2017年10月15日 星期日

唔食飯都要玩模型

魔術師真係唔明,點解我城啲 kidults 可以咁有錢,又買樓又裝潢仲可以每個月買三幾盒 Lego 同手辦模型(36:00—47:00)?
樓盤傳真 2017/09/23 2017/09/23 23:20

新盤開價繼續挑戰買家購買力,最新戰線蔓延至啟德及將軍澳,新盤陸續登場。
荃灣西新盤效應仲未完,換樓業主紛紛趕賣樓套現找數,找來荃灣工廠三寶之一爵悅庭做例子。
佐敦 AVA62 入伙附送一屋傢俬,不過睡床比較短,只得六呎。
一個月買三至五盒新模型,間屋要預多少收納空間才足夠?
藍灣半島463呎兩房兩廳,本來只係掹掹緊的開則,但係竟然又要擺模型又要養番狗,結果就係連飯都唔(識)煮:

由於業主係無飯夫婦,又無「小朋友」唔需要整色整水的「遊戲區」,設計師便將原則(左上)的飯廳抹走,梳化與電視櫃對調(右上),由玄關開始造鞋櫃和小儲物櫃用來放鎖匙碎紙(左中),再沿住牆壁做一列長櫃放電視和陳列櫃(右中)。不過,冷氣吹住梳化頂(左下),隨時凍親事小(反正未必成日會電視),陳列櫃攏近窗搞到啲模型會被哂到變色事大(右下):

擴大套房就 easy job,拆牆打通兩間房便是(左上、右上)。五呎睡床又要升高地台增加收納空間,更只能單邊落床,床尾對住窗,一天光就照到你「自然醒」(左中);窗台書枱一樣都係咁頂腳(右中)。為了令主廁「招呼朋友」時不失主人睡房的私穩,便整色整水床頭矮櫃上整個磨砂玻璃擋一擋,又話可以引入光線,床頭矮櫃自不然又要偷空做埋啲無無謂謂的 display(左下);主廁改趟門,但馬桶卻是對正門口(右下):

既然係無飯夫婦,個廚房連階磚仲排花色,搞到咁靚做乜(左上、右上)?唔怪得俾記者妹串佢話啲廚櫃都可以用嚟擺模型。之但係打風落雨無街去,戶主夫婦點食飯?唔怕,門口櫃底有位收埋摺檯(左下),又或者在茶几上食個杯麵(右下紅圈),真係慢慢食又得,即刻食又得,得咗!

最後就係戶主隻狗仔,係魔術師最討厭的玩具狗(都唔出奇,反正都成屋玩具),開飯區就是在大而無當的陳列椅底下:

如果戶主一個月買兩至五盒模型,咁以前啲存貨呢?呢個裝潢依家都只係夠疏疏落落咁擺模型(抑或只能叫做手辦公仔),個設計真係可以提供未來兩至五年的儲物需求?睇怕業主夫婦都係等SSD過氣之後速速換樓算罷喇!裝潢費都係唔好咁花錢算了:
***
伸延閱讀:
Junk Bay 博覽館

19 則留言:

  1. 咁貴買間屋就係要 display D 唔等使嘢。
    連果 D D 書都只 for display。

    回覆刪除
    回覆
    1. //display D 唔等使嘢

      嗰啲都唔係模型嚟,只係擺設,一舊舊啤出來一式一樣的塑膠,毫無美術成份,梗係唔等使喇!

      //書都只 for display

      呢啲咁嘅kidults,通常讀完大學就已經「受夠了」,又點會係愛書之人呢?

      刪除
  2. 有線介紹過幾間模型屋,可惜根本就冇模型作品。我重以為今次會見到高手之作tim...

    //點解我城啲 kidults 可以咁有錢,又買樓又裝潢仲可以每個月買三幾盒 Lego 同手辦模型

    如果冇細路又冇乜其他高價嗜好(好似我咁),唔駛有錢都應該負擔得起,大概只係每個月幾千蚊。


    //如果戶主一個月買兩至五盒模型,咁以前啲存貨呢?

