2023年3月27日 星期一

摩摩電影節之《門徒(Protégé)》:說教不壞,壞在爛尾

《無雙》影評中魔術師曾盛贏氣質中女張靜初,其實張演的戲魔術師都評過好幾篇,從來沒有劣評,記得(如果無記錯)摩摩作為「巷慘片之王」有推介過張在《門徒》中吸毒的高潮樣,今次 Disney+ 有得睇,魔術師自然不會錯過:

***

在一某唐樓單位中,一名披着長髮的女子正在打白粉針,high 完之後躺在梳化昏睡過去;這時一名疑似是女子女兒的小女孩把針筒從女子的手臂上拔去,丟到垃圾桶裡去。爾後,人去樓空,一名 popo(吳彥祖飾)來到,躺在梳化上,思考着:直至昆哥和阿芬死後,他才明白人之所以會吸毒,原來是來自空虛。

阿力(吳彥祖飾)在犯毒集團的頭目,派手下運輸散貨兼甩掉警方的追蹤,通話完畢便將電話拋棄。阿力回到唐樓家中煮麵食,卻見到對面樓的小女孩叫肚餓。單親媽媽(張靜初飾)見到阿力在吃麵,便去拍門求「借糧」,話係因為被人拖糧先墮入困境。阿力沒有麵只有麵包,便給了單親媽媽;阿力隔窗偷看,只見兩母女在狼吞虎嚥,真係窮到姥姥家。

大住肚的昆嫂(袁詠儀飾)致電阿力,話老公入咗醫院。阿力去到醫院,見到昆哥個 Tomboy 頭大女極度反叛態度又差。昆哥(劉德華飾)就連去次所都有困難,要阿力陪同。原來昆哥有糖尿病導致腎臟有併發症,老婆又有雙高,細女就心漏,成家人都有問題。昆哥不願在我城做手術,要同細女去外國一齊做。阿力向昆哥交代「帶貨」勝利完成,又想問拎貨搞私幫,原來昆哥就係販毒集團的老大。昆哥非常小心要問明買家是穩陣的。阿力出到醫院,被昆哥的姨仔(何美鈿飾)野生捕獲想約睇戲,阿力不為所動大派檸檬。

阿力買了大包小包的去接濟單親媽媽,又帶兩母女去食大排檔,知道小女孩叫晶晶,單親媽媽以賣老翻為生,又同老公分開咗。昆哥急 call 阿力,話「廚房」出事,要阿力揸車陪同視察。昆哥行事機密,就連他自己都不知「廚房」位置,要「大廚」帶上樓。昆哥以化學知識找出問題所在,原來是某些來料出錯。時間緊逼,昆哥親自出馬搞自家烘焙,製成99.99%高純度海洛英磚,阿力則站在一旁睇眾人表演。昆哥拿着秤好的製成品給阿力(和觀眾)解畫,話這些海洛英磚被警方稱為「四仔」,黑道則稱為「美金」;由於純度太高會食死人,便有無良拆家用各種黑心手法溝淡成為「巷幣」,變成「黑心白粉」賣給道友。

昆哥給了幾包靚貨阿力,讓他自己找客出貨賺取經驗,好讓將來交棒。阿力將貨轉交上司苗sir(爾冬陞飾),苗sir則幫阿力出貨到海外,並將警方的錢轉交阿力。因為昆哥控制了我城大半貨源,一哥要求他儘量捉到所有有關昆哥集團的首腦人物,但如果昆哥要走,就一定要結案。阿力要考慮再三,畢竟已做了七年臥底,就連女友也失去了。

阿芬拒絕G蟲問價,阿力見狀便請阿芬做家務助理,又俾錢她幫晶晶搵學校。昆哥介紹倉主寇哥給阿力認識,再一次認定阿力係接班人。昆哥將行規講俾阿力聽,並且聲明各單位頭目能不見面就不見面,亦無人會知對方的巢穴地址;有事要做就找嘍囉跑腿,自己不用上身。阿力在阿芬家裡飲飽食醉,小睡一會。阿芬原來是癮君子,毒癮起時從灶底找出架生打針,high 到換了件婚紗式睡衣走去騎阿力。阿力靚仔又夠勁,搞到阿芬高潮迭起,但阿力摸到阿芬大腿上的針孔,問她吸毒時是甚麼感覺。阿芬說吸毒可以忘記所有煩惱,然後全身失控抽搐,噴壞阿力。

