure 根本唔係「自動」的，可不要被字面騙了。

輪到魔術師搞手續，職員核對過資料後把魔術師的 return home card 插入「自動化XX機」更新資料，第一個畫面顯示更新了有效期，算是成功了；但第二個畫面卻要魔術師填寫手機號碼 - 原來魔術師在深圳工傷錢莊是沒有手機號碼紀錄的，怪不得收唔到通知喇！

職員見到第二個畫面的顯示，便手指指指向分行的另一端：「你要先去嗰邊做手機號碼認證喎！掃碼就得。」那職員接着也懶得理魔術師，招呼排在魔術師後面的客人去了。

魔術師依言去到「嗰邊」，四處張望，卻見不到有甚麼碼可以掃，於是便又問職員有關手機認證的事情。

而那職員竟然拎咗張 form 俾魔術師填！

即係唔係掃碼喇！魔術師又被老點了。

而呢個職員真係好熟書，魔術師填完表之後佢又核對一次，見魔術師用薯嘜通，竟然知道在邊個 app 撳返資料顯示實名認證，並教魔術師要以薯嘜通 app 顯示自己個名同埋我城手機號碼，再用一機多號 app 顯示我城手機號碼同大陸電話號碼的連繫：

魔術師依言拎埋張 form 去本來排隊的地方返搵第一個職員。今次唔使再排隊，而係被安排到隔離另一部「自動化XX機」繼續更新手機資料，而該職員就要同時服務兩位客人（即魔術師同埋原來條隊）。這職員雖然早前老點了魔術師，但同時服務兩位客人起雙飛卻不忙亂，非常專業。

職員跟魔術師要再核對「實名登記」資料，又要用平板替魔術師拍照，再跟「自動化XX機」連線操作（所以話真係一啲都唔「自動」，亦唔「智能」）之類之類...而魔術師就負責入返一卡多號的大陸手機號碼，收到短訊之後確認，再更新埋地址，簽名（要用手寫筆在「自動化XX機」畫面上簽名，用手指係簽唔到的），咁就完事了。

估唔到都搞咗幾耐，半人手半自動，又多人搵職員問問問，職員態度良好又專業，有問必答，卻變相搞到整個流程唔順暢。

信步由羅湖商業城行去深圳香格里拉酒店大貓分行，沿途見到有機械人做清潔（我城的清潔機械人只會在商場等室內地方出現，室外好似未見過）：

大貓就相當易搞。去到接待櫃位，無人排隊（只有一人在魔術師前面），職員處理完便輪到魔術師。接待櫃位職員的電腦也可以即時更新魔術師的 return home card 資料 - 職員就咁望兩望魔術師，確認同卡上相中人樣貌無誤，再用電腦的相機拍照便完成了，全程不用五分鐘（魔術師仲嘆埋咖啡），而且大貓的電腦系統可以用魔術師的我城手機號碼，而唔係一定要用內地電話號碼，這就更加方便了。

做完所有嘢，本來諗住會唔會去山娒，處男下海睇吓有乜吸引力，但查找了一輪發現原來由羅湖去最近的山娒（福田？）都要搭一輪車，天寒地凍都係免了，趕快回家吧。

今次由香格里拉行「地底」返去羅湖口岸，估唔到去到口岸前竟然見到有多間巷式燒味鋪，雞鴨燒腩乳豬都有，以前好似未見過的。究竟點解會口岸前商店會有多間店鋪賣燒味？所為何事？

＊＊＊

伸延閱讀：

中華人民共和國香港特別行政區政府 保安局 > 維護國家安全:《基本法》第二十三條立法

瞬間睇廣告（九）

港燦理財（十六）之復常勇者

港燦理財（十七）之搶人仔

中女服務長知識（Return Home Card 篇）