《Ｐ風暴（P Storm）》：坐監還是我城好

呢個「字母風暴」系列，魔術師由舊 blog 寫到新 blog，集集都有寫，只見一集衰過一集，幾乎變成「教育電視電影」，真心唔明點解以咁渣的劇情可以找到如此相當唔錯的卡士來演？

＊＊＊

一開始，廉政公署首席調查主任陸志廉（古天樂飾）便因危險駕駛被判監。陸志廉一入到監便被獄長沈國強（譚耀文飾）施以下馬威，不過獄長都尚算斯文有禮，無叫陸 sir 要好似痴瘋仔咁鴨仔跳然後踎低含情脈脈咁向上望，亦無話陸志廉大腸內有異物要單獨困禁。

Natalie（周秀娜飾）本來和爺爺（盧海鵬飾）在我城郊外享受田園生活。某天地產霸強徵土地，爺爺為保家園被泥頭車以轆豬形式輾死。事後有五人自首，黑警亦拘捕了主腦曹元元（林峯飾）。曹元元被判監六年，但坐了三年便因行為良好獲假釋，並派人恐嚇 Natalie。Natalie 因為不相信曹可以「行為良好」，便懷疑監獄有人受賄，並向陸 sir 篤灰，而廉署竟然就在毫無實質證據下開 file 受理...

曹元元是蝗民富二代，跟阿媽曹白（陳曼娜飾）姓，父親是誰無人知。曹白兩母子以投資移民來到我城，曹元元大搞收地賺到唔少。懲教署報告話曹元元在獄中讀了個 MBA，但陸 sir 卻查到曹元元無讀過書（如何得知？），故懷疑懲教署有人包庇。陸 sir 想要以臥底身份入獄搜證，想不到懲教署署長（石修飾）一口答應，話想廉署幫手揪出客群之馬，變相承認自己管理不善，認真匪夷所思。

陸 sir 在獄中認識了監獄常客王藍祿（張繼聰飾），又遇上在《Ｚ風暴》中親手拘捕的前警司黃文彬（林家棟飾），當然少不了盯上目標人物元少。黃文彬在監中綽號「黃老邪」，也有一群手下，見到陸 sir ，卻沒有揭穿他是老廉的身份。在獄中，元少和黃老邪是敵對勢力，而獄長也有煽惑兩派亙鬥，認真唔明點解。橋唔怕舊最緊要受，在好幾次的監獄「活動」之中，陸 sir 都幫了元少一把，又顯示自己好打得，以搏取元少好感，拉上關係。

王藍祿見翌日便出獄，便來跟陸 sir 交個購友，自我介紹話自己係監獄常客，當十六歲仲係個優秀的細路仔之時便開始在感化院領悟到精彩人生，從此進出監獄多次。陸 sir 在獄中仔細觀察獄卒舉動，見到竟然有人賭馬。住咗監好幾年的元少竟然落單被黃文彬率眾圍攻，陸 sir 挺身保護元少受傷，咁就贏到元少信任，情節認真老土。同時，壞獄卒錢果豐（艾威飾）教好獄卒王家安（柏天男飾）回樣寫報告遮瞞囚犯打交事件。在《Ｌ風暴》中做廉署紀律韶查組的程德明（鄭嘉穎飾）竟然暫代統率陸 sir 的小組，又扮醫生去醫院收陸 sir 查到的可疑獄卒名單；同時懲教署署長又收到好獄卒小王舉報篤灰。

七天後陸 sir 出院，曹元元運用影響力把陸 sir 調到跟自己同倉。元少問起開始陸 sir 的背景，陸 sir 自有佈置編個故事胡混過去，成功「跟」了元少。自從陸 sir 來了，黃老邪和元少兩幫人經常打交，獄長便要頓起個款叫三人來照肺。陸 sir 回到監房，卻又見到王藍祿又返嚟坐監（我城的黑警和法庭幾時幾時變得咁高效率？）。原來阿祿為了避債，便犯了些小案再入來坐牢，反正可以省回衣食住行各項生活使費，醫療又不用迫急症，故此年輕人一不用輪公屋，二不用為地產霸打死一世工做樓奴，坐牢就是我城有青的唯一出路。怪唔之得咁多首觸入去過精彩人生喇！阿祿並打趣話自己會去選衰蟻員（！），真係好有前膽性。陸 sir 也從阿祿的口中得知獄長跟元少相當「友好」。

