2018年9月27日 星期四

《意亂情迷(Double Fixation)》:一起JJ的日子

記得摩摩都曾經提及過,在那少年十五二十時,血氣方剛的青蔥歲月裡,見到紅姑呢輯 playboy 照(後來成為本片的宣傳海報),不免要抬起頭來,敬一敬禮:
***
白小姐(白韻琴飾)不知從哪裡盜來一顆夜明珠,又話內裡的符咒藏有極大的秘密,更將之賣給了古董收藏家張老闆(秦沛飾)。誰知一出門口,便被神秘女殺手王小姐(王小鳳飾)殺死:

張老闆欲找生神仙解答疑難,生神仙想張老闆將夜明珠留下;張老闆不願,便想改以照片代替。張老闆到影樓僱用攝影師 Jacky(張學友飾)替其拍照。Jacky 在前往張老闆大宅的途中,離遠見到美女莎莉(鍾楚紅飾),馬上拿起相機替伊人留下倩影,而且因為 Jacky 用的是菲林機,也不怕被控「不誠實取用電腦」:

Jacky 拍完照離去。張老闆便在家中一邊浸浴,一邊欣賞夜明珠。女殺手假扮傭人混入張家,企圖搶奪夜明珠,混亂中夜明珠摔在張老闆的頭上,砸死了他,然後跌在地上粉碎了。翌日,Jacky 沖哂好菲林來張家收錢,黑警告知張老闆已死;Jacky 收不到錢之餘,還被女殺手點了相:

Jacky 回到影樓,發現了女殺手竟然死在當地。奇怪的是,Jacky 沒有報警,竟然想將屍體藏起來。這時有兩名自稱是黑警的男子破門而入,Jacky 慌忙逃走(心虛?),三人追逐起來。Jacky逃跑時,借機混入一個餐舞會中,又碰見了穿上性感晚裝的神秘美女莎莉在賭 showhand。莎莉 在 VIP 房中以事業線「接見」了 Jacky,並無端端的應承幫助他洗脫嫌疑:

莎莉 將 Jacky 救到自己家中,話 Jacky 好似自己的弟弟,所以無條件幫佢。莎莉自稱聯絡了律師,要 Jacky 明天帶同菲林去找律師。無沖涼又無剃鬚但依然咁靚仔的 Jacky 第二天便打電話給助手叫她帶菲林給自己的時候,卻發現影樓並無發生命案,亦無黑警在場。助手去 Jacky 的車上拿菲林,卻拿錯了另一套菲林:

Jacky 去到約定的地點等律師,但來的卻是那兩名偽黑警。不知為何要誓死保護底片的 Jacky 沒命價的逃跑,最後又逃回莎莉家中,對住穿着大露背的莎莉大叫「你呃人!我以後不要見到你」之後便昏倒了。莎莉大人有大量,將 Jacky 救回,也不怪他一個大男人,講一套做一套,明明是他自己要逃回來的,卻又要怪責別人。就在夜裡,莎莉穿起黑色斗篷,去跟林小姐見面:

莎莉並無聘請工人姐姐,自己煮了早餐跟 Jacky 一起享用。莎莉欲語還休,只係重申 Jacky 影樓並無發生命案。莎莉 帶 Jacky 出去話要「解決問題」,但一出門口便被偽黑警追趕。兩人唔知點解逃到海邊,「復活」了的女殺手露出小蠻腰,要二人交出底片;莎莉從 Jacky 手中奪過底片,結果被女殺手刺死,菲林亦被女殺手奪去。Jacky 走回大街,找到真黑警報案,回到案發現場,卻不見了莎莉的屍體:


為咗放下心中的莎莉,Jacky 便接 job 到三藩市影風景相,順便散心。點知在彼邦,卻遇到一名跟莎莉長得一模一樣的女子。女子自稱積琪蓮,活潑可愛,Jacky 情不自禁,將對莎莉的愛慕通通投射在積琦蓮身上,積琪蓮也很樂意演活莎莉的角色,兩人很快便打得火熱,展開JJ(Jacqueline - Jacky)戀:

某夜,積琪蓮相約 Jacky 共晉晚餐,並穿起當晚跟他相見的低胸晚裝,道出了真相。積琪蓮就是莎莉。莎莉是個戲劇系學生,卻是連奀星都做唔來。莎莉機會巧合之下碰見了林小姐,受聘去騙 Jacky 的底片,最後又假死想要 Jacky 對她死心。可惜莎莉騙回來的底片只係一套紅姑閃卡,並非林小姐想要的夜明珠照片;莎莉偷聽到林小姐想殺她滅口(咁點解唔殺了 Jacky 搶底片?),於是便逃到了三藩市:

翌日,Jacky 再去探訪,卻發現莎莉已被強力部門擄走,以洗頭艇由美帝境內直送我城。Jacky 也不理那字條錯字連篇,將莎莉寫成 Cherie,便馬上又飛返我城救援。莎莉不知為何,要誓死保護底片,於是假意將底片交給林小姐,實際上卻搶過了便逃。女殺手跟莎莉追逐一番後,相繼墮樓,幸有大樹承托,二人只是跌傷,不過恐怕都好似魔術師去年咁因為骨折而要做手術了,臥床一兩星期唔少得。林小姐想取得掛在樹枝上的底片,卻因為黑警到來而作罷。Jacky 最後取回底片,卻順手丟掉了(咁點解唔索性一早交俾林小姐算數?):

***
本片情節無乜好講,因為根本就無情節。所謂懸疑可謂狗屁不通,夜明珠的秘密、林小姐一時僱用莎莉騙 Jacky,一時又追殺眾人,Jacky 又唔知點解要將菲林當係寶,要誓死保護,所有角色的動機完全是不清不楚,以此片獻給希治閣(Alfred Hitchcock)未免是有點攞嚟講。阿楊凡導演你倒不如認咗係為咗拍 Motion picture 版的紅姑寫真才整呢套戲出來吧!

