支付佬優惠劵考

在《支付佬與微信女》一文中，魔術師曾經講過支的界面比較清晰易用，功能也較多；但用落才發現原來微信女的印花優惠係每星期 reset 一次，以婆仔數換 coupon 來說就勝過每月才 reset 一次的支付佬了。更何況，支付佬有啲優惠劵真係得啖笑，好睇唔好用。

最佳例子就係７月份的「公共服務繳費即減１０元劵 x ２」咁，原來「公共服務繳費」只係限於電費、煤氣費、同埋差餉地租（電訊商上網費、電話費唔計），仲要一個月內要用完，又唔能夠以信用卡繳費。要知道我城電費、煤氣費只係每兩個月交一次，交款時間唔就便得物無所用。魔術師當月就唔使交煤氣費，電費剛超過＄１,０００，差餉地租就更加要＄２,０００以上。用信用卡交電費、差餉地租，回贈至少有１％，實在無理由會用「立減劵」，呢啲所謂優惠真係嘥９氣。不過，為咗 mauipulate 一下個大數據，魔術師都唔介意蝕１個幾毫用來交電費，但差餉地租就都係用返信用卡了。

另外，最近魔術師在支付佬換 coupon 又遇上了 bug，印象真是大打折扣（唔知係咪掛住搞消費劵，測試開始唔認真）：

是咁的，某日魔術師在支付佬換了以上呢張優惠劵，諗住食完飯（超過＄７０）用嚟找數慳返１０蚊咁大把。點知依照說明按「立即使用」之後，倒數 counter 唔出嚟，反而直接出咗個付款 QR code。說時遲那時快，店員已嘟了魔術師部手機，交易即時完成...

魔術師倒抽一口涼氣，果然係無扣到＄１０優惠劵，便問一問店員是否有按錯掣。

「電子消費呢啲嘢我地唔識咁多，只係照住撳掣...」店員可能驚魔術師會發爛渣。

魔術師明白店家都只係 end users，消費優惠點樣扣數係支付平台的責任，便沒再跟店員瞎纏，取回單據（最緊要有付款編號），第二天再跟支付佬理論。

好在支付佬的客服資訊尚算清晰，唔使兩分鐘便找到了：

翌日魔術師打去問支付佬客服，接聽的是一名男有青，魔術師心感不妙。果然有青只係好似讀 script 咁，不停問魔術師的個人資料以確認身份，問咗三五七題之後，便到魔術師講出問題：「我換領咗一張太興＄１０ coupon，便撳完掣之後唔識出 counter，食店扣咗我全數。消費日期係８月Ｘ日晚上Ｘ點Ｘ分，款額Ｘ元，付款編號係 ＸＸＸＸ。」

魔術師講出來的都是調查事件的必要資訊，雖然明知有青客服一時間唔可能消化到所有嘢資訊，但都唔鬼理佢。鬼叫佢頭先聲衰衰毫無感情地讀 script？唔通又想魔術師好似調教蝗資錢莊妹妹仔（見《交通擠塞（2nd edition）》）咁 train 呢位有青咩？

有青果然慌了手腳，想拖延時間，便再問魔術師的個人資料。

魔術師答完，然後不耐煩地說：「呢啲資料剛才你已經問過喇喎！」

有青尷尬地想再重覆問題：「係咪你無撳到掣？」

魔術師沒好氣地再逐隻字重申：「係・我・撳・咗・掣，但・counter・無・出・現！」

有青恍然大悟：「啊！係個倒數無出現！請你等一等。」

有青隨即 put the line on hold。魔術師則懷疑有青的英文程度只係油麻地，覆述魔術師的問題時刻意避開了「counter」一字...

過咗幾分鐘，有青回來了。似乎佢問完上司之後有答案：「係呀，我地呢張劵係有啲問題，近日都收到好多電話問呢樣嘢。請你留下電郵地址，我地會幫你申請補發更新優惠劵俾你。請問你個電郵地址係？」

死喇！魔術師最討厭就係要在電話裡讀個電郵地址出嚟！點知對方有無聽錯抄錯？

果然，有青「甩甩咳咳」，每個字母都要魔術師重覆讀一次。就算講完之後佢再覆述一次，有青都係講到１９９，魔術師都無乜信心佢最後有無寫錯。

截至今日（２０２１年８月２２日）為止，魔術師就仲未收到任何 update，睇怕都係要再問問支付佬了！希望唔會係有青聽電話喇！

＊＊＊

伸延閱讀：

交通擠塞（2nd edition）

支付佬與微信女