2017年11月5日 星期日

90萬打造四不像

戶主夫婦二人世界,諗住生「小朋友」,但又要買+X笨實樓,樓花買入,入咗伙先發覺啲房細到無倫,於是唯有做「反環保先鋒」(35:34—47:21):
樓盤傳真 2017/10/14 2017/10/14 23:04

施政報告公布,房屋政策影響有限,長實中環 MY CENTRAL ,參考西半山樓價,開出首批 50 伙均價每呎 2.9 萬元,部份新盤貨尾也加價。
康城站晉海熱賣,有否帶動將軍澳市中心一帶追落後,推高二手樓價?
裝修出錯時有發生,但當廁渠是跌級設計,U形隔氣跌落下層單位,卻被下層業主拆走,且不准許別人入屋維修,上層業主可以怎做?
三房一套,兼有儲物房,百分百豪宅格局,但全屋其實只有 660 呎,設計師又要大顯身手,改造空間。
間屋只得660呎(魔術師以前間居屋都有600呎喇,頂!),卻間了三房一套,仲要有雜物房(或工人房);空間無得大改造之下,唯有退而求其次,拆房改善「空間感」。女戶主竟然「喜歡煮食」(抑或係扮「喜歡煮食」的港女?),要擴闊廚房,設計師例牌又要改開放式廚房,又要有「精品酒店」(定係「時鐘酒店?」)的感覺;加上地產霸為了避免犯建築物條例(採光窗與對面牆壁不能多於9米),於是便無端端起咗一間房(左下,剔號),業主要是自行清拆,地產霸自然關人個關:

果然,設計師一嚟就係將原則嘅雜物房(或工人房,左上)拆掉,將之變成鞋櫃及開放式廚房的一部份(右上),於是一入門,右手邊是鞋櫃(左中),右手邊是客廁(右中),兩者均用隱藏門設計。入到客廁,戶主又大搞,馬桶用難以維修清潔的隱藏式水箱,夠哂有酒店 feel;但洗手盤就用水泥設計(左下),浴缸就係縮水版浴缸(右下),配合正方形瓦仔,十足十「痴瘋仔的監獄生涯」:

大嘥無極限,新樓廚房應該好企理,但因為女戶主「喜歡煮食」,所以便將三尖八角的廚櫃由頭做過,並且改為玻璃趟門設計(左上、右上)。一轉身行出廚房便對正客飯廳的中島 island,lsland 只有鋪過來去水的水龍頭之外,無得煮食,但有伸延出來的雲石面飯檯,咁細面積又無爐頭,唔知道夠唔夠「喜歡煮食」的女戶主用(唔通只係整沙律?)。對面企身大櫃就係時興但用起來就煩的蒸焗爐;最頂廳的就是雪櫃以隱藏式設計放出廳(唔好以為淨係公屋的迷你廚房先需要將雪櫃放出廳),搞到「喜歡煮食」的女戶主要拎住啲餸菜走出走入(左下)。客廳太細無電視櫃,但設計師話拉咗線,影音器材可收在設計師手指的角落(睇怕都唔夠大擺 HiFi 器材,最多只能放機頂盒),但就唔知點樣用個遙控指住啲「盒仔」(唔通用 Logitech Harmony Ultimate 系列萬用遙控?):

設計師將原來的兩間細房的間隔牆打通,再以趟門分隔,左邊手的做將來的BB房,右邊手的做衣帽間(左上,右上)。唔知係戶主諗住領養定係將BB交俾四大長老照顧,直到大咗至接返嚟住,間BB房就未有BB床便先有單人床仔同書檯書櫃,靠牆鋪有軟墊以防一轉身墥親個頭(左中、右中),燈罩裡的擺設可以給主人家隨意轉換,應該可以吸引唔少飛蛾撲火並藏屍其中(左下)。衣帽間造哂企身大櫃,連僅有的窗都封住:

