2018年7月6日 星期五

中環價值跑老鼠

就在日前在網上查找資料寫 blog 的時候,魔術師碰巧路過這個一年一度的 event:

查實呢單嘢魔術師想寫好耐,但成日都無咗回事,今次既然墥口墥面見到,無理由唔寫返少少嘢贈吓慶嘅!
所謂「鼠戰」,來自英語 Rat Race;根據 Cambridge Dictionary 網上版

換言之,「鼠戰」就是坊間打工仔時常用來「呻」的職場心態:跑老鼠圈;而「跑老鼠圈」這種工資奴想法,可謂跟近年由「富爸爸」帶起,人人講到興烚烚、趨之若鶩的「財務自由」心態大相庭逕。既然人人都想「財務自由」,咁「跑老鼠圈」仲有乜值得一眾工資奴 proud of 呢 ?仲要搞大型活動以宣揚呢種奴隸精神?

睇返啲賽道名稱:突圍而出(Cheese run)、能屈能伸(Through the wringer)、眼明手快(Crack the code)、補闕掛漏(Patch it up)、行之有道(Pick your path)、步步為營(Keep your composure)、捷足先登(Climb to the top)、與及旗開得勝(Take charge),魔術師就覺得非常心寒。由「突圍而出」開始講職場新鮮人經過重重面試,到俾上司屈(能屈能伸),學懂找到遊戲規則(crack the code)等等,再慢慢成熟到學會控制情緒(Keep your composure),然後成為高級工資奴行政人員...
係咪活活脫脫的一副為公司死為公司忙,但公司的成功卻完全可以唔關你事(但失敗就一定關你事),公司喜歡就跟你分手的窮忙族人生呢?
而且,成功非必然,CEO就得一個,就算你真係可以平步青雲,都係一將功成萬骨枯呀!
這樣「忙得只剩下公司」的價值觀,就是「中環價值」的核心價值嗎?
再睇返份新聞稿
「鼠戰中環」為香港年度慈善盛事之一,是一項以職場生涯為主題的接力賽。
活動將為參賽者帶來緊凑的賽事和非凡的成就感。賽事宣揚平衡工作與生活的重要性,同時講求健康的體能、敏捷的思維以及無間的團隊合作精神。
我們期望能在急促的城市步伐中,推廣工作與生活的平衡,並凸顯團隊合作的關鍵,同時提醒大家不容忽視良好的精神健康和身體狀況的重要性。
又 work life balance...講就天下無敵,但上司(在職場中俗稱為「老細」,但很多時(尤其是在大機構中)「老細」頂多只是「高級職員」;如果公司是上市的話,股東才是「老細」,而更高一級的就是「債主」)講的都是要求手下員工日做夜做無停手:你可以 enjoy life,但卻要完成手頭上的工作先,未做完無得走...
唔怪得篇新聞稿用個「凸」字喇(笑)!
講開又講,包青天上司幾個星期前叫魔術師星期六返公司加班時,佢忽然咳到唔停,然後一口氣不過來,雙眼一反便跌倒在地,似是短暫昏倒了數秒鐘,嚇壞了一眾同事...
到得眾人扶起包青天上司坐好,待佢定下神來,魔術師便來給眾人「訓話」:「呢間公司,係唔值得你用健康來交換份工架!我地要做到的是財務自由...」
魔術師無講出來的是:無錯,就好似《逆工管思維(二十)之米豬看地球》咁,以財務自由的心態去工作(即係「賺錢買花戴」),遇到有人欺負自己時唔止可以將事情講俾信得過嘅人知,仲可以發聲抗爭,夠膽 Say No,根本不用跟人「鼠戰」。
如果你係「賺錢買花戴」,你可以將工作視為對自己的挑戰,工作做得好就有成功感;但根據「鼠戰」中的職場活動,其實更多時是玩辦公室政治,見高拜見低踩。如果將「成功陷害別人」視為人生成就,那就未免有點兒心理變態了。
言歸正傳,返去篇新聞稿
今年七月,兒童還有機會參加 STEAM 教育工作坊
魔術師初頭仲以為官方稿件寫錯字,將 STEM 寫成 STEAM;但維基大神卻話俾魔術師聽 STEAM 係將 Art 加入 STEM 之內:
STEAM fields are science, technology, engineering, art,[1] and mathematics, or applied mathematics.[2] STEAM is designed to integrate STEM subjects into various relevant education disciplines. These programs aim to teach students to think critically and use engineering or technology in imaginative designs or creative approaches to real-world problems while building on students' mathematics and science base.[3] STEAM programs add art to STEM curriculum by drawing on design principles and encouraging creative solutions.[3][4][5][6]
明明 STEM 係全理科,又加隻 Art 落去,咪即係「通識」囉?
最令人搖頭嘆息的是:
參加「鼠王爭霸戰」的每位高級行政人員會穿越較短賽道,捐款最少二萬港元,名額有限,報名從速。五至十歲的兒童可參加「未來鼠王戰」,每位參賽者須籌集最少二千港元。
「高級行政人員會穿越較短賽道」係咪即係話呢班工資奴身處高位,犧牲的是自己的健康,所以才要玩較短的賽道呢?至於兒童組的「未來鼠王戰」...唉,使唔使咁都要「贏在起跑線」,自細就要灌輸做做工資奴的意識呀?唔通真係奴隸獸要從娃娃抓起?
***
圖片來源:
本文所有有關「鼠戰中環」活動之圖片來來自「鼠戰中環」官方網站,並在2018年7月4日至5日之間截取。
***
伸延閱讀:
鼠戰中環新聞犒:置地公司呈獻「鼠戰中環 2018」(2018年6月12日)
Wikipedia: STEAM fields
逆工管思維(二十)之米豬看地球

