2020年1月26日 星期日

解車公靈簽(2020庚子鼠年)

年初二車公誕 鄉議局主席劉業強為香港求得一支中籤 2020/01/26 11:36

【有線新聞】年初二車公誕,鄉議局主席劉業強,按傳統到車公廟求籤,為香港求得一支中籤。
九十二號簽文是:人生何在逞英豪,天理人情只要公,天眼恢恢疏不漏,定然作福福來縱。解曰:家宅平平,作福加增,自身平安,婚姻成合。
至於沙田鄉事委員會,首副主席李志麒,則為沙田求得一支上籤。七十一號簽文是:龍吟溪外水自甘,虎笑崗中去復還,境傑風雲能際會,地靈潮障兩相參,解曰:萬事亨通。
鄉議局主席劉業強說,過去大半年香港紛亂,簽文意指政府施政要聽民意,不要自以為是。
魔術師早前都講過,唔知係咪見到班社混仔以至解簽佬都喜歡隨意生安白造,亂解簽文,胡說八道,所以近年求出來的簽文愈來愈淺顯(見《車公靈籤》系列),今年也不例外。
車公靈簽 第九十二簽:中籤
簽文:人生何在逞英豪,天理人情只要公;天眼恢恢疏不漏,定然作福福來縱。
解簽:家宅平平,作福加增,自身平安,婚姻成合
斷簽:家宅裝風光,占病作福,自身不吉,出入不安,婚姻不合,求財無,外強中乾,有私無公,上天示警,不然災星
家宅:平平
出行:遠行合宜
姻緣:可成
行人:有訊息
生育:可得身孕
訴訟:以和為貴
事業:看準時機
搬遷:吉方為佳
自身:積德修身
疾病:可痊癒
財運:尚可
呢幾句簽文雖然易解,但真實每人都可以有其解讀:劉仔就話政府要聽民意,黃C會話777在「逞英豪」,藍C又會話黑暴青「天網恢恢 疏而不漏」,好像人人都可以按其意願作解釋咁。唔通車公真係咁滑頭?
魔術師的理解是,簽文字面上不錯是很容易理解,但要再深入暸解車公的意思,就要研究一下簽文的語境。
1. 首先,劉仔係為我城求簽。我城者,包括正苦,包括官員、公墓園團隊,也包括黃藍黑笨土勇武和理非,唔能夠單一就話「連車公都屌咗政府先」。
2. 所謂「逞英豪」大概就是「逞英雄」的意思,即是炫耀自己的實力,「夾硬來」做其他人唔敢做的事,而結果卻是事與願違,強差人意。咁講法,話去年777恃住「數夠票」強行二讀修例事件當然講得通,畢竟修例早已撤回,己是過去式,似乎唔係簽文的意思(占卜是未來式);反而話正苦對疫情「逞強」,扮無嘢,預防措施不到位仲貼近現實。
「逞英雄」也可以指一眾勇武派「義士」對社會的持續騷亂,挾200萬+1人的氣勢、區選大勝的民意、攬炒的聲勢、與及黃色經濟圈的成效,不斷地向正苦壓逼,沒有考慮過「得些好意需回首」,而無考慮過唔少黃藍店都開始牙痛咁聲。故此「逞英豪」(或「逞英雄」)就正好代入了黃營中佔多數的「和理非」,與及少數的黑暴青的關係:「和理非」大抵上只是對勇武派「理解和同情」,你叫「和理非」親自上陣一齊衝一齊掟汽油彈,真係有啲難。
既然「逞英豪」的主角是正苦與及(通常自稱自己才是「香港人」的)勇武派,並非躲在一角做道旁兒的是「和理非」,咁第一句「人生何在逞英豪」明顯就是車公對正苦跟勇武派的勸說。
3. 只要明白了第一句的 subject matter,那麼第二句就好易解。「天理人情只要公」就是情理要兼備,過得自己過得人,凡事要公平。以勇武派來說,你可以針對打擊你的敵人,但就不要傷害無辜。由起底、欺凌騷擾警員妻兒家屬、以致裝修、鶳源於要教訓不認同你、不跟你站在同一邊的人和商家,只是洩憤的行為,難以配上一個「公」字。同樣,黑警也有各種不當行為,一樣要以情理要兼備的方式去處理,不能每次四點招待會以語言偽術搪塞過去。
4. 「天眼恢恢疏不漏」作字面解,就係就係你可逃過了法律制裁,遲早都會有報應。接續前面兩句,黑警使用過度武力、瘋狂駕駛、將記者身分證展示於鏡頭前、人手調配與及事後解釋失當、甚至據黑暴青說有警察殺人、強姦、栽贓等指控,一樣要秉公處理,不能徇私;至於黑暴青,唔好以為蒙住面就可以逃過刑責(因為有「天眼」)。以上兩者,唔好以為打贏官司就可以逍遙法外,隨時一股不可預測的「業力」(例如疫症?)可以攞你命(或始終法網難逃)。
5. 「定然作福福來縱」可以拆開兩部份來理解。「作福」者,根據前文後理,不能解作「作威作福」,而是「製造出」(作)「福份、福氣」;而這些「福份、福氣」則是「來自」「縱」(「福來縱」)。古有「合縱連橫」,「橫」指東西,縱指「南北」,即是「福」是由殺人政權帶來的。可能終亂辦換人就是「福」的開始。
6. 配合解簽、斷簽來看,「逞英雄」的背景原因,就是「家宅平平、裝風光、外強中乾」。「天理人情只要公」其實就是指「有私無公」(不論正苦、黃黑藍皆然),是故「以和為貴」,要在法理情中取得平衡;同樣地,犯事者亦要知道「到頭這一身 難逃那一日」。
由於始終正苦與及黃黑始終對於「天眼恢恢疏不漏」是口服心不股(否則就不會諸多藉口推卸責任),所以表面上雖然「疾病可痊癒」(包括心病和疫情),但恐怕只是「奉子成婚」(「可得身孕」、「姻緣可成」),雙方和好的背後始終有條刺(「婚姻不合」)。傷民既要「自身積德修身」,更要看看殺人政權換人是否會帶來新氣象了(「行人:有訊息」)。
***