設計師又將主人房門改為趟門設計(左上、右上),半截牆身中空造玻璃,如果打開房門的話,一入屋就睇到張床(左中、右中)。在睡房裡,兩夫婦可以坐在床上睇電視,不過除非打開門,隔住玻璃聲音應該唔會聽得好清楚;亦可以在睡床上望出窗,亦即是窗外人可以用望遠鏡望到夫婦倆扑嘢,要用私隱唯有就關上門,落下電動捲簾,不過BB房在屋的另一角,到時只怕BB會叫天不應叫地不聞(左下)。趟門關上後在室內是一面企身鏡,好讓女戶主做瑜伽(好在看圖則空間仲有一張雙人床咁大,雖然做唔到大動作,但都應該夠位練倒立,唔使練縮骨功):

最爆就係個套廁,玻璃門直接可從睡床望穿大小解狀態不特止(玻璃門是掩門,有裝電簾乎?)賦因為要遷就女戶主要張梳妝枱扮靚靚,所以便要將馬桶搬入玻璃企缸裡面(正面啲睇係拉肚子都多道門隔一隔,未至於臭氣沖天),化妝要對住個塔,沖涼又對住個塔,認真夠哂開胃:

呢個設計可謂非常「扮嘢」:自稱「喜歡煮食」但廚房設計卻又唔係煮食 friendly;話要生B但主人房同嬰兒房設計卻又是唔係湊B friendly;話要做瑜伽但空間卻又不是 yoga friendly;話要化妝但又面對X塔...樣樣都要扮有要求但結果就只得皮毛,變成四不像,真係中慘港豬典型。
***
伸延閱讀:
嚴選影音產品(四)

10 則留言:

  1. //衣帽間造哂企身大櫃,

    女戶主咁多白色吊帶小背心,好sexy
    間屋細仲要搞個衣帽間,又要梳妝台--女主人萬歲!

    //最爆就係個套廁,玻璃門直接可從睡床望穿大小解狀態不特止
    真喺要搞玻璃,點解唔用磨沙遮吓嗰C塔同埋屙C唔出時嘅肉緊樣?唯一好處就喺老公冇得匿喺廁所C塔打JJ,冷落了嬌妻。

    用九十萬將差嘅佈局搞番啱,點解當初要買呢間樓?點解唔用呢九十萬加碼買嗰好啲

    回覆刪除
    回覆
    1. //女戶主咁多白色吊帶小背心

      都有可能係設計師帶去, for display 的 dummy 衫 (帶小背心咁變態?)...

      //女主人萬歲!

      怕老婆會發達.

      //真喺要搞玻璃,點解唔用磨沙遮吓嗰C塔同埋屙C唔出時嘅肉緊樣?

      真心唔明做乜咁鍾意將個廁所用玻璃間牆, 唯一解釋就係要避咗個黑廁.

      //點解唔用呢九十萬加碼買嗰好啲

      就算係5成按揭, 加多九十萬已經可以買多180萬樓了...不過依戶主的7 head 性格, 似乎都係鍾意無無謂謂執一劑, 間屋愈大洗費愈貴

      刪除
  2. //唯一好處就喺老公冇得匿喺廁所C塔打JJ,冷落了嬌妻

    https://youtu.be/SRmQPddgdwM

    回覆刪除
    回覆
    1. 原來摩兄唔單單喺港產片,連廣告都咁得!

      刪除
    2. 摩摩真係「深藏不露」(縮陽?)!

      刪除
  3. 回覆
    1. 「阿B佢父母緣薄,細時都係跟爺爺嫲嫲好啲,第日大咗先接返嚟住喇!」

      刪除
    2. 其實用嗰所謂衣帽間嘅位就可以做個BB床房,或者唔好搞大個廁所用玩瑜伽嗰位又得,話要生B真喺唔知呃邊嗰。
      又,我估計從嗰所謂B房窗望出去應該會望到個荃灣華人永遠墳場喺左面...樓花買入時知唔知嘅呢?

      刪除
    3. //話要生B真喺唔知呃邊嗰。

      近年興潮爸潮媽 lifestyle,睇怕戶主夫婦都係想扮嘢。

      //應該會望到個荃灣華人永遠墳場喺左面...

      咁我又唔知喎! 唔怪得成集節目無影出窗喇!

      刪除