阿芬找回以前的證件去戒毒所領美沙酮,剛墥見老公(古天樂飾)。老公追問阿芬女兒下落,又用毒品引誘,跟阿芬返屋企在門口賴死唔走。阿芬趁老公打毒針昏昏沈沈時逃去找阿力到他家中暫避,但阿力因毒品之事唔想幫。阿芬先係拎個女來做盾牌,又話係因為老公是吸毒的,自己太愛佢所以自己都吸埋毒來證明毒癮是可以戒得甩...點知真係戒唔甩!結果阿力將阿芬五花大綁,幫她渡過毒癮。

阿力帶阿芬去飲美沙酮,見到戒毒所門外眾道友下場相當悽慘,心中不忍。昆哥見到大女食煙,大發雷霆。阿力打蛇隨棍上問昆哥為何人會吸毒,昆哥卻推說不知道也不想知道。昆哥用上乜 sir 的「劏房邏輯」:佢只係做生意,有供求就有買賣,又不是自己引誘人吸毒的,要吸毒就是那些癮君自己的選擇;並叫阿力不要相信那些道友扮慘,佢地癮起乜大話都講得出。這時昆哥收到通知,廚師的大弟子入院,阿力於是便自告奮勇幫手送貨。

阿力去到製毒工場,在次所用次紙留下標記,給同僚確認地址;但同時又被另一隊由海關隊長(廖啟智飾)率領,查辦盜版光碟的行動組留意到。海關趁阿力取了貨落樓將其捉住,發現「貨」唔係光碟而係海洛英。阿力報出自己係苗 sir 的臥底,但隊長貪功不理會,毒打阿力一頓要他帶海關到製毒工場「掃毒」。

阿力詐作幫手賺門,實質乘亂逃進工場內,鎖起大門,跟廚師等將白粉倒進次所。眾海關墥門不果,隊長撬開鎖頭,伸手入門內想開門,卻被有青徒弟仔用鐵鎚扑斷手;豬隊友開槍射門,子彈又反彈誤傷同僚。阿力帶着廚師攀牆逃走,有青徒弟仔則跌死。阿力跟苗 sir 會合,知道苗 sir 已跟海關打好底,不會揭穿阿力的身份,又將「鬼」的身份塞俾有青徒弟仔,來個死你對證。

昆哥D9廚師家中有鬼都不知道,阿力幫他講好說話,承認係自己被海關毒打才洩密。阿力乘機話昆哥用開「腳」去隔開各部門是有 bug 的,因為「腳」隨時會變鬼。阿力認為賣白粉已是夕陽行業,唔夠K仔玩,是故要將貨倉和工場集中,just in time 賺錢才夠快(警方也容易一網打盡),賺夠財務自由便退休。此番說話打動了昆哥、廚師、和寇哥,眾人都認為可以給阿力做莊。

阿力要陪昆哥一家人去泰國,於是便到戒毒所收買眾道友,要他們飲完美沙酮再吐出來,收集了一樽「二手美沙酮」給阿芬頂癮,阿芬誓神劈願話今次一定戒得甩。在泰國酒店晚餐時,餐廳經理以秤來計魚子醬的價錢,觸動昆哥以秤量白粉的本業,崩口人忌崩口碗,大發雷霆,失禮於人。昆哥姨仔鼓起勇起着起三點式跟阿力鴛鴦戲水,終於得償所願。當阿力幢泰國扑嘢的同時,在香港阿芬老公撬門找到了老婆和女兒。

