前同事Ａ傳來小故事，謂有憤青又在怨樓價高，但所持的理由卻又是超爆笑的。魔術師八八掛掛，走去睇下，果然係大開眼界，難為Ａ苦口婆心的在勸說呢。引文評論本是魔術師一向習慣，但鑑於Ａ唔想張揚，咁就唯有閱讀理解之後再撮寫喇！
不過呢，呢位盛女憤青（及其朋友）的文字實在不太易明，其中又夾雜了好多打機及動漫術語，魔術師的理解是對是錯，實在也說不上來。
原因就係佢地自稱有「精神潔癖」，佢地覺得呢個遊戲規則係唔啱嘅，所以佢地明知有「攻略」佢地都唔會依從去過關。
（魔：自問自己的「精神潔癖」都頗嚴重，跟A吹水時常自嘲「擔X唔偷食」的說，但郤依然唔能夠暸解「遊戲規則」點樣「唔啱」法。）
憤青和朋友們的解釋就係「遊戲規則」令「壞人」可以當道。
（魔：正義必勝（憤青們當然就是正義朋友）？誰說的？究竟係打得「勇者鬥惡龍」的遊戲太多？抑或係在「王子與公主快樂地生活下去」的童話故事裡長大？）
又，什麼才是「壞人」呢？
不用細想，當然就係有錢人、大商家、地產霸等，總之就係「有議價能力的人」。
正義朋友是不會依從「有議價能力的人」所訂下的規則，不屑從「無議價能力」變成有「無議價能力」。他們稱這種認知為「覺醒」（又一動漫電玩用語）。
「有議價能力的人」「欺負」「無議價能力的人」，是為「不義」。
怎樣才叫「欺負」呢？
就係控制了生活必需品（例如住宅（即使係細呎樓），例如奶粉）的供應面。
那麼誰才應當對生活必需品的供應面掌有「話語權」呢？
憤青和朋友們覺得應該係由「用家」話事。
（魔：沙士時經濟唔好，就係用家市場；依家資金氾濫，所以就係賣方市場。）
沒有壓制地產霸權，任由佢地開價（魔：但係地產商都只係賣一手樓，二手成交卻佔大多數，而二手交投的賺蝕，都是去了小業主的錢包，跟發展商毫無關係。），任由炒家投資者炒高樓價，連帶租金也相繼暴升，呢啲都係政府嘅錯，政府有責任撥亂反正，例如將樓價與租金脫勾，樓價升租金卻不可以升。
（魔：非常難以想像。憤青係想政府設定最高每呎價價或最高每呎甜金嗎？這豈非是計劃經濟？社會主義？）
憤青又話，為咗買樓，好多人節衣縮食，甚至乎放棄搵唔到錢的理想工作，而去為五斗米折腰，從事一些自己無興趣但收入較佳的行業，咁樣對整個社會的「大局」係唔健康嘅，對個人和社會都是雙輸。呢啲都係唔應該發生的事（魔：邊個話嘅？），做成咁嘅環境，當然又係政府和地產霸權嘅錯。
（魔：聽落似頗乎有道理，不過魔術師覺政府和地產商只係問題的表象，其實深層次的原因就係人性。人性自私，人人都會想將自己的利益擴大，宏觀社會是否受惠，不會有人理會。希望人人犧牲小我完成大我達至Nash Equilibrium，實在太過理想，更似係「讀壞書」。）
如果覺得遊戲規則（魔：其實係由自私的人性衍生出來）唔妥，唔玩又得唔得？
答案係：「唔得」，唔可以只要有屋住，就住得幾差都唔緊要，因為差既環境對下一代的成長好有影響！
（魔：所以就算政府多起公屋都無用，因為公共屋村環境普遍較「差」，憤青又點會應承？怪唔得咁多人反對大東北喇！）
（魔：公屋起在大東北又嫌遠，起在中環又嫌銅臭，起在銅鑼灣又多自由行，咁點算？）
結果又係loop返回頭，唔係租就係買私樓，咪又要跟返個遊戲規則玩！
