窮住三房屋

依家啲樓盤名除咗學呆灣文青腔的「乜乜・七七」之外，就係賴型格扮中剷咁得個英文名無中文名，明顯係歧視學歷不高唔識英文的低端人口（３７：４５—４７：１０）：

樓盤傳真 2018/03/10 2018/03/10 23:32

今年收票王、康城站 Malibu ，有數百組大手投資者，以開盤價計算，租務回報率持平，但加價後，就有機會淪為全區回報最低屋苑。另外，定息按揭使用比率大升，今集以 Malibu 為例，計算慳息效果。
統計北角區 500 萬或以下，最近二手樓註冊成交比率，首次跌穿 40% ，是有紀錄以來新低，成交量只得 1700 數宗。而且單位選擇只有不足 300 呎的舊樓、或是 160 呎納米新盤，選擇離不開一個細字。
信和西貢逸瓏園入伙，屋苑內園一片綠化，但外圍地皮陸續有新發展，沿西貢公路出市區，附近工業區也轉型住宅發展，增加區內交通負荷。
一家三口搬入將軍澳南新盤 CAPRI ，想保留三房間隔，但又覺得廳太窄、客房太細，設計要在最少改動中加強空間感。

本案除咗景觀開揚之外，查實真係唔覺有乜賣點。最濕濟的是明明無咁大個頭，但就偏要戴咁大頂帽：得嗰７０８呎（實用面積）又要間三間房扮大單位，死充得嚟仲要防礙港孩發育，為乜呢？

原則廚房門係掩門，浪費了門後空間，唔能夠擺家電（左上），現在設計師將掩門改成趟門（右上、左下），門後便可以用來擺雪櫃。趟門係百葉設計，可以偷偷看偷偷望到女戶主今晚煮乜餸（全屋無姐姐房無客房，睇嚟唔會預咗有工人姐姐同埋四大長老免費湊孫）：

設計師在大門旁、飯廳貼牆位置造了企身大櫃（左上），為減少笨重感覺，留返啲位放擺設（右上、左下）。餐椅形狀奇怪，就像是一個感嘆號（右下），可能係為了反映戶主一家被地產霸欺壓之感想：

設計師又將客廳跟書房連接牆打通上半部，變成玻璃牆，話可以增加通透感（左上、右上）。電視櫃之上放滿 figure，帶點 kidult 感覺。露台景觀頗為開揚，算是最佳賣點（左下）；設計師當然不欲浪費良辰美景，便在落地玻璃門前放上椅子和吊燈（個燈架咁鬼尖，好易拮親），成為「閱讀區」：

書房門後造櫃，疏疏落落的放 figure 多過放書（左上、右上）。既然「閱讀區」搬了出廳，咁書房就變身成港孩遊樂區：半邊玻璃牆可以俾怪獸嘉獎睇見港孩有無匿理打ＪＪ；港孩大咗就可以搬入書檯電腦檯回復書房用途，半邊玻璃牆又可以俾港婦監視老公有無睇ＡＶ（左中、右中）。港孩房一入門就見到兩間屋仔衣櫃，遮住半邊窗，港孩大咗衫多咗第日都唔知點換衣櫃（左下）。床係碌架床設計，床底下又係遊樂區，不過唔可以跳否則會撼親頭。設計師仲話將來港孩大咗，可以將上格床升高，床下可以用來做書檯；但係咁樣即係睡眠區就更接近天花板，萬一要就住嚟坐起身，就會防礙發育：

最後主人房反而無乜特別，三邊落床設計乎合風水原則，但設計師就話方便上班不定時的戶主夫婦（但又唔使請姐姐，莫非夫婦起碼有一人係在家工作？）各自下床不用嘈醒枕邊人（其實講唔通，除非兩人訓得好開）。床頭燈沿用跟客廳同一系列的尖角燈飾，不過近窗的床頭燈就低過燈槽（右上），近放滿 figure 的梳妝枱的床頭燈就高過燈槽（左下），造成光線不均；其實如果要睡前睇下書，開燈槽光管照明效果更佳。睡房另一邊造衣櫃，以免唔去旅行會死，另有空間放拖喼（右下）：

其實魔術師覺得以三房單位來說，起碼都要有８００呎先算是不過不失，７５０呎已經開始有少少勉強，再低啲呎數就真係有啲夾硬嚟的感覺。以本案７００呎來說，如果原則可以設計為兩房間隔就最能提供充足空間，又唔會太過逼狹了，更加唔需要設計師無無謂講地拆牆製造建築廢料了。