昆哥蒙了阿力眼睛,帶他去到某軍閥大本營,審問阿力早前批貨沒有在我城出現,究竟去了哪種?阿力是不是鬼?阿力不慌不忙話批貨去了灣灣;昆哥打去跟相熟的灣灣拆家求證,發現阿力並無虛言,貨還可以賣得更高價錢,昆哥馬上同阿力 friend 返,大讚其叻仔。翌日昆哥帶阿力去睇鴉片種植場,介紹毒品經濟圈,又介紹阿力認識當地武裝部隊的頭領察猜將軍,指定阿力是繼承人。閒話家常,大家都覺得海洛英的市場愈縮愈細,農民轉重粟玉、茶葉、政府又掃毒,加上潮流唔興,供求都大減。昆哥教曉阿力做生意、洗黑錢等手法,阿力問昆哥為何相信他。昆哥就恥笑 popo 本來就唔敢亡命逃避追捕。昆哥告訴阿力下個月會到尾帝換腎(活摘器官?),可能唔再返來;昆哥又猜到阿力識咗個道姑,勸他不要同情她。

阿力回到我城,發現家中門鎖被撬壞,又見到阿芬跟老公在自己家中吸毒又睡在一起,盛怒下以錢打發了阿芬老公,再趕走阿芬兩母女。阿芬老公慫恿老婆接客,被街唱衰。阿芬見到阿力去救街邊一條受了傷的狗都唔幫自己,但阿力指出狗沒有選擇,但阿芬是可以選擇自己走的路。阿芬老公又來敲詐勒索,被阿力飽以老拳。阿芬老公以女兒書包作掩護做毒品買賣。阿芬打針打到血管硬化,老公在她手臂找不到血管,便將毒品打到阿芬頸上。阿芬打完針後,面容扭曲,有如見到貞子。晶晶去找阿力,話好肚餓,阿力給她煮食,見到晶晶以手食麵,思之悵然。阿力去到阿芬家中,只見老鼠在咬她的屍體,而她老公尾不知所終。

昆哥在離開傷巷前被捕。昆哥宣稱老婆乜都唔何,可以以令苗 sir 升職的供詞交換見老婆一命;苗 sir 讓二人見面,昆太即時咬耳仔話錢已收她,又點會無唔知情呢?阿力要求見昆哥一面,苗 sir 安排阿力在昆哥如次時見面;但此時昆哥已踢碎瓷磚瓦片,以碎片割頸自殺。昆哥質問阿力為何出賣他,做 popo 可賺不了那麼多錢;阿力義正辭嚴說販毒是害人生意,昆哥無言,只央求阿力不要張揚,讓自己失血而死,那麼老婆和女兒都不會上身。昆哥死後,姨仔哭着離開阿力,大女向阿力面上吐口水,細女則一巴星在阿力剛被吐完口水的面頰上。苗 sir 及阿頭大力嘉許阿力,可以讓他復職,但阿力因為扮毒販扮得太耐,連 popo 最基本的工作都唔識做,於是決定在毒販圈子中繼續混下去。

阿力以毒品哄阿芬老公簽紙承認阿力是晶晶的監護人,又俾錢引誘阿芬老公幫他運毒去李加坡。阿芬老公又講返同阿芬一樣的故事,話係因為愛才所以陪阿芬一起吸毒,以證明毒癮可以戒掉(點知真係戒唔甩)。阿力和阿芬老公甫坻達新加坡機場,便被警方拘捕,並搜出毒品。阿力在等條室中氣定神閒等當地警方幫他鬆綁,揚長而去,留下阿芬老公等被打靶。阿力回到阿芬舊居,終於明白人吸毒是因為空虛。昆哥死了,阿芬也死了,阿力也幫阿芬報了仇,忽然感到無限空虛,也想知道空虛恐怖還是毒品恐怖,竟然以身試毒。幸她晶晶忽然扎醒,在阿力打針前幫他拔掉針筒。

***

本片是一個很老套的臥底故事,劇本一路以來都札實,中段加入毒品經濟圈的介紹也不算太突兀,也能夠避重就輕將一些難以自圓其說的背景故事略過(例以只以對白交待阿力出道時如何潦倒,被人斬(其實都係警察扮的)來搏取昆哥信任),但去到末段結局,故事便開始有些不合常理和難以解釋。好在這些 bugs 只出現在完場階段,對全片整體影響不大,可以當成是「劇情需要」吧。

