交通擠塞（2nd edition）

魔術師在３月份開始搞轉按（見《轉按格價精明眼》），折騰了好幾個月，終於算是賺取到跟蝗資錢莊打交道的經驗值。

１. 效率奇慢

話說魔術師交咗按揭申請表去蝗資錢莊之後，便由個疑似 senior 哥哥轉手交俾個 junior 妹妹，然後便無聲無氣。魔術師打過電話去問，阿妹妹唔係放咗工就係放咗假，再唔係就係「唔係位」，寫電郵去又唔覆。魔術師問按揭中介「搞咗差唔多成兩個月都無腥氣，呢間行係咪一向都係咁」，中介竟然識得玩爛 gag 「呢排真係交通擠塞」...

中介於是又推介了另外一間蝗資錢莊俾魔術師，魔術師填好表後，唔使兩個星期就已經覆話批咗...但可惜，在新呢間蝗資錢莊聯絡上魔術師的前幾天，「交通局部恢復正常」：junior 妹妹話俾魔術師聽核已批，可以補交返少許文件同埋上劣Ｃ樓開始搞契。魔術師便馬上去劣Ｃ樓落訂。新蝗資行遲了幾天，魔術師便惟有 turn down offer。

２. 幫手做 trainer

又過咗個幾月，繼續係無聲無氣，就連劣Ｃ樓都打嚟問魔術師係唔係路，佢地都俾魔術師的原按揭錢莊小貓逼迫，話借咗份樓契走咁鬼耐都無 action。魔術師 call 了又 call，幾經辛苦終於都搵到 junior 妹妹，問佢仲爭啲乜嘢...

點知 junior 妹妹劈頭就一句：「我諗住你會約我（魔：咁曖昧？）開戶口...」

魔術師忍住唔Ｄ呢位素未謀面的霉妹仔，畢竟手續仲要靠佢完成，於是好聲好氣咁「主動地約佢」去分行開戶...

去到分行，口罩下的 junior 妹妹果然成個 freshgrad trainee 咁，真係「我見猶憐」（大誤），唯有含蓄地話俾霉妹仔聽「今時今日咁嘅股務態度唔得」，不過可能呢間蝗資行都唔志在魔術師呢類客戶...

一路講一路簽文件，魔術師心中有數，見霉妹仔好似想執拾完成咁，便問：「我份 offer letter 呢？」

Junior 妹妹如夢初醒，馬上兜返：「我一陣俾份 offer letter 你簽。」

魔術師心中爆粗，你唔係諗住嚟「開戶口」就真係「開戶口」咁簡單吓嘩？佢究竟識唔識啲 procedures 架？

３. 詭異供款表

魔術師再三跟 junior 妹妹確認無任何遺漏後便完成錢莊的手續，不過都要過多兩個星期才收到劣Ｃ樓電話，話錢莊文件已準備好了，魔術師可以擇日上去簽。之前一次在小貓搞按揭，其按揭部職員是跟得很到位，從來唔會「要個客提返佢點做」，而且解釋條文係由小貓職員自己講，而今次蝗資錢莊就係由劣Ｃ講。講完簽完約好還款日期便完成了，魔術師在劣Ｃ樓停留時間也不用半小時。

之但係，數天後蝗資錢莊就寄來一封頗為詭異的供款表，成份嘢係無 page number，只係第一頁印有魔術師的地址（其他頁數就無），而第一頁的供款期數竟然是由第２２３期開始！媽呀，魔術師究竟睇緊乜？

2nd edition：是日（２０２１年８月２０日）終於收到「還款表」part 1 了！係由第１期計到第２４２期。魔術師就合理地懷疑因為膠桶錢莊份「還款表」係 single side printing，不環保之餘仲搞到個信封唔夠位，所以就分開兩日寄，仲要隔好幾日先寄到。其實「還款表」並唔需要每一期都 show 哂出嚟，魔術師以前都收過只係 show 最近２４個月與及最後１２個月的供款，兩三頁紙搞掂，使乜搞咁多嘢？唔通蝗資就真係唔在乎慳 cost？

＊＊＊

伸延閱讀：

轉按格價精明眼