逆工管思維（十二）之職場騙案

魔術師自問ＥＱ已經「高咗好多」，幫廠仔執手尾執咗成個禮拜，係今日先忍唔住同廠仔爆一鑊。當然就係俾廠仔惡人先告狀，話魔術師態度唔好喇！

是咁的：事緣美顏上司叫第三世界廠女S電郵一份文件俾佢，廠女Ｓ剛巧放假，便叫「聯絡人（coordinator）」廠仔R處理：「Ｒ，請幫忙。」

而廠仔Ｒ竟然就左手交右手寫封電郵俾魔術師：「魔術師，請處理。」

 

本來救火已經救到哂煙，一眼見到真係火都嚟埋，於是回郵：「你地可唔可以唔好將個問題環繞地球一周之後毫無增值（without any value added）咁俾返香港處理呢？美顏上司就係知廠女Ｓ係原作者先問佢啊！」

不是嗎？如果魔術師有呢份文件的話，美顏早就問咗魔術師喇，使鬼問你咩？

第三世界的廠仔就係咁無常識，想也不想就像電話接線咁，按「１」字就搵魔術師。

「聯絡人」呢個職位，應該係「廢人」的同義詞。

更爆的是，「聯絡人」廠仔Ｒ同廠長Ｓ都話魔術師態度惡劣，要留意用字，好歹廠女Ｓ都係一個副經理咁話，仲提供咗一個唔合乎公司保安制度的方法俾魔術師：「你可以咁樣做架嘛！」

當然仲要「施屍」埋俾美顏同頭領Ｎ。

同人嘈喇喎，咁美顏梗係話魔術師唔啱喇。

個問題就係，太著重和諧，係會將問題掩蓋的。廠仔爆鑊爆到總部哇哇叫，要總部女頭領N同香港男頭領N決定唔再俾班廠仔做，仲特意指派魔術師去幫班廠仔補鑊，竟然換來一句「你小心講嘢」、「態度惡劣」、同「要尊重佢地」之評。

咁邊個尊重魔術師呢？

魔術師本來唔多服氣，之但係忽３靈光一閃，於是話好喇，同佢地道個歉喇！

咁做好似好聽美顏話咁，識得認下低威，但其實其設個局，睇下美顏識唔識做。

即係好似《恐懼鬥室》中的陷阱一樣，用來測試一下「獵物」的反應。

數小時後，美顏看來無乜反應。

魔術師亦心知肚明，火起上來，電聯美顏，講返頭先件事，最後話：「佢地咁叻咁重要咁要呵護，無腦做錯嘢搞到一鑊粥就大哂，我話下佢地就錯哂，咁你炒我囉！」

自稱「呢個部門大把人叻過魔術師」的美顏「竟然」無言可對，爆鑊要幫手的時候，啲「叻人」唔知去哂邊。

另一個問題來自魔術師自轉組以來從未「正名」，個職銜依然係跟緊妹頭時的樣子，所謂名不正言不順，出師無名，班廠仔唔知魔術師乜頭乜路，梗係俾班廠仔恰。

於是魔術師趁呢個機會逼美顏寫返封信，講明魔術師的職級，其實係高過嗰個所謂「副經理」的廠女Ｓ好多，而且做嘅嘢係由兩位頭領特地指派的，「唔好當魔術師流嘅」。

由美顏的反應，唔多唔少都更確認了跟前同事Ａ的共識：１. 呢個部門係當我地班轉組嚟嘅人只係僱傭兵，做完呢個大茶飯project，用完就會掉，唔會同你諗長遠，所以連職位都費事同你搞；２. 廠仔無論幾鑊都好，始終都係「自己人」，魔術師呢類臨時指派的「專員」，當然唔會同班廠仔講仔細喇！

所以呢，都係早走早著！

當然前同事Ａ就更加早著先鞭，提早退休回家享（湊）仔福囉！

2012/11/15　01:09:11