演員方面,古天樂飾演的道友,吸毒都咁大隻;張靜初飾演的阿芬又係靚媽,吸完毒藥性發作時反哂白眼有如見到貞子的高潮樣真係無得頂。乜吸毒都咁好身材仲有圓滑的大腿?實在叫人難以置信。

阿芬同佢老公都講同一個「愛的故事」話只是想證明毒癮是很容易戒掉,才陪愛人吸毒,究竟誰在說謊?抑或兩者都講大話,只係阿芬同佢老公之間一個「有共識」的藉口?魔術師諗為不排除兩人都是講大話,但如果有人講真話的話,則阿芬較為可信,起碼當初帶着女兒逃避老公的幾段情節唔會係做俾阿力睇。

到最後阿芬為何會死去?魔術師認為她是想自殺,並事先簽好了授權書希望阿力照顧個女,便蓄意叫老公將毒品打在頸上。畢竟阿芬知道太對唔住阿力,阿力俾咁多次機會自已都無去珍惜。

至於劉德華飾演的昆哥,其實係雙重性格:一來就同乜 sir 的劏房理論一樣,佢唔做毒犯(劏房)都有其他人做,不如自己做仲可以做返個「良心毒販(劏房業主)」只賣好貨(做好裝修)俾「有需要人士」;但二來在以上可以掩蓋所有壞事的萬能 key 之下,其實都知道自己係做緊壞事,否則唔會見到魚子醬用磅秤就崩口人忌崩口碗。奇妙的是老婆知道昆哥做乜勾當唔出奇,咁個發姣姨仔同兩個女又知唔知昆哥係毒犯(Tomboy 家姐可能知道,否則就唔會咁反叛,謂「食煙啫又唔係對草」來激老豆)。

以上係魔術師對劇情的「留白位」的解讀,但明顯 bugs 卻始終想不通:

昆哥家人已知阿力身份,為何阿力仲可以繼續做臥底?難道只係為了得到毒品騙阿芬老公上當?

阿芬老公知道阿力一向都唔鍾意人吸毒,點解對阿力忽然之間化身毒品拆家叫其「帶貨」會深信不移?

阿力最後點解自己會打毒針?完全唔記得咗晶晶?其實阿力還要撫養晶晶,空什麼虛呢?晶晶如果父母和養父都是癮君子,那不是太可憐麼?又,如果阿力繼續做臥底,晶晶又如何能夠正常地生活呢?難道騙完阿芬老公上當就唔做臥底?

最後,不得不讚故事裡面對 popo 的側寫:例如由苗 sir 到廖啟智的海關小隊長都係諗住爭功搏升職,苗 sir 仲成日去打波(高而富?)應該係同警隊高層 social,甚至也勸阿力學好英文等日後上位,最後仲勸阿力嘆吓 spa 輕鬆下。可見阿力係有理想的「忠誠勇毅」基層公墓園,升到上去某個點自然就識享受人生,做警察都係「打份工」,最緊要係財務自由早日退休,識飲識食享受人生也。

魔術師評分:80(基本)+10(張靜初)-5(爛尾)=85分(100分滿分)

***

伸延閱讀:

摩摩電影節之《無雙(Project Gutenberg)》:去到極致唔係講咁易

維基百科:新加坡死刑制度

8 則留言:

  1. //昆哥家人已知阿力身份,為何阿力仲可以繼續做臥底?

    ???

    回覆刪除
    回覆
    1. 我指昆哥死後,昆哥家人已知阿力身份,昆哥又係大莊家,無理由阿力件事無通天。

      刪除
    2. //記得(如果無記錯)摩摩作為「巷慘片之王」

      我應該都快退休了,19年暴動之後已少keep住loop電影台,隨著有綫結業相信呢個習慣更難回復。

      //昆哥(劉德華飾)

      這應該是劉華出道後唯一的全負面角色(如果連初出道演港台短劇飾演姑爺仔阿龍都算的話,就是第二個)

      //阿力報出自己係苗 sir 的臥底,但隊長貪功不理會,毒打阿力一頓要他帶海關到製毒工場「掃毒」

      這一段最大反差是個女關員:一開始最惡形惡相係佢,之後搞到甘大件事喊得最勁有係佢...

