魔術師生活基金（２０１８年４月預告）

臨近三月尾，魔術師已開始準備每年的投資組合年檢：３月尾埋單，４月第一個交易日就做哂所有交易佢。基本上呢個星期魔術師已經計好哂數，調動好資金，心中早有定奪沽出同買入邊啲股份，只係差在買賣數量；未知的只是在微調各組合持股比重時會買賣哪那些 buffer 股份時的走位，就真係要等到３月尾連美帝都休埋市先計到了。
可以預早宣佈的是，魔術師生活基金將於４月３日買入少量（比重為低）的日清食品（01475.HK）：出前一丁對魔術師來說，的確是不可或缺的食品。又，想煮一丁煮得好並唔係咁易，魔術師傾向先煲好兩份水，水滾後將一份水倒進鍋內煮麵，另外一半水就慢火保持溫度。快速以筷子搞散麵餅，煮走麵面的膠質；最多煮兩分鐘後便隔水過冷河，然後放在湯碗中加入剛才備用的沸水，最後才落味粉及麻油。全程最緊要快唔好俾啲麵攤凍，所以水要煲定先（無圖無真相）...
＊＊＊
言歸正傳，除了出前一丁之外，魔術師生活基金稍後仲會有新成員加入，就係英記茶莊（08421.HK)：

英記歷史咁悠久都只係上「創業版」，應該係盈利唔夠上主版，而集資額亦只係２千多萬，半間分層豪宅（唔係屋仔）都買唔到：

老字號又照計唔會為咗賣殼，「創業版」三隻字對 brand name 增值亦唔大，唔通上嚟真係為咗方便融資？為安全起見，都係只會買入極少量先試水溫，意思意思一下，以表支持（即係好似有線（01097.HK）一樣），畢竟魔術師主要買的都是普洱、巖茶（大紅袍）及香茶（白龍珠香片）（見《四季茗茶精選》內文及伸延閱讀中的舊 blog 連結），要增持回正常分量都係日後看表現再說。

魔術師都係第一次買創業版ＩＰＯ，估唔到由截止認購到退款、上市，要搞成兩個星期：

（以上截圖均來自 香港交易所 > 披露易 > 英記茶莊集團（０８２４１） > 上市文件 - 股份發售 (5517KB, PDF)）
魔術師係水命人，茶葉屬木，水生木之下，睇怕魔術師呢次投資都係「供養」英記多一啲，所以筆直先預到極低，即＄１５,０００以下，買５手（２５,０００股）：

（圖片來源：香港交易所 > 披露易 > 英記茶莊集團（０８２４１） > 上市文件 - 黃色申請表格）

果然，日前登入一窿，孖展額竟然未用滿，加上最近市況波動，認購氣氛睇嚟一般：

（圖片來源：一通網２０１８年３月２６日中午截圖）

直至截止認購前一晚，孖展額先「爆滿」（抑或係一窿臨截飛前自家截咗孖展？）：

（圖片來源：一通網２０１８年３月２８日凌晨截圖）

其實如果魔術師對創業版信心大啲，理論上買９手都只係區區＄２５,０００內，取其木生九紫火，而魔術師就水剋火，「我剋者為財」，咁就好意頭啲；不過時值魔術師資產配置年結，現金流慳得一萬就一萬喇！

（圖片來源：一通網２０１８年３月２８日凌晨截圖）

＊＊＊
伸延閱讀：
四季茗茶精選