最後答案出來了，就係自己「收入低」（或家庭負擔重），又唔敢講出來，怕遭人笑話，結果就給人「８０後買唔起樓只係花費大，理財不善」的錯覺。
咁可以做９成按家馬！儲３０－４０萬就可以買到層２００－３００萬嘅樓，一人「家庭」就話啫，如果兩個人要結婚一齊儲，亦該唔係難事。
答曰：唔肯做，怕９成按槓桿太大，自金融海嘯後大銀行都要「去槓桿化」，聽見「槓桿」兩個字就怕怕。
（魔：呢啲憤青就係衰在讀多人兩個錢書，識得拋兩下書包，但又知一唔知二，被書本上的理論和報上網上的傳媒「洗腦」。買樓按揭唔同期指、股票孖展，就算係負資產銀行多數都唔做小業主即時補倉，否則小業主一旦申請破產，銀行得返個銀主盤來拍賣，既手尾長，又實收唔返全數咁濟，所以只要小業主有能力供，都會「網開一面」。）
（魔：由比路進，先天下之憂而憂，像雷鋒同志般「我為人人」，只由大局著眼的憤青們自比為「覺醒」派是可以理解的，作為「先知」的憤青，對社會滿是「低劣人種」感到不是味兒，毫不奇怪。正念一點想，憤青們只要明白，「人多，殭屍就係怪物；殭屍多，人就係怪物」；獨孤求敗的強者路，也是寂寞的路途，你能打遍天下無敵手的話，就是真工夫真本領。）
（魔：又當然，如果憤青們那些由大局著眼的道理其實只是推搪的藉口，只會說不會做，只是將個人的問題當成是社會的問題，那就只會是個笑話了。）
（魔：又抑或，佢地只係理想派的真心膠，追求的只是一個虛幻的烏托邦呢？）
2012/10/06 00:19:37
算擺啦!憤青們縱使給他們每人配一間便宜屋，恐怕仍會買不起的。
回覆刪除不懂自省，只懂抱怨!
繼續下去，將來只會變為憤老。
中六合彩都要肯俾五蚊，唔肯付出冇得怨啦。
回覆刪除呢啲膠人越來越多，後生仔真係要帶眼識人，唔覺意膠埋真係恨錯難返。
憤青們深層次的思維是:
回覆刪除我付出了努力,就要得回心中相想的回報;沒有所想的回報,那就是「遊戲規則」不合理,政府和資本家要負責.
但,他們的「努力」,又是否足夠獲得「所想的回報」呢?照理是,即是有努力過,充其量也只能獲得「相應的回報」吧了.「相應」和「所想」之間會有相當的落差,明顯不過罷.
如果要佢地「加倍努力」,佢地又會覺得太多的犧牲是不合理了,於是又搬書本上的理論出來講一餐,也不知這是否叫「讀死書」了.
善意的猜想是,他們是受得太多「善有善報」的教育洗腦了.
佢地自覺係付出了,但得不到「期望」的回報;而降低期望和加倍努力又是不合理的事,所以要打倒「遊戲規則」,呢種認知叫做「覺醒」.
回覆刪除佢地唔會發覺,佢地的思想盲點在於:付出的努力和回報是否合理,係唔到佢地自行定義,「遊戲」係一大群人去「玩」的,亦係由呢一大群人約定俗成地去肯定呢個「遊戲規則」的正當性;結果人地肯比你付出更多的努力,就是勝利者.咁條件不足的人咪唔使再玩,聽落好似好屈機,但卻是事實,魔術師打「拳皇」時亦是一樣:
http://magician__yang.mysinablog.com/index.php?op=ViewArticle&articleId=2125645
而更大的問題係:呢班人有理論層面包裝,雖然只係皮毛,但係絕對可以呃到入世未深,只曾書本上打滾的年青人.尤其是現今普及教育的制度下,要那些「大學生」承認自己是「遊戲規則」之下的失敗者,叫他們的面子往哪裡擱?