      //演員方面,古天樂飾演的道友,吸毒都咁大隻

      這的確是大問題,如果要古天樂著鬆身長袖衫會好好多...不過棚牙就係一絕,以前聽老豆講過道友棚牙都係黃黃黑黑的。

      //阿芬同佢老公都講同一個「愛的故事」話只是想證明毒癮是很容易戒掉,才陪愛人吸毒,究竟誰在說謊?

      魔兄你錯左重點了。重點是你無gap圖的一句對白:阿力話“我唔理你啲家事。”意思係,無外人睇過兩人相處的全部信息,兩個當事人就算無隱瞞,記憶都可以被自己扭曲,探討真相又有什麽意義呢。呢句對白,即是話“I don't give a damn”。

      //昆哥家人已知阿力身份,為何阿力仲可以繼續做臥底?難道只係為了得到毒品騙阿芬老公上當?

      這也的確是問題,唯一解釋是故事無交待阿力之後是以何種身份混入毒品工作圈。

      我反而覺得立甘大功,膊頭得三劃?職級起碼都挂名一粒(因爲佢連 popo 最基本的工作都唔識做),薪水以兩粒一板或三粒計point啦

      //阿芬老公知道阿力一向都唔鍾意人吸毒,點解對阿力忽然之間化身毒品拆家叫其「帶貨」會深信不移?

      道友標童時係六親不認,只認有無錢/貨上電的。

      //苗 sir 仲成日去打波(高而富?)應該係同警隊高層 social,甚至也勸阿力學好英文等日後上位,最後仲勸阿力嘆吓 spa 輕鬆下。可見阿力係有理想的「忠誠勇毅」基層公墓園,升到上去某個點自然就識享受人生,做警察都係「打份工」

      苗Sir個袋係兩個類似網球拍或羽毛球拍的東西,打波只是很正常的工餘康樂活動戲中亦沒有潛臺詞話同邊個打波;spa也只是正常的享樂(況且戲中是指以公費俾晒錢,相信也不會如蔡Sir光顧的場所提供"happy ending”)...工作有追求有理想也不需要工餘生活似苦行憎完全無social life的,孫中山流亡日本時都不忘溝小蘿莉。

      刪除
    3. //隨著有綫結業相信呢個習慣更難回復

      電影台已被 Netflix、Disney+ 取代了。

      //劉華出道後唯一的全負面角色

      (又)無間道呢?

      //之後搞到甘大件事喊得最勁有係佢...

      佢係喊塊面被流彈反彈所傷,毁容了。

      //意思係,無外人睇過兩人相處的全部信息,兩個當事人就算無隱瞞,記憶都可以被自己扭曲,探討真相又有什麽意義呢。

      噢...我的解讀係阿力初頭都信阿芬那「愛的故事」,所以都仲幫佢戒毒,但阿芬次次都呃鬼佢令阿力心死;到老公又講返同一個故事,阿力的反應「我唔理你啲家事」係「又係呢個藉口,你地自己講飽佢。我廢事理。」

      //職級起碼都挂名一粒

      阿力件軍裝都幾 odd,仲係行咇仔一名咁。

      //工作有追求有理想也不需要工餘生活似苦行憎完全無social life的,孫中山流亡日本時都不忘溝小蘿莉。

      我被「whiter than white」洗腦鳥。

      刪除
    4. 仲算係「港慘片之王」的提提你:有《無間道3》替劉建明的終極人格兜底

      刪除
    5. oops,我淨係睇咗第一集。

      刪除
  2. 依套戲都有好多經典場口嘅.... 魚子醬,市場供求論,爆門揼手,都好深印像!

    回覆刪除