    可能放入倉或office掛。要用心完成一盒模型(光影/金屬塗裝、各種舊化、改造、情景等)真係要花好長時間,依家我都好少買模型,砌好都立刻丟左個盒(呢個先至最佔空間)。


    //呢個裝潢依家都只係夠疏疏落落咁擺模型(抑或只能叫做手辦公仔)

    兩者都唔係,只係Kubrick熊公仔,買來擺冇得砌冇乜得玩的。呢個糸列我就真係唔識欣賞。

    手辦師基本上係設造型師同雕刻家,須要好高技術的。就算係玩手辦都好難。要set件,要表面打磨,要在冇乜分件的情況下上色...我就冇能力同時間玩了。

    https://zh.wikipedia.org/wiki/%E6%89%8B%E5%8A%9E


    回覆刪除
    回覆
    1. 細嗰中學時有同學砌模型,要做埋嗰背景,計景深大小比例等,要影相出嚟好似真嘅現場一樣。現在買一嗰熊就算喺...

      刪除
    2. //有線介紹過幾間模型屋,可惜根本就冇模型作品。
      //做埋嗰背景,計景深大小比例等,要影相出嚟好似真嘅現場一樣。現在買一嗰熊就算喺...

      呢個一向都係傷民的問題,由中剷到笨土都係一樣,就係做嘢(無論係工作上定係興趣上)唔認真,就算係比較「認真」的業餘程度都無(專業級就更更更少),大多數人都只係學少少皮毛扮下嘢,唔會花心神去學美術手藝,同埋去加一啲「個人色彩」(例如場景景深上色等等)上去,只要買現成就夠好。

      笨土巷蜀都係一樣,拉下橫額,批鬧下校長,驅下蝗就算,搞獨立只係得把口,真係好專業地搞革命拋頭顱灑熱血就唔見有人做了。

      //每個月幾千蚊

      你咪以為我成日買貴嘢,其實我平均每個月都洗唔到幾千蚊在娛樂項目之上。

      //可能放入倉或office掛

      個節目就係話戶主唔想將啲「寶貝」放入倉,所以要個設計師想辦法增加陳列空間。

      //手辦師基本上係設造型師同雕刻家,須要好高技術的。

      班傷民真係咁神心,老豆老本行雕刻就唔會凋零喇!

      刪除
  3. 其實床頭喺唔喺已經算喺懸空咗冇靠山?得一面落地嘅床(仲要落樓梯)已經夠差---咁多空間用咗嚟擺玩具,不如索性住喺迷你倉喇夠晒四正。

    個廚房啲階磚砌到凹凸不平啲罅位時大時細,咁曳嘅手工都收貨,仲話喺玩模型嘅人。

    之前嗰驗樓師喺港台有節目講啲裝修佬點樣做啲無謂嘢掠水,畸寶可以參考吓 XD

    回覆刪除
    回覆
    1. //床頭喺唔喺已經算喺懸空咗冇靠山

      靠山要係實牆,而唔係一個空心矮櫃,不過又未至於完全懸空嘅,有少少嘢頂住下咁...

      //不如索性住喺迷你倉喇夠晒四正

      慘過住劏房。

      //咁曳嘅手工都收貨,仲話喺玩模型嘅人

      係「自稱」玩模型啫,講出來嚇得吓人。

      //無謂嘢掠水

      等我搵下先 XD 唔知鎢絲 sir 有無上榜?