沙田的簽文比較隱誨,魔術師覺得應該兩句兩句,當成是對聯咁睇,虛字較多,主要係意境。
車公靈簽 第七十一簽:上籤
簽文:龍吟溪外水自甘,虎笑崗中去復還;境傑風雲能際會,地靈潮障兩相參。
解簽:萬事亨通
斷簽:家宅吵鬧,占病有劇痛,防險,自身甘苦參半,出入防笑面虎,婚姻女吉男凶,求財少許,風雲際會,小人復現,半凶半吉,殺機暗閃
家宅:大吉
出行:他方有驚喜
姻緣:喜事近
行人:未至
生育:順產
訴訟:勝算大
事業:大吉
搬遷:合宜
自身:積福為佳
疾病:小心關節等病
財運:可有財獲
7. 所謂「龍吟虎嘯(「笑」應為乩童別字?」)是「比喻相關的事物互相感應」,「形容有人發跡」(見《漢典: 龍吟虎嘯》)。龍吟溪上(沙田河?城門水塘引水道?),老虎在山上(大帽山?針山?)來往盤踞(來回又折返);「風從龍,雲從虎」,是故地靈人傑,風雲際會,正是有人冒起。此君受「同路人」支持,食正一個「傑」字,正是岑哥仔是也!
(圖片來源:香港政府地理資訊地圖
8. 所謂「潮障兩相參」,「潮」者,可作「思潮」解;以岑哥仔為 subject matter,就是黃營的反中以致販民論述(間中以「同情和理解」勇武派作聯繫,「和勇不分」、「核爆也不割」);而「障」者,配上原文的「地」,也可指是沙田鄉事固有勢力。畢竟雖然沙田區區議會黃藍比例為39:1,鄉事派「保鄉衛族」,可未必跟你玩「少數服從多數」的投票制度。故此,「兩相參」,即亙為印證,吉者有商有量,凶者針鋒相對無偈傾。
(網上圖片)

