舉頭三呎有黎明（下）

話說沖 san 出咗上集撐黎蝠王的「視頻」之後，竟惹來不少粉絲質疑，故此有下集出現：

同樣地，魔術師雖然唔 care 黎蝠王是藍是黃定真係「蝙蝠」食兩家茶禮，但只係以邏輯思辨來看，沖 san 的論證也是頗為有力，值得學習的；而且沖 san 回應這些常見的藍人「邏輯」（或「邏輯錯誤」），也值得引述一二，溫故知新。

１. 有網友認為藍營唔服氣係因為黃營未投降，但問題係黃營無大台，２００萬＋１誰也不代表誰，點樣先算係「投降」？具體要點做？犯法者可以去自首，但無犯法的呢？好似葉德嫻咁，想佢點「投降」法？而且黃營又無「名冊」，又點知是否所有黃人投哂降未？

２. 點解黃又好、藍又好，都咁熱衷於捉鬼，看誰不夠黃／藍呢？估計應該係呢類黃／藍人係要倚靠「敵人的存在」才有存在意義。「敵人」無聲無氣，就去製造敵人來證明自己有存在價值，唯恐天下不亂。內鬥就係咁形成。而質疑你，要你解釋（其實點解釋我都唔會滿意），再逼你道歉，就係常用的 self actualization 手段（又關馬屎撈事）。「Ｎ件衫唔着，點解偏係要着呢件衫」、「咁多朋友都唔請去做嘉賓，偏要請呢一位」、「有咁多個方法唔做，偏要做呢一個」就係好例子：呢啲所謂「詰問」，其實已經假設了「着呢件衫」、「邀請呢位朋位」、「用呢個方法」係有某種目的，發問者已有既定答案，故此係犯了「不當預設謬誤」，只係「話術」而已。試想，如果你上司話：「我正要找你做事，你就去咗廁所。有乜解釋？」你又可以點答呢？

３. 呢一段係第１點的延續。唔好話發哥、黎明呢啲無正式表過態嘅，好似葉德嫻咁，佢明顯係撐黃，但佢無犯法，又可以要求佢點「投降」呢？好似帶子女去「悼念」刺警案兇徒嘅父母，有可能被控以煽動罪都送進獄中（個細路咪要搵監護人，或者入保良局，應該是後話）；但其他黃色父母也可以唔出面，改在家「教導」，咁正苦／藍營又點樣去「消滅」呢班人呢？

４. 誅心論（訴諸動機）和質疑動機只是一線之隔，但有時連動機都不能自圓其說，這些「誅心論」就未免弱過弱煲。你話黃營氣勢最強的時候表態擦佢地鞋就話啫，但依家黃人早已忘記「齊上齊落」之說，黃色經濟圈亦唔多做得起，黎蝠王𢲡Ｘ上身又有乜謂呢？

５. 今次真係講到葉德嫻，無人鬧劉華跟 Deanie 姐關係密切係「錯」（魔術師很奇怪為什麼人同人的交往或是做其他的事，合法合規都會有「對」「錯」之分）。無人 Ｄ 劉華就如同無人（敢？）叉能廚發哥着黑色衫一樣，要求黎蝠王解釋「點解邀請黃人」的原因，係因為某啲人見黎生平時金句上身無句真，似乎比較「好恰」？定係班友巨嬰病發，「我睇你唔順眼，你就要向我道歉」？諗落都幾燒腦。

６. 黃營文宣興有理無理都屈咗先，以老屈造成既定觀念，損害已成，「受害者」再努力澄清都無用。現在藍營又用返同樣套路，仲可以加上「愛國」大旗。但以傷民的投機本性來看，「愛國」很容易變成廉價的口號，主要都是掛在嘴邊用來傷人；寶寶龍等所說的「賢能者治港」，如何落實實在叫人期待。

＊＊＊

伸延閱讀：

舉頭三呎有黎明（上）

維基百科：訴諸動機