      刪除
    2. //等我搵下先 XD 唔知鎢絲 sir 有無上榜?

      https://www.youtube.com/watch?v=pHelTPxMfwA&t=1419s
      https://www.youtube.com/watch?v=QkL5J5Z-A2U&t=1127s
      大約 17分鐘 開始

      刪除
    3. 哈哈, 鎢絲sir最鍾意就拆哂啲嘢...XD

      又, D, youtube 右手邊出咗呢條片

      https://www.youtube.com/watch?v=B099F99SFdg

      刪除
    4. 鎢絲sir好似消失咗,可能柒過頭被貶可惜啊。

      //D, youtube 右手邊出咗呢條片

      "我唔喺淨喺得個樣" 嘩 XD XD

      刪除

    5. //鎢絲sir好似消失咗,可能柒過頭被貶可惜啊。

      可能人地去咗食大茶飯。

      //"我唔喺淨喺得個樣" 嘩 XD XD

      搞到我好想...寫一篇...

      刪除
  4. 唯一可取之處,就係個廳算有足夠收納柜。

    缺點太多:

    大門與柜門,百份百永久相撞,點解唔將柜門位改至則板方向呢?可惜。

    放電視空間,已没有位置擺其他装置,E .G. mytv, 電视盒,sound bar etc.

    最惨就係排地柜装晒門,若把週边装置放入去,莫講話無通道線接入電视,就算唔怕肉酸開孔,用搖控時,亦要打開門先得,搞笑。

    放可愛天真公仔嘅玻璃門太近窗口,唔反光先奇,坐在梳化,等如長受光害。

    兩個睡房改為一個:

    四份一空間變成長走廊,敗筆到極,搞到上床要大 U turn。

    床頭與走廊,更装上到頂玻璃,即係又反轉頭, 變回一間只有睡床嘅房,痴痴地。

    兩房打通本來空間唔細,但亦只有单供一人使用嘅工作間,死未。

    工作枱則的到頂書架,顶層只會封塵,因取放東西太困難,亦危險。

    從平面圖睇,衣柜深度太淺,多數掛唔到衫,點算。

    回覆刪除
    回覆
    1. //大門與柜門,百份百永久相撞,點解唔將柜門位改至則板方向呢?可惜。

      呢個真係一個bug。

      //放電視空間,已没有位置擺其他装置

      戶主應該唔係追求影音內容及效果的新一袋潮人。

      //最惨就係排地柜装晒門,若把週边装置放入去

      戶主應該未考慮過要接駁任何影音設備,只睇CCTVB便算。

      //坐在梳化,等如長受光害。

      長期落簾。

      //床頭與走廊,更装上到頂玻璃
      //四份一空間變成長走廊,敗筆到極,搞到上床要大 U turn。

      話要有私隱唔好俾客人睇到睡床,但又要俾客人用到廁所吖馬...我又唔知點解依家班後生咁鍾意招呼朋友,間屋又唔係大。

      //但亦只有单供一人使用嘅工作間,死未。

      其實新一袋戶主只係將屋企當成係酒店。

      //工作枱則的到頂書架,顶層只會封塵,因取放東西太困難

      可能放啲不常取用的模型盒使算。

      //衣柜深度太淺,多數掛唔到衫,點算。

      衫可以放平擺 XD

      刪除
    2. //我又唔知點解依家班後生咁鍾意招呼朋友,間屋又唔係大。

      得張摺枱又冇櫈得嗰梳化,又唔煮飯,招呼朋友上嚟有乜好做?唔通玩3P4P?喺就唔怕人見到嗰床啦 XD

      刪除
    3. //3P/4P

      出廳搞又得,廚房搞又得,得咗!

      刪除
  5. 我都係至憎玩具狗,樓上有隻日日嘈到爆,都唔知d人點解可以咁自私
    果家好似係租客,都唔知點先可以攪走佢...

    回覆刪除
    回覆
    1. 愈細嘅狗吠得愈大聲,色厲內荏。

      又望樓價大升,業主大幅加租,咁個租客就可能會搬。

      刪除
    2. 但願如此,不過無公德心嘅人邊度都有,好多時避無可避,唉...

      刪除
    3. //無公德心嘅人邊度都有,好多時避無可避,

      傷民笑蝗民,都係五十步笑一百步而己.

      刪除