2017年3月10日 星期五

有樓萬事joke(三):買樓靠父按


其實,傷民都幾有錢,咁多阿爸阿媽可以資助仔女買樓!當然亦有可能係借仔女「人頭」做首置客避辣招喇!反正都係 win-win situation!
1. 呢位紮鐵哥真係勁,放棄萬零蚊的白領唔做,身體力行學摩摩話齋走去做紮鐵,話要「買層樓比阿媽」喎!係就係「3、4萬一月個都無難度」,但返工做嘢既被人問候,天時暑熱仲話做到好似中暑咁濟,結果...
2. 阿紮鐵哥都係問阿媽借一半退休金做首期,仲話好彩阿媽俾咗一半錢佢,因為阿媽用另一半退休金炒股票輸哂!睇完呢段,魔術師真係D咗一聲!


3. 在投資班的 discussion group(植入廣告?),靚媽話早年買咗兩間,供完收緊租,一間俾阿仔一間俾阿女,但仔女都只係讀係幼稚園、小學,究竟呢位靚媽係作何謍生的呢?
4. 靚媽詻有層樓令子女更容易達到夢想,唔使俾層樓綁死...如果將層樓當係資產工具,可以賣可以收租可以加按,用來提供資金靈活性,咁睇就係啱嘅;但係以住(或高潮女所謂的「安全感」)來講就唔多啱:事關如果你係追夢一族的話,根本就唔會將區區一層樓放入眼內。在創業家的字典裡,應該沒有「有個安樂窩才能夠創業」的想法。
5. 有位慈父話,買樓俾子女,係令「供樓成為佢地嘅一種責任」。魔術師都同意呢種諗法:你有層樓要供,自然就逼你做好財務管理計劃,唔會洗腳唔抹腳,以供樓當係強逼儲錢的一種方法都 okay 的。


6. 建築系畢業的幸運哥以450萬買入港島區藍籌屋苑兩房單位,裝潢完後話做收租仔,第日結婚就收返來自住,仲話咁快已升咗100萬添!原來又係用阿媽退休金做首期,仲要買樓好似買菜咁,話俾支票就俾支票!
7. 幸運哥只得20歲出頭,一家住千呎大屋...咁阿媽究竟幾多歲,做盛行呢?退咗休仲有筆唔少嘅退休金喎!同之前買樓俾阿仔阿女的靚媽一樣,傷港有邊幾樣職業可以咁好搵呢?
8. 古語有云:「有仔趁嫰生」,但幸運哥的金句盲係:「買棲趁後生」,原理係「如果有乜事,阿爸阿媽仲有一份工,可以幫一幫」,「錢唔係靠自己努力,但都做咗好多嘢去買樓」,「追夢創業,100個有90個失敗,只係得一個成功...」魔術師睇到呢到,又再D咗兩聲:雖然魔術師都係打工,但以住木屋區輸在起跑線的出身來說,魔術師有今日的資產都係靠自己,相比幸運吾,唔「拋(proud)」下都唔得!


9. CCTVB 女奀星就話做《安繅窩》期間,見到唔少大學畢業兩三年,同女朋友結咗婚,買到樓,好幸福,原來媽咪同佢儲咗好多錢。魔術師諗到嘅反而唔係買樓,而係新一袋現在傾向早婚,看來同上一集「有愛萬事足」的兩小口都係一樣,需要有另一半的慰藉。唔知道如果缺乏愛情,班新一袋年青人心靈空虛,會唔會就轉型變成有青,下下上街佔中以武制暴來尋求認同感呢?
10. 女奀星話做偽人要儲定半年糧,以防無工開...其實依家傷港行行都係咁(所以魔術師再一次唔明白點解有咁多中剷父母咁有錢),儲定半年開支使費做失業備用金都係正常的做法。
11. 女奀星個兩房單位,月租萬幾蚊,話「幾乎要每兩年搬一次屋,交30年租,都未能成為業主,但就養咗班收租仔30年」...查實,如果做愚樂圏做幾年都依然係半紅不黑,你又潔身自愛,唔想去「搵契爺」的話,咁...都係趁後生轉工吧喇!


12. CCTVB 男奀星就話同朋友夾份開男裝服飾店,主動開源,未雨綢繆,隨時可以在愚樂圈消失,呢種做法值得讚賞;不過,在本台節目內咁講出埋街,睇怕公司都應該唔使再預佢了。


13. 最後一個 case 例牌較為正面。月入2萬幾的平面設計師為咗搬出嚟住有獨立空間,不斷秘撈接 freelance 幫人畫圖賺錢,收份存入一個特定戶口唔郁。呢種 brute force 式的理財策略魔術師都試過,效果唔差架(見舊文《第一桶金續集》)!
14. 結果設計師又去上物業投資課程(仲唔係有贊助?)!問明按揭招數之後,以270萬買入大圍金獅花園270呎蝸居,月供連管理費將1萬,旁白話「首期連裝潢60零萬」,而當事人就話「裝潢費約28萬」,即係首期約40萬,即係8成幾按。點解唔借盡9成?可能係因為正職人工低過唔到壓力測試(兼職收入除非有「公司」出返糧俾自己,否則無糧單,兼職收入就唔會計入還款能力),所以要俾多少少首期了。
***
伸延閱讀:
有樓萬事joke(二):為左層樓,可以去得幾盡?
第一桶金續集