9. 配合解簽、斷簽來看,跟上面第九十二簽一樣,「解簽」係比較善頌善禱,而「斷簽」則比較直話直說。「小人復現,半凶半吉,殺機暗閃」、「自身甘苦參半,出入防笑面虎」其實已經講咗來年某些地區亂象(「家宅吵鬧」)。不過,由於沙田區始終都係以黃營佔大多數,區議會亦被黃C壟斷,故此普遍來講,「家宅:大吉」、「事業:大吉」、「訴訟:勝算大」、「出行(遊行):他方有驚喜」、以至給阿雪的「姻緣:喜事近」、「生育:順產」,均為一片喜慶景象。

***
參考資料:
周公解夢大全:車公靈簽
漢典
***
伸延閱讀:
沙田區議會今首次會議 程張迎黃學禮任正副主席 通過設委員會監察警執法 (明報 2020年1月3日 星期五 18:07)
阿雪結婚了

26 則留言:

  1. 解説纖文同抽到咩纖有咩關係? 六合彩抽咩Number都會同買既人姓有關係啦 :0)

    回覆刪除
    回覆
    1. 朝祝怕被裝修,唔敢亂解簽, 求簽者唯有自己解返.

      刪除
  2. 見到解簽話沙田黃營一片喜慶景象,我如果係沙田市民,就真係心淡。 又係嗰一句,唯有「接受世界已經改變」。

    回覆刪除
    回覆
    1. //「接受世界已經改變」

      咁做心理上會健康啲.

      刪除
  3. 同意枝簽係講全體香港人
    另外簽文出處係馬謖帶兵, 剛愎自用搞到失街亭, 結果諸葛亮要揮淚斬馬稷. 呢度都可能暗示某啲人(獻世派?黑暴幕後大台?)自以為好打得, 但事實就係成事不足敗事有餘要人頭落地.
    https://www.hk01.com/%E7%86%B1%E7%88%86%E8%A9%B1%E9%A1%8C/426678/%E8%BB%8A%E5%85%AC%E6%B1%82%E7%B1%A4-%E7%B1%A4%E6%96%87%E5%85%B8%E5%87%BA-%E9%A6%AC%E8%AC%96%E5%B8%B6%E5%85%B5-%E5%89%9B%E6%84%8E%E8%87%AA%E7%94%A8%E6%89%93%E6%95%97%E4%BB%97%E5%BC%95%E7%B6%B2%E6%B0%91%E7%86%B1%E8%AD%B0

    回覆刪除
    回覆
    1. //簽文出處係馬謖帶兵

      我就查唔到「簽文出處」係邊到講, 只係見到梁瓜杰嘅FB quote 毒果 再 quote 墨晴晴講嘅. 我自己就對「馬謖帶兵」之說相當存疑, 要再fact check.

      https://www.facebook.com/permalink.php?id=12840197743&story_fbid=10157835429677744

      如果講紙上談兵, 長平之戰的趙括才是「元祖級」吹水友, 白起坑殺數十萬趙國降卒, 自此定下秦國統一大業.

      而馬謖係名士馬良之弟, 孔明誤信名牌(反而劉備臨終前話馬謖名大於實,不可盡信). 本來孔明都幾錫馬謖, 但鬼叫馬謖立下軍令狀, 失了街亭唔斬唔得, 才有「揮淚斬馬謖」的劇情.

      //自以為好打得, 但事實就係成事不足敗事有餘要人頭落地.