原來元少有份幫獄長個女在尾帝搞婚禮，又幫佢個仔去尾帝上大學，交換條件就係要獄長幫手起陸 sir 底。陸 sir 偷看了壞獄卒阿錢的電話訊息，便託好獄卒小王去通水，成功騙倒了幫元少調查陸 sir 背景的姚劣Ｃ（廖啟智飾）。

阿祿的女友 Donut（陳靜飾）來探監，話同第二個男人在咗ＢＢ，要同阿祿分手，反正阿祿成日坐監，明知跟佢沒將來。陸 sir 聽完阿祿盡訴心中情，便話 Donut 只是騙他，如果真係要分手跟佬走，也不會來探望，趁阿祿在獄中自行消失不就容易得多嗎？

程 sir 和老廉眾人查到資料，懷疑曹元元以獎學金方式幫獄長、獄卒等人的子女去外國或我城國際學校讀書，以作為賄賂的手段。另一方面，壞獄卒阿錢安排元少在監獄外跟姚劣Ｃ見面，姚劣Ｃ告知話 Natalie 向廉署舉報，元少大怒，要姚劣Ｃ玩死 Natalie。好獄卒小王看不過眼，卻被阿錢打發掉。陸 sir 得知 Natalie 有危險，馬上要小王安排打電話回廉署通報。為了捉 Natalie，元少手下竟然可以當街開槍追捕，程 sir 趕到帶住 Natalie 四處躲避，待避過兇徒追殺後，程 sir 便帶 Natalie 到安全屋躲避。

在上一集見過的蝗國反貪局處長洪亮帶同最高人民檢察院調查主任丁柔來我城跨境要調查曹元元之生父袁正雲的行蹤（好在無俾販民知道，否則又會起風波），事敗被曹家的手下發現，故要求老廉幫忙。袁正雲跟情婦來探元少監，原來係要約定要曹元元提早假釋，一家人齊齊流亡外國，當然其間兩父子又鬧吓交，等元少好交返啲內心戲，話到尾佢其實都只係一個想得到父親稱許的有青（但依然要靠父幹拿第一桶金）。

陸 sir 踎咗咁耐，終於找到由懲教人員交俾元少的馬經，並轉交程 sir 跟進是否獄中的貪污案有關。懲教署署長真係好得閒，竟然幫手查案，知道袁正雲化名楊金承去探元少監。由於小王唔肯埋獄長堆，便被獄長調走，陸 sir 失去保護。獄長竟然唔將辦公室鎖匙放進鎖匙包，反而吊吊揈跌咗，被陸 sir 拾獲，又得阿祿掩護，乘機進入獄長辦公室搜查，找到了獄長收受元少以獎學金幫阿仔「供書教學」的證據。

姚劣Ｃ竟然可以憑 Natalie 的手機號碼找到發射站的位置，再找到老廉的安全屋，也不知應該讚姚劣Ｃ神通廣大定係恥笑老廉廢。阿祿因為要做好爸爸，決心出獄後做正行，同時要他通報程 sir，轉交獄長收受利益的證據。獄長遍尋那份獎學金文件不獲，認為一定跟阿祿有關，便要元少去處理。元少叫姚劣Ｃ派人嚴刑拷問阿祿，仲直播返監倉俾元少睇，但阿祿卻十分口硬，毫無結果。