15 則留言:

  1. 點解結婚同樓一定要係個package
    同兩老一齊住好委屈咩

    回覆刪除
    回覆
    1. 其實又唔係委屈。不過據我觀察,同住會有唔少摩擦,影響感情;反而分開住但多些回老家探兩老,感情會更好。

      刪除
    2. //兩老一齊住好委屈咩
      //同住會有唔少摩擦,影響感情

      係呀,相見好同住難,多個「外人」在家, 老人家唔習慣好易會嘈交.

      刪除
    3. 同住唔係咁容易。我經歷過阿嫲惡鬥阿媽,少少嘢可以發到好大。

      刪除
    4. 家居勇武鬥爭只會是添煩添亂.

      刪除
  2. //在創業家的字典裡,應該沒有「有個安樂窩才能夠創業」的想法。

    我隱約記得某支那蝗蟲創業家講過,佢自己喺四十歲之後先買樓,亦唔建議咁後生去買樓,咁早將一大筆現金箍死晒。

    //呢種 brute force 式的理財策略魔術師都試過,效果唔差架

    非常同意。真喺好有效,而且滿足感好強。

    //放棄萬零蚊的白領唔做,身體力行學摩摩話齋走去做紮鐵,話要「買層樓比阿媽」喎!係就係「3、4萬一月個都無難度」

    喺真放棄定喺被放棄呀,既然都唔爭在不如去盡啲----

    "建造業加薪平均7% 80後為月薪16萬 日做地盤18小時"

    ...周聯僑更指,有27歲從事混凝土工種的工人,每日工作最少18小時,月薪達16萬元,「佢做足一個月,喺地盤瞓覺,朝早八點,一路做到凌晨兩、三點,只喺瞓五個鐘左右,每月揾16萬元,之後揹背囊去玩(旅行)。」

    呢一集"有樓慢自瀆"比第一集正常啲啲,無咗嗰尖下巴大波夾硬嚟講,不過真喺太多廣告,同前幾年港女節目一樣。

    回覆刪除
    回覆
    1. //我隱約記得某支那蝗蟲創業家講過,佢自己喺四十歲之後先買樓,亦唔建議咁後生去買樓,咁早將一大筆現金箍死晒。

      蝗創的「小目標」是一億.

      //呢一集"有樓慢自瀆"比第一集正常啲啲,無咗嗰尖下巴大波夾硬嚟講,不過真喺太多廣告,同前幾年港女節目一樣。

      唯有自己filter 那些投資班的內容.

      刪除
  3. 我無睇電視, 多謝晒C兄既精華輯錄

    回覆刪除
  4. "7. 傷港有邊幾樣職業可以咁好搵呢?"

    努力囉... 一直正職freelance雙軌行,咪一半時間賺兩份錢... 呢個效果都好大... 另外從細路的靚媽口中得知,有幾行「中產」工係有咁嘅收入的:

    1. 保險(據說2-10球一年,而且只係「普通」,未到TOP sales);
    2. E生/醫療集團(據說屋企support 開連鎖+做埋D九唔搭八的醫學美容,個個月係千萬計的收入);
    3. 「生意」(呢種一般死都唔講俾你聽邊行,但據說都係個個月球球聲的)。

    以上各項「好搵」/「有錢」的代表人物,有一個共通點,就係自己住那間反而不會太豪,都係半山舊樓「唔大唔細二千零呎 」OR普通同平實夠住,其他資金就係買俾仔/女或注資人地生意自己買下車位收租等。

    “10. ...(所以魔術師再一次唔明白點解有咁多中剷父母咁有錢)"

    認真:買買賣賣多幾次就雪球到你唔信,仲要唔使好似呀財務自由40歲那個hold咁多層/三宅一生先有效果。時機好彩(provided你不是運滯到高買低賣,雖然真係有人係咁 )的話,只是自住住夠一陣賣/換大D再換大D,每5年翻一翻零難度。「買樓趁後生」係再對不過...

    例(不精密,但應該我地呢代都多人係咁):
    回歸前300呎, 1.XM,5年升至2M,賣(套現金幾十萬,5年唔使交租,「慳」咗 幾十萬)
    千禧後500呎,3M,5年後升至4M,賣(套現金1M,5年唔使交租,「慳」咗1M)
    千禧後幾年800呎,5M,10年後千至11M,賣(套現金6M,10年唔使交租,「慳」咗3M)
    而家買1200呎 ,18M...

    加加埋埋,咪夠普普地隨手拎到3幾M出來俾仔買樓用囉...

    回覆刪除
    回覆
    1. //保險

      呢份工真係巧驚驚...