不過,以攝影角度看,楊凡鏡頭下的紅姑,以不同的健康性感造型示人,又的確係一絕!好似呢幅突點照,你叫依家的ABC女星影,身材可能教好,但一定無紅姑咁型:

本片經常提到柯達菲林,明明坐擁多項專利技術,但卻因為管理層決策失誤,以致在數碼潮流之下覆亡(魔術師的攝影導師,也是被柯達裁出來的老臣子),實在令人唏噓...
仲有就係當年明顯當年港豬民智未開,拍下美帝國境就以當埋係旅遊節目給觀眾大開眼界。真係估唔到二、三十年後,港豬已經當去旅行係生活的一部份,有青直程唔去旅行會死添!

***
伸延閱讀:
攝影札記:特譯:為何富士轉營成功,柯達卻要破產?

15 則留言:

  1. //本片情節無乜好講,因為根本就無情節。
    //不過,以攝影角度看,楊凡鏡頭下的紅姑

    呢套嘢早輪曾經戲院翻影過特別場,不過小弟安排唔到時間去睇 :(

    你咁形容「有影像無劇情」,令我諗起...馬仔親自接手編劇後死唔斷氣的《天下》 XD

    回覆刪除
    回覆
    1. //那些年的港產片很多都這樣粗製濫造,浪費了好演員.

      其實所有範疇的精品都是由廣闊的塔基撐起的塔尖,唔好話阿三咁多垃圾歌舞片先撐出一個阿米爾罕,就算美帝好萊塢,都充斥大量C級片。巷慘片大量粗製濫造其實好正常,但最弊係當年揾錢太易,幾垃圾都隨便幾百萬票房(80年代啊!),更慘係近年圈內人為左我城樽鹽,只係話當年幾風光,而絕口不提黃金期充斥幾多垃圾。唔認清當年實相,又如何回到過去呢?

      //張學友無時無刻打晒呔似經紀多過攝影師XD
      紅姑着吊帶白色小背心真係養眼
      //紅姑真係堅正. 女神真係女神.
      //無沖涼又無剃鬚但依然咁靚仔的 Jacky
      //仲有就係當年明顯當年港豬民智未開,拍下美帝國境就以當埋係旅遊節目給觀眾大開眼界

      學友同紅姑一男一女都屬扮乜似乜的演員,即時令巷慘片之王推介兩套舊片

      《秋天的童話》--睇完《男與女》《意亂情迷》,再加埋呢套,紅姑三個截然不同的形象都集齊勒!戲亦是好戲,仲有真正的美帝背景:全程紐約拍攝,仲可以見到世貿大樓...

      《明月照尖東》--小白臉黑警沉船沉出禍的故事,劇情無乜特別,但學友做大佬「太子」實在太出色,竟然成為一時佳話,之後仲整左套外傳《太子傳說》。故事亦反映90年代初經濟繁榮下我城的浮躁氣氛...

      刪除
    2. //呢套嘢早輪曾經戲院翻影過特別場

      我呢隻碟就係30周年數碼修復版!

      //馬仔親自接手編劇後死唔斷氣的《天下》

      哈哈, 已變成龍珠

      //美帝好萊塢,都充斥大量C級片

      賣埠到過來我城, 都係經買手篩選過喇!

      //更慘係近年圈內人為左我城樽鹽,只係話當年幾風光,而絕口不提黃金期充斥幾多垃圾

      笨土有青唔偏聽, 就唔係笨土有青喇.

      雖則我唔多睇巷慘片, 但《秋天的童話》 我都有睇的! 唔寫嚕. 我覺得紅姑個造型好過《縱頗四海》的紅豆.

      《明月照尖東》入 list.

      刪除
    3. 《秋天的童話》是我最愛港產片之一。雖是全程紐約拍攝,但攝製隊只逗留數日,所以一有空周潤發就要在大街小巷跑跑跑來拍片尾的鏡頭。

      刪除
    4. 我城的電影製作成日都係咁, 都唔知係唔係因為永遠都唔夠 budget,亦唔慣有 plan...

      刪除
  2. 這套片跟AV片一樣,只喺視覺或官能享受,唔須要理情節嘅!嘻嘻!

    回覆刪除
  3. 張學友無時無刻打晒呔似經紀多過攝影師XD
    紅姑着吊帶白色小背心真係養眼

    回覆刪除
    回覆
    1. //張學友無時無刻打晒呔似經紀多過攝影師

      係地慘經紀

      //紅姑着吊帶白色小背心真係養眼

      當年的紅姑真係完勝現在所有港妹女星.

      刪除
  4. 紅姑真係堅正. 女神真係女神.

    回覆刪除
  5. 淨睇影評便知是純綷賣靚仔靚女的爛片一套,那些年的港產片很多都這樣粗製濫造,浪費了好演員.

    回覆刪除
  6. 呢套戲靠一張poster引人入場,都咪話唔勁。

    回覆刪除
    回覆
    1. 鬼叫當年楊凡替 Playboy 影紅姑硬照影得咁鬼好!

      刪除