程 sir 等人根據陸 sir 找到的證據，查到部分袁正雲慈善基金的「獎學金」轉到了獄長兒子在美帝那邊的銀行戶口，看來獄長等並不怕被制裁；而曹元元跟袁正雲並無「父子證明」，名義上跟袁氏慈善基金毫無關係，告佢唔入。程 sir 又去探陸 sir 監，告知案情發展及阿祿的傷勢。元少見陸 sir 明天出獄，便要他去廉記的安全屋「搞定」Natalie，手機直播過程，事成後可以跟他到楓葉國。

黃文彬告訴元少，陸 sir 係老廉的人，元少便改變策略。陸 sir 去到安全屋，卻見元少早已付了三千萬給獄長，提早出獄，後發先至控制了場面，都唔係係元少班手下勁，定係老廉廢。唔知點解元少同 Natalie 咁大仇口，唔跟老父逃亡，反而一定要置娜姐於死地。這時老廉殺出來，跟元少等人展開激烈槍戰。果然，元少一面跟老廉槍戰，另一方面獄長和老錢等已被廉記的另一隊調查隊逮住。曹元元竟然驍勇善戰到可以打贏陸 sir，在老廉手下將娜姐捉走做人質，押往直昇機走佬。

程 sir 又跳上直昇機跟元少糾纏，唔知點解程 sir 竟然又唔夠成個道友咁款的元少打，好在有娜姐出手將元少推出直昇機，掉落海中，再由陸 sir將元少拘捕歸案。黃文彬因為在獄中幫助陸 sir 埋元少堆，獲得假釋。老廉亦截獲袁正雲和曹白，交予蝗國反貪部送中查辦。

曹元元最後被判坐２５年，其餘獄長、阿錢、姚劣Ｃ等被判數年監，袁正雲則在蝗國享受陽光司法；黃文彬最後開了保安公司，而陸 sir 亦為阿祿做了 ＤＮＡ 測試，證實阿祿係 Donut 個 BB 的生父。片末最後交待話黑獄吏只係少數，本片無抹黑之嫌。

＊＊＊

本片犯駁位甚多，即使以電視電影水準而論，劇本的嚴謹程度都係差強人意：

１. 警方也好、廉記也好，按道理娜姐只係一句「曹元元無可能行為良好，可以獲得假釋」，無理由單憑猜測毫無實質證據，便進行臥底行動。

２. 就算係高佬廷咁嘅老廉散仔都咁有新聞價值，老廉大名鼎鼎的首席調查主任要入獄，獄長等無可能唔知掛？做臥底竟然唔係用名不見經傳的新仔呢吓嘢認真難頂。

３. 元少明明已經坐咗一段時間監，跟黃文彬交惡已久，但黃文彬暗算佢的方法就然就像算計一個無心人一樣容易。

４. 王藍祿就算出獄後再犯事，黑警和法庭都不可能在七天內把他送回監倉咁高效率吧?

５. 獄長點會咁輕易收了元少三千萬？銀行過數可輕易被查出，基本上是找死。

６. 娜姐只係向老廉舉報咁大把，搜證的工作全落在陸志廉身上，完全唔明白點解元少會咁憎恨 Natalie，要追殺佢９條街，仲同老廉大槍戰，殺咗Ｎ個人咁大鑊。

７. 魔術師未去過監獄，只係覺得囚衣上 的 label 紙寫住囚友的中文名，認真搞笑。現實是否如此，可能要問吓小膠樽才知。

以呢套戲咁鬼渣的劇本，真係嘥咗古天樂。可能明知警匪片在我城都唔會收得，倒不如寫返啲比較貼近「主旋律」的劇情，方便內循環。本片唯一亮點就係張繼聰：有青的將來就是要坐監、做衰蟻員、驗血證明父子關係，真係句句都係咁正。

魔術師評分：４５分（基本）＋５分（張繼聰）＝５０分（１００分為滿分）

＊＊＊

伸延閱讀：

《Ｓ風暴（S Storm）》：可唔可以拍得唔好咁ｈｅａ？

《Ｌ風暴（L Storm）》：巷人巷審反送中