      //E生/醫療集團
      //「生意」

      咁就唔算係打工喇!

      //買買賣賣多幾次就雪球到你唔信
      //「買樓趁後生」係再對不過...

      主要係趁後生是樓換樓套現,自己工資又在上升軌,借貸力高;由於樓按只做30年, 最多assume係供到70歲,到得40歲以後,借貸力變下降,唔能夠以最少的首期買到最多的資產.

      刪除
    2. "到得40歲以後,借貸力變下降,唔能夠以最少的首期買到最多的資產."

      正是,一定要早買!

      "咁就唔算係打工喇!"

      「我爸爸同人打針8,000一支」,細路如是說... 都真係有打工嘅 ....

      刪除
    3. //「我爸爸同人打針8,000一支」,細路如是說... 都真係有打工嘅 ....

      細路未必真係識內裡乾坤.

      做醫駕集團同保險一樣, 都係係個名落「公司」度, 似乎係打工但其實係自己生意.

      刪除
  5. //身體力行學摩摩話齋走去做紮鐵

    喂!我唔係自己諗出黎,係真係聽過一個真實個案,個位哥仔仲升埋職做埋管工,月薪成六皮...

    //而係新一袋現在傾向早婚,看來同上一集「有愛萬事足」的兩小口都係一樣,需要有另一半的慰藉。唔知道如果缺乏愛情,班新一袋年青人心靈空虛,會唔會就轉型變成有青,下下上街佔中以武制暴來尋求認同感呢?

    無錯,70後的確係相對之前同之後出世的世代比較遲婚。

    我覺得係70後通常成長於舊一代思想比較嚴厲管教的家庭,但社會開始有新思潮出現,加上社會氛圍同資源都鼓勵新一代早日獨立生活,各種衝擊下造成70後有較渴望自由自主的性格。

    至於無愛情會唔會變有青...小三咪講左要爭取扑野空間囉!

    //如果做愚樂圏做幾年都依然係半紅不黑,你又潔身自愛,唔想去「搵契爺」的話,咁...都係趁後生轉工吧喇

    有小小名氣(起碼冒昇中)先能夠做「名冊」中的「名牌」,如果長期半紅不黑其實都好難「搵契爺」嘞。講真好多愚圈中人之所以被標高價(本身賣唔賣係另一件事),相貌其實並不超班,而無非係名氣有個premium而已。

    //在本台節目內咁講出埋街,睇怕公司都應該唔使再預佢了。

    阿坤哥走的是柒男平實路線,cctvb未必會mind佢咁講野...佢形象加分公司都有得益的

    //呢種 brute force 式的理財策略魔術師都試過,效果唔差架

    更brute force係信用卡低息分期...不過唔用黎投資會蝕利息,而且會寫花信貸評級,影響做物業按揭

    //在創業家的字典裡,應該沒有「有個安樂窩才能夠創業」的想法。
    //點解結婚同樓一定要係個package

    曹仁超曾經講過,好多人一生最重要的投資就是買樓,而投資是講時機的,點能夠同風馬牛不相及的個人感情生活歷程掛鉤呢?

    而對創業家來講,孭住層樓隨時是創業的束縛...

    //10. ...(所以魔術師再一次唔明白點解有咁多中剷父母咁有錢)"
    //認真:買買賣賣多幾次就雪球到你唔信

    關鍵是佢地後生時撞正經濟blooming,年年人工加10%,速度跑贏樓市,到供滿層樓後,又輪到樓市起飛...按返俾銀行後,「炒樓炒股炒栗子仲好賺過搶」;仲未計呢班中剷好多係趁8964移民潮、高管真空期提早上位的。

    又回帶:

    “片中還有一個主題,懷念。......甚至是全體香港人對香港黃金年代的懷念。那時天很藍,雲很白,香港經濟繁榮,戲院人頭攢動,隨便拍部戲都可以賺大錢....”

    回覆刪除
    回覆
    1. //但社會開始有新思潮出現,加上社會氛圍同資源都鼓勵新一代早日獨立生活,各種衝擊下造成70後有較渴望自由自主的性格。

      係囉, 當年我剛入舊公司,就有成班藍大畢業的新仔一齊商議話搬出來住,邊度租金較佳等.搞到我仲以為佢地嘅「獨立生活」觀係由藍大的「舍堂文化」而來.

      //小三咪講左要爭取扑野空間囉!

      下一集劏房專家擺明係sell炮房概念.

      //而投資是講時機的,點能夠同風馬牛不相及的個人感情生活歷程掛鉤呢?

      「你唔好以為人地好似你咁叻」,識得分開嚟諗 XD

      //仲未計呢班中剷好多係趁8964移民潮、高管真空期提早上位的。

      所以依家班高官好多都係「水鬼陞城隍」....

      //甚至是全體香港人對香港黃金年代的懷念。

      淨係睇搵錢錢會,已經夠叫人憶苦思甜. Hea曾可能就係擅於叫人懷舊...

      刪除