      馬謖唔係自以為好打得, 而係懶醒佈錯陣, 反而紅褲子出身, 跟孔明實戰的王平就更加謹慎.

      刪除
    2. 師傅手中份簽文薄有寫(1:13), 要睇埋出處應該係"收費服務"黎?XD
      https://www.youtube.com/watch?v=qhg6S29Ycwg

      刪除
    3. 謝謝匿名的資訊.

      馬謖只是一介參軍(參謀部人員), 當時劉禪係蜀漢帝室, 孔明是丞相, 失街亭時趙雲、魏延等主將尚在, 講軍功論資排輩點都數唔到馬謖, 照計對比起來777的地位點都高啲. 要對比馬謖,可能是721的指揮官要負責.

      刪除
    4. "馬謖帶兵"究竟係指馬謖有問題定係孔明有問題(即係邊個係有最大責任),定係意指其他事?

      始終,晤知道簽文所引既原文既上文下理,單憑"馬謖帶兵"真係點解都得。

      刪除
    5. 係. 占卜係講未來式, 講返721或者2019發生的事都係牽強咗啲. 而且「馬謖帶兵」成個content最多只係配合到「逞英豪」(立了軍令狀), 其餘簽文都relate 唔到 (孔明斬馬謖夠哂「公」, 唔需要用「天理人情只要公」來作溫馨提示). 我會選擇無視.

      刪除
    6. //失街亭時趙雲、魏延等主將尚在

      魏延做緊乜正史冇記載,趙雲另有任務:


      三國志 蜀書九 馬良傳
      「良弟謖,字幼常,以荊州從事隨先主入蜀,除綿竹成都令、越雋太守。才器過人,好論軍計,丞相諸葛亮深加器異。先主臨薨謂亮曰:「馬謖言過其實,不可大用,君其察之!」亮猶謂不然,以謖爲參軍,每引見談論,自晝達夜。

      建興六年 ,亮出軍向祁山,時有宿將魏延、吳壹等,論者皆言以爲宜令爲先鋒,而亮違眾拔謖,統大眾在前,與魏將張郃戰於街亭,爲郃所破,士卒離散。亮進無所據,退軍還漢中。謖下獄物故,亮爲之流涕。良死時年三十六,謖年三十九。」

      三國志 蜀書六 趙雲傳
      「五年,隨諸葛亮駐漢中。明年,亮出軍,揚聲由斜谷道,曹真遣大衆當之。亮令雲與鄧芝往拒,而身攻祁山。雲、芝兵弱敵彊,失利於箕谷,然歛衆固守,不至大敗。軍退,貶為鎮軍將軍。」

      三國志 蜀書十 魏延傳
      「五年,諸葛亮駐漢中,更以延為督前部,領丞相司馬、涼州刺史,八年,使延西入羌中。。」

      //"馬謖帶兵"究竟係指馬謖有問題定係孔明有問題

      「謖違亮節度,舉動失宜,大為郃所破。亮拔西縣千餘家,還于漢中,戮謖以謝衆。上疏曰:「臣以弱才,叨竊非據,親秉旄鉞以厲三軍,不能訓章明法,臨事而懼,至有街亭違命之闕,箕谷不戒之失,咎皆在臣授任無方。臣明不知人,恤事多闇,春秋責帥,臣職是當。請自貶三等,以督厥咎。」於是以亮為右將軍,行丞相事,所總統如前。」

      我只係知馬謖被戮,諸葛就最多官降三級,但做返同樣既野。

      刪除
    7. 問題晤係我哋知道三國既歷史係點,而係簽文想用個故事講咩比求簽既人聽。

      因爲同一件事,用晤同角度可以得出晤同結論。例如赤壁係漢反抗曹操既大成就,但係反過嚟講,都可以話令漢人要受戰爭折磨更多時日既禍端。

      所以,要明白任何文章(不只簽文),上文下理係最重要。你一用自己既認知去睇片面既內容就9成都晤係作者原意。

      以我理解,簽文每句都有出處,一係就係一句成語,一係就係古文中既一句。好次上年咁,每句都有個出處,咁先可以比較原整咁明白簽文講咩。

      刪除
    8. 「馬謖帶兵」係有匿名留言指出, 我本來就唔知.

