老死不相往來

舊事重提一下：魔術師是在在本土出生的蝗二代，藉貫廣東省寶安縣；先父在家中是么仔排第三，大伯父、二伯父亦已在多年前仙遊。大伯父有兩仔兩女，堂阿哥丙就係魔術師不時提及住在葵芳公屋的老粗堂阿哥，大伯父其餘三個仔女都在深圳，服侍娘親直至去年終老。
由於８０年代深圳開始發展，市政府收購土地，魔術師家祖屋亦被徵收，換來若干物業權益。大堂家姐甲頗有生意頭腦，一開二、二開四，竟然做起小班個體戶地產霸、收租霸；兩個堂阿哥乙與老粗堂阿哥亦夾錢「起屋」收租，企圖增加被動收入。
誰知近年市政府又話要拆卸重建，大堂家姐話要分家，咁啱當年堂阿哥乙與老粗堂阿哥丙亦夾錢起的屋係用大伯的名字，老人家去之前又無搞遺產手續，根據法例堂兄乙、丙嘅屋變成大堂家姐甲與及堂家姐丁的有份分，於是四兄弟姐妹便因財失義，掀起「爭產風波」（見《港燦理財（十二）之好仔不論爺田地》）。
依魔術師所暸解，大堂家姐甲畢竟有錢，便放棄跟老粗堂阿哥丙爭產，但堂家姐丁卻是寧願「不遷不拆」（「缺一（個仙）不可」？）。拖吓拖吓，事情直至現時都無解決到，大家攬炒。四兄弟姐妹搞到老死不相往來，但又要在三姑六婆前亙數不是。大伯娘年事已高，更是受不得子女如此唔生性，健康日差，到去年撒手歸西（見《無畏無懼真送終》）。

上星期忽然接到大堂家姐甲 WeChat，話堂家姐丁病重，醫生已發出了「病危通知書」（乜嚟？），已經轉到了醫養融合老年科醫醫院（應該是給末期寧養病人走最後一程用的？），要魔術師返去見上一見（最後一面）；同時順便「飲埋堂家姐個細女嗰餐」 —　話說堂外甥女都識咗個男仔好耐，就順便結埋婚，圓老媽子最後的心願。
魔術師下午接到消息，因為之前都未聽說過堂家姐丁有病，頗感諤然，於是便馬上跟包青天上司講一聲，趁米婆Ｍ仍放假未返，便連假也不用請，逕自閃了去，「自行送中」。
呢個都係魔術師咁俾面包青天上司的原因（見《歷任上司評》)，跟同一間公司，２０年前的上司Ｋ（帶着「濃濃的惡意」地）對魔術師講呢句：「你阿媽有心贓病係你嘅問題...」真係差天共地（當時魔術師年少氣盛，當然唔忿氣同上司Ｋ爆了一鑊；現在回想起來，佢講嘅雖然係「冷血」咗啲，但事實並唔係錯。鬼叫自己係 core team，中央電腦控制室一分鐘打一次電話來，搞到魔術師全家無得訓都得 — 所以，財務自由，真係好緊要架！）。
因為魔術師在第一份工養成了隨身帶 return home card 的習慣，過關並唔係問題，並且在途中跟大堂家姐甲聯繫，知道轉了醫院，搭地鐵也可以抵達。
魔術師一出深圳地鐵，行無遠便墥見大堂家姐甲，正好跟佢返醫院。沿途大堂家姐甲跟魔術師解釋堂家姐丁的病情：原來在大伯娘過世後無耐，堂家姐丁的健康便開始轉差，驗到是卵巢長了罕見腫瘤，做過兩次手術依然復發，半年內已擴散到骨，無藥可治。堂家姐丁去過廣州及上海診治，都係群醫束手，話全國都只係得３０幾個例云云。又，堂家姐丁原來生了兩個女之後月事已經無乜，以當時３０幾歲咁嘅年齡並不合理...當然呢類「婦女新知」，魔術師真係識條鐵，只係得個聽字...
見到精神尚算不錯的堂家姐丁後，便去酒樓飲「喜酒」。原來男家都係四兄弟姐妹（好似話農村人捉超生捉得唔嚴，要生可以去深圳生...），呢個新郎哥是么仔，大哥是８８年出生（佢坐在魔術師隔離搭訕告知），中間二三家姐都幾可愛，無乜蝗妹味，二家姐仲好似有線記者陳惠恩（係面珠登無陳小姐咁飽滿）。

住沙田教小學的堂家姐（二伯個女）也有來，不過放得工嚟到都成９點...
而老粗堂阿哥丙就無到。
結果，直至堂家姐丁去世（當然已做好遺產分配），兩家人就是老死不相往來。
＊＊＊
伸延閱讀：
無畏無懼真送終
港燦理財（十二）之好仔不論爺田地
歷任上司評