12 則留言:

  1. //雙眼一反便跌倒在地,似是短暫昏倒了數秒鐘
    哇!使唔使搵命博!

    //「跑老鼠圈」這種工資奴想法
    香港職場真係有啲病態,上份工辭職過程已經見識到好多嘢。

    同事知道我祼辭個個都碌大隻眼,
    上網睇啲content farm HR廢文講到啲人要請假見工,祼辭要幾大勇氣,真係得啖笑。
    Last一個月「出到去做得啲咩丫」「90後做嘢不顧後果」之類說話不絕於耳
    我儲咗筆錢夠自己坐食山崩包埋俾家用一年,驚都未L驚過。
    用啲時間慢慢搵份好啲,啱自己嘅,萬全準備咁見工唔好?

    「老細」想留人,逼人就範嘅關懷嘴臉又係一絕「你仲後生blablabla,上到XXX Title先再諗走唔走啦」
    當時即刻諗到有個前輩acting咗十世都未坐正,個假希望萬能key實有好多variation
    「你層樓仲未供完㗎⋯⋯」「你唔係年尾結婚咩⋯⋯」「你個仔升小學囉喎⋯⋯」
    咪以為人地係��仔就可以當人傻仔先得㗎。

    見新工個面試官要我解釋一個月「空窗期」,語氣暗示我不務業咁,
    佢地班人真心expect你一投入勞動市場就要訓身做工資奴做到至死方休。
    我叉充電,精精神神咁投入新崗位咪對公司仲好。

    //以財務自由的心態去工作
    上篇魔術師資產配置難得引咗好多盲毛入嚟
    收入,資金,背景,性格,目標,風險胃納,都好影響個人投資部署㗎嘛
    扮到禮貌周周咁問問問,乜都想假手於人,自己落場試下交學費都唔敢,衰咗就賴人
    想財自? 呢啲正港豬唔荒會成功啦

    投資博客冇生活分享,睇唔到性格價值觀,或者出過書,搞過講座嘅我通通唔L會信
    所以鐘意睇魔術師,風中追風,70後,快活谷小子,
    你地啲嘢知道自己冇可能抄到,不過真係學到好多嘢。

    回覆刪除
    回覆
    1. //哇!使唔使搵命博!

      其實包青天上司個女都成廿歲,出外留學, 應該可以自立. 包青天上司可以唔使咁搏都得

      //我儲咗筆錢夠自己坐食山崩包埋俾家用一年,驚都未L驚過。
      //用啲時間慢慢搵份好啲,啱自己嘅,萬全準備咁見工唔好?

      同意. 上次我都係裸辭, 有準備根本就無有怕;而且見工時間可以自由好多,呢件係好事嚟.

      //見新工個面試官要我解釋一個月「空窗期」,語氣暗示我不務業咁,

      唔係掛? 一個月咋, 放個長少少的假都唔夠喇! 真係生來就做奴隸咩?

      //上篇魔術師資產配置難得引咗好多盲毛入嚟

      深得我心. 下一篇貼堂.