      即使有補充, 在下才疏學淺, 未能理解「馬謖帶兵」跟「理人情只要公;天眼恢恢疏不漏,定然作福福來縱」有甚麼關係, 正如你所講「上文下理未能貫通」, 故只好無視.

      //你一用自己既認知去睇片面既內容就9成都晤係作者原意。
      //例如赤壁係漢反抗曹操既大成就,但係反過嚟講,都可以話令漢人要受戰爭折磨更多時日既禍端。

      我地睇所有事情, 包括你落呢句 comment 及以上赤壁次戰, 都係「基於自己的認知去睇片而的內容」, 講嘅人已死(包括「一國兩制 高度自治」), 你想問佢原意係點都無可能. 這些又不是科學, 沒有 formula 可以跟從, 不根據自己認知去理解, 又可以憑什麼?

      刪除
  4. 纖文嘅嘢,你有你解,佢有佢解,各取所需,並無正解。

    回覆刪除
    回覆
    1. 咁點都有個譜嘅. 唔通「天眼恢恢疏不漏」可以解作「違法達義功必成」咩!

      刪除
    2. 點解唔得, 黃營一定話"天眼恢恢"睥住嘅係777政權, "違法達義"就係"疏不漏"嘅執行者

      刪除
    3. 「執行者」快啲俾啲「公」出嚟睇吓喇.

      刪除
  5. //鄉議局主席劉業強說,過去大半年香港紛亂,簽文意指政府施政要聽民意,不要自以為是。
    怕咗黃C,鄉議局都要D咗正苦先XD

    //人生何在逞英豪
    黃C有青暴青都自以為喺郭靖喇,仲唔喺英雄豪傑?好清楚喺指明喺暴青啦

    //天理人情只要公
    //有私無公,上天示警,
    只要公不要私,唔好再搞私了喇!

    回覆刪除
    回覆
    1. //黃C有青暴青都自以為喺郭靖喇,仲唔喺英雄豪傑?好清楚喺指明喺暴青啦

      仲講郭靖? 我連輕輕咁回應吓, 都俾你當做係「附和」, 俾某些粉絲要求我「道歉」呀...(唔知黃C點解成日都玻璃心, 郁啲都叫人道歉嘅呢?)

      //只要公不要私,唔好再搞私了喇!

      「公鳥」得唔得?

      刪除
    2. 初三赤口廷鬧定呀你哋

      刪除
    3. "共了"更加好XD。黃c應該去要求車公撒回呢支有啲藍c味嘅簽,不撤不散。

      刪除
    4. 黃c要驗簽筒,黑暴隨時裝修。
      昨晚見曱甴照頭仆落個光頭佬到,真.謀殺。
      妓者相當專業,繼續助攻影相。

      刪除
    5. //黃c應該去要求車公撒回呢支有啲藍c味嘅簽,不撤不散。

      車公的墳要被起了...

      //昨晚見曱甴照頭仆落個光頭佬到,真.謀殺。
      //有個仲插到一頸血。

      我都收到話傳死咗添...無fact check 周圍傳真係衰過肺炎.

      刪除
  6. 魔術師辛苦晒

    //斷簽:家宅裝風光,占病作福,自身不吉,出入不安,婚姻不合,求財無,外強中乾,有私無公,上天示警,不然災星

    斷簽直頭就係香港社照!

    同意支簽係講政警暴三方,再唔收手就等收。
    不過尋晚都仲係度逞緊英豪。


    回覆刪除
    回覆
    1. //不過尋晚都仲係度逞緊英豪。

      車公講嘢唔啱聽, 班有青點聽得入耳呢?

      刪除