留返拜山先至講

 

時近重陽，相約舅父舅母們去拜祭外公外婆，魔術師的父母等。魔術師明知舅父舅母們住在市區，入屯門拜祭，「咪咪魔魔」搞一輪例遲，也不用這麼早出門。之但係，香港交通基建一日千里，唔搭慣西鐵呀，大欖隧道直通巴士呀之類，真係會好有「逆大鄉里出城」feel；而且老一輩唔慣用智能手機，唔知道whatsapp、網上地圖、公共交通工通ap呀東東等係幾咁有用，結果係眾市區人搞好耐都未上到車，又要打十幾廿通電話來來回回報位置，問點轉車等...

＊＊＊

魔術師同時想到，公司有個老嬋一族成鬼日咁鍾意scan嘢，連部門內出品的文件，明明有原稿可以在內聯網下載，都係要scan來傳俾其他同事，覺得咁樣就好「高科技」，見之真係無言。

＊＊＊

又，只要上到車（係真車，唔係樓盤），無論係搭西鐵抑或係巴士，從市區入屯門其實都幾快；屯門予人「偏遠」的印象，就是preception is reality的寫照。

 

＊＊＊

魔術師買好祭祀用品，上得的士，跟司機說：「青松仙苑吖唔該！」

誰知司機卻問：「係咪青松觀嗰度？」

魔術師嚇了一跳，心想要不是早約好了先去仙苑拜祭父母，再去青松觀拜外公外婆，都還可以「遷就」一下呢位唔識路的司機，不過現在卻不能相讓，只好說：「可以話係喇！」

司機：「你可唔可以帶一帶？」

魔術師心中暗罵有無搞錯，揸區內車都可以咁唔熟路；望真啲，只見車頭擺了數個電話，似是「接call類司機」，看來不像是初入行唔熟路，而係車慣熟客，揸開「專線」所以唔知「訂」...

抑或香港經濟真係咁差，搞到低學歷中年男子都要靠揸的士，不停收call維生呢？

＊＊＊

星期六下午，又唔係重陽正日，仙苑都唔算多人。出乎意料之外，只見頗多後生仔女，更有些係滿口英文的「華裔非中國人」青少年，看來拜山的另一功能就係給愈來愈愈「獨立」的宅男宅女一個機會跟親友們聚一聚吧？

＊＊＊

就算唔教「國民教育」，中國文化習俗得卻是一定要識。只見好些「孝子賢孫」堆在香燭檔前問衣包的上下款要怎樣寫，香燭檔的負責人卻乜斜着眼，遙指檔前門口的「template」，曰：「你跟住嗰度抄就得架喇！」

魔術師想，出返個app叫「拜山祭祀for dummies」可能都會有賺頭！

＊＊＊

魔術師本來想打探一下博士表弟買樓會唔會有困難，抑或係要父母「接濟」，但兩個表弟沒有跟來，沒辦法了。

看來拜山的人只限直屬一代，再隔一代只經「唔係好關事」。可以見得，數十年後，外父外婆在觀內的牌位將無人理會，咁青松觀又會點處理呢類dormant的牌位呢？

＊＊＊

極目望去，仙苑的龕位已被訂得七七八八，放骨灰的呎許空間以萬元計，果然係大生意。

又，點解骨灰龕場是「不受歡迎設施」呢？好似魔術師咁，去拜祭先人話都無咁易，幾好吖！好似外父外婆咁，葬在大鵬灣，要拜祭不是易事；為方便祭祀，當年舅父舅母只好又俾一筆錢在青松觀安個牌位，現時呎價慢吓手三萬有多，真係未免有點捉蟲。

＊＊＊

魔術師趕去拜祭期間，無意中發現了水電鋪的新地址，見水電貓還是一樣生猛，可喜可賀！只是匆忙間未有跟牠拍照便了。

2012/10/20　19:12:38