咁合理回報既高低又點定既哩???
回覆刪除班友玩到一個地方既某部份既人生不如死又係唔係真係岩哩???
其實我係好支持德國果一套...不過香港太多既得利益者...阿梁生可能都係等緊呢一獲爆左,先再處理樓市既問題(不過都岩既,費時俾人話佢推跌個樓市)
見仁見智，無分對錯，倒是聽人說過有膽就革命，無膽就認命。
回覆刪除//咁合理回報既高低又點定既哩???
回覆刪除佢地認為自己已經「盡咗力」,就應該有「居住權」(但係唔係求其有得住果隻)囉!
就假設佢真係好慳家,無亂使錢,但係佢搵唔到足夠首期就係搵唔到,呢個事實只係證明咗佢「無能」,就係因為依家社會太鍾意玩語言偽術,將人稱為「失敗者」係一個禁忌,所以「失敗者」亦唔能夠接受自己係一個「失敗者」(現實係社會上總有墊底的一群人).
//有膽就革命，無膽就認命
回覆刪除啱,但係香港人點敢搞革命,最叻就搞搞震,舉下英國旗,包圍下政府咁.
人家真有說自己要攪革命／改變世界之類的，這刻我只能理解為真心膠，我解讀錯咗……任何佢地拋出來說點樣買唔起，個假定結果／得著就是有人回應：是哦，真的好瘋哦。
回覆刪除當有人苦口婆心出來講：唔係呀，讀書少過你地搵得少過你地都做得到呀。 然後就會給說成這樣叫人做奴隸很缺德... -_- 咁，提了N種方案都係話唔得的話，做乜要我樣樣都肯做的人交了稅幫你埋單先？ 咁就對就社會好好囉...
QUOTE
回覆刪除不敗的魔術師 :
//,呢個事實只係證明咗佢「無能」,...UNQUOTE
你是故意令人聯想到當年龍門陣施永青的言論嗎，哈哈！
唉，班友都唔知想點！
回覆刪除計我話，如果樓價繼續高企，上樓無望嘅話，揾個份工，扑自己份糧去到可以申請公屋，再由公屋慢慢升哩上居屋仲化算。
當然喇，如果月入幾皮嘢梗係冇得咁諗！
佢呻係想得到認同感, 邊估到有個只係大佢幾年但係有三個仔兼供完樓再兼可以提早退休的師奶教訓佢吖!
回覆刪除掹衫尾講, 我係同施老闆英雄所見略同啫! ^^
回覆刪除佢地呢啲單人家族的世忠派,輪公屋要等到38歲,佢地點會有耐心等?
回覆刪除究竟我們現在是在地球還是在火星？
回覆刪除如此憤青
非常吃驚
蝦餃老矣
怎看莫明
或者找回日前那些憤青罵蝦餃，在此助慶：
我為憤老，
汝為嫩青？
人之為人，
因為激情！
香港問題，
醉生夢死，
不學無術，
只懂扮醒！
真的想改變社會投資在這些廢青身上，到頭來只會一肚氣！記得當年恩格思是搵夠才搞革命理論研究。
回覆刪除見到今日擱置國教指引的新聞，再見陳昔姿依然話要提防染紅資料於其他科目例如中文及普通話科出現，我就真係忍唔住笑，睇嚟第日中文科都要被撤。
回覆刪除我諗第日要移民避咗呢班人.
回覆刪除QUOTE
回覆刪除不敗的魔術師 :
見到今日擱置國教指引的新聞，再見陳昔姿依然話要提防染紅資料於其他科目例如中文及普通話科出現，我就真係忍唔住笑，睇嚟第日中文科都要被撤。
UNQUOTE
是苦笑，慘笑還是悲哀的笑？