      //你地啲嘢知道自己冇可能抄到,不過真係學到好多嘢。

      多謝讚賞呀!

      刪除
  2. //我們期望能在急促的城市步伐中,推廣工作與生活的平衡,
    真喺要平衡,放工就即刻飛返屋企聚天倫,單身就即刻換件衫去浦吧溝女or仔再喺玻璃窗前啪啪啪,仲on99咁同同事喺中環玩呢啲咁中學生嘅嘢??

    以前舊老細話,work 就是life,所以無所謂work/life balance的⋯

    //STEAM programs add art to STEM curriculum by drawing on design principles and encouraging creative solutions
    其實語言表達能力更加重要,成個自閉男咁唔識表達點叻都冇用。解決數理問題其實都注重creativity,只不過唔係天馬行空亂咁唻。

    回覆刪除
    回覆
    1. //以前舊老細話,work 就是life,所以無所謂work/life balance的⋯

      你舊老細真係註定「一生為奴」。

      //成個自閉男咁唔識表達點叻都冇用。

      最恐怖係搵唔到工便走出街胡亂斬人。

      刪除
    2. 所以係"舊"老細XD

      //最恐怖係搵唔到工便走出街胡亂斬人
      巴士放針⋯

      刪除
    3. //巴士放針⋯

      涉九巴座位刺針案男子今提堂 更新:2018/07/07 13:04
      九巴座位刺針案,被捕的三十歲男子涉嫌傷人提堂,裁判官指考慮案件嚴重性,被告有機會再犯案,拒絕保釋申請,等候警方進一步調查,案件押後下月中再處理。
      報稱無業的被告莫湛深黑布蒙頭,鎖上手扣,由警車押到沙田裁判法院,他被控三項傷人罪,指他在上月二十七日,在尖東中間道往青衣長安邨的 41A 九巴上,非法及惡意傷害一名姓林的女子,再於同日,於由沙田禾輋往荃灣灣景花園的 48X 九巴上,非法及惡意傷害另外兩名女子。
      他同時被控一項企圖傷人罪,指他於上月二十八日,在深水埗北河街 81 號九巴上,企圖非法及惡意傷害一名男子。
      被告說明白控罪並申請保釋,但控方反對,指被告於短時間內干犯四項控罪,若獲准保釋或會潛逃或再犯。控方表示警方要進一步調查,包括將涉案的針交由法證化驗,及追尋有沒有其他受害人,申請將案押後。
      裁判官考慮到案情嚴重,被告有機會再干犯相關罪行,拒絕保釋申請。案件押後至下月中再處理,被告還押懲教署看管。

      1. 「報稱無業」
      2. 「拒絕保釋申請。案件押後至下月中再處理,被告還押懲教署看管。」唔知使唔使俾獄卒探肛, 係就真係天理循環了.

      刪除
    4. 佢好似生意失敗破產之後變宅男,工都唔搵。咁都諗得出,係外國可能一開始會當恐襲去查。

      刪除
    5. //咁都諗得出,係外國可能一開始會當恐襲去查。

      可能港女流行短裙仔, 引人瑕思.

      刪除
  3. 公開宣揚工資奴隸制度既核心價值同策略,香港真係一個傳奇都市。

    //到得眾人扶起包青天上司坐好,待佢定下神來,魔術師便來給眾人「訓話」:「呢間公司,係唔值得你用健康來交換份工架!我地要做到的是財務自由...」
    魔術兄既老闆都聽到呢番說話?哈哈,佢有冇咩回應?

    回覆刪除
    回覆
    1. //公開宣揚工資奴隸制度既核心價值同策略,香港真係一個傳奇都市。

      要騙人,先要騙到自己。

      //魔術兄既老闆都聽到呢番說話?哈哈,佢有冇咩回應?

      佢無聲出。哈哈。

      刪除
  4. 同d公司搞咩 staff engagement 一樣,明明喊著打緊工都仲要扮到好熱愛工作然後花d本應用來陪伴屋企人的時間玩咩扮鬼扮馬拍片比賽,講到尾咪又係工資奴隸收咗錢就要做場 show 娛樂老闆以及粉飾太平⋯

    回覆刪除
    回覆
    1. //明明喊著打緊工都仲要扮到好熱愛工作

      就算係打工,都可以開開心心咁返工,開開心心咁放工;最緊要係工作還工作,放咗工唔使耍